Soltústik Qazaqstan oblysynyń ákimi Ǵaýez Nurmuhambetov sý tasqynyna qatysty oblys turǵyndaryna úndeý joldady, dep habarlaıdy Egemen.kz.
«Qurmetti jerlester! О́ńirde sý tasqyny jaǵdaıy kúrdeli. Oblys ortalyǵyna úlken sý kele jatyr. Qıyn sátte el basshylyǵy bizge qoldaý kórsetip otyr. Prezıdentimiz Qasym-Jomart Kemeluly Toqaevtyń tapsyrmasy boıynsha oblysta jumys saparymen eki ret Premer-mınıstr Oljas Abaıuly Bektenov boldy. Qazir oblysta Úkimet basshysynyń birinshi orynbasary Roman Vasılevıch Sklıar tasqynǵa qarsy jumystarǵa basshylyq etip jatyr. Turǵyndardyń ómirin saqtaý - bizdiń basty mindetimiz», dedi oblys ákimi.
Ákim óńirde sý tasqyny jaǵdaıy áli de kúrdeli ekenin jetkizdi. Onyń aıtýynsha, sý tasqynyna qarsy barlyq qajetti sharalar qabyldanyp jatyr. Birinshi kezeńde eldi mekenderden erigen sýdy burý jumystary júrgizildi.
«Al qazir úlken sý Esil ózenimen ótedi. Shamamen bir-eki kúnnen keıin sý oblys ortalyǵyna jetedi. Prıbrejnoe jáne Teplıchnoe aýyldaryn, Zarechnyı kentin sý basý qaýpi bar. Osy kúnderi biz bógetterdi salý jáne nyǵaıtý boıynsha táýlik boıy jumys istedik. Aýyzsýdy úzdiksiz jetkizý úshin birinshi kóterý sorǵy stansııasynyń aınalasyndaǵy bógetti nyǵaıttyq. Bizdiń eldi mekenderdi qorǵaý boıynsha buryn-sońdy bolmaǵan sharalar qabyldandy. Alaıda, bul jetkiliksiz bolýy múmkin. Petropavlǵa qaraı úlken sý aǵyny kele jatyr», dedi Ǵaýez Nurmuhambetov.