14 sáýirden bastap Ekibastuzdaǵy qalalyq aýrýhanaǵa ýlaný belgilerimen júgingen shaǵymdanýshylar jıilegen. Anyqtalǵandaı, naýqastar 13 sáýir kúni qaladaǵy meıramhanalardyń birinde ótken is-sharaǵa qatysqan, dep jazady Egemen.kz.
Osyndaı shaǵymmen 32 adam dáriger kómegine júgingen.
Pavlodar oblysynyń densaýlyq saqtaý basqarmasy usynǵan aqparatqa sáıkes, ýlaný boıynsha jappaı aýrýhanaǵa júginýshilerdiń syrqat belgileri birdeı: birneshe ret qusý, aıqyn álsizdik, ishtiń aýrýy, dene qyzýynyń joǵarylaýy.
«Emdelýshiler qabyldaý bólimshesinde qaralǵannan jáne shuǵyl medısınalyq kómek kórsetilgennen keıin (asqazandy shaıý) ınfeksııalyq bólimshege jatqyzyldy. 14 sáýirden 15 sáýir saǵat 17:00-ge deıingi aralyqta 32 adam júgindi, onyń tórteýi aýrýhanaǵa jatýdan bas tartty, qalǵandary emdelip jatyr. Qazir naýqastardyń jaǵdaıy ortasha aýyr», delingen oblystyq densaýlyq saqtaý basqarmasynyń habarlamasynda.
Qalalyq sanıtarlyq-epıdemıologııalyq baqylaý basqarmasy tamaqtan ýlaný deregi boıynsha meıramhanany tekseristen ótkize bastady. Tıisti amaldar QR Kásipkerlik Kodeksine sáıkes júrgizilip jatyr.