Belorýs qyzy Marııa Tatarenko Qazaqstan halqy Assambleıasynyń Soltústik Qazaqstan fılıalynda eńbek etedi. Qurbylary onyń janashyrlyq kómek kórsetýge árqashan daıyn turatynyn aıtady.
«Soltústik Qazaqstan ýnıversıtetin bitirgennen beri men osy Assambleıada qyzmet atqaryp kelemin. Qazir «Qoǵamdyq kelisim» mekemesi basshysynyń orynbasarymyn. Volonterlik uıymdardyń basyn biriktirip, Dostyq úıinde ortalyq shtabyn qurdyq. Qazir barlyq kúshimizdi bir arnaǵa biriktirip, úılestire alamyz», deıdi ol.
Keshegi kúni tasqyn sýǵa qarsy kúreste Marııa Tatarenkonyń joldastary aldyńǵy qatarda júrdi. 25-30 jastaǵy er-azamattar qapshyq tasyp jatsa, qyzdar solarǵa ınertti materıaldar toltyrdy. Qoldary kúrektiń sabynan kúldirep, jylaǵan qyzdar da boldy. Ondaılarǵa qolǵappen jumys isteý kerektigin kórsetip, kúldiregen terisin baılap berip júrgen kómekshige kómek berýshiler de tabyldy.
Eriktilerdi shaqyrǵan habarlandyrýdan keıin Marııalardyń komandasy 30-40 adamǵa deıin kóbeıgen. Ásirese dambalardy bekiteıik degen habarǵa 20-30-daǵy er-azamattar kóp kelgen. «Olardyń keıbireýleriniń tegin de bilmeımiz. Bárine Anton, Roman, Damır, t.b. dep tek attarymen shaqyramyz. Biz negizinen Teplıchnyı aýylyndaǵy dambany bekitýge qatystyq. О́kinishke qaraı, dambamyzdy sý jaryp ketti. Alaıda volonter jigitter qazir qaıyqtarmen sýda qalǵan janýarlar men ıtterdi qutqaryp júr. Keıde adamdardy qutqarýǵa qolushyn beredi», dedi Marııa.
Marııa Tatarenko komandasynyń qazirgi mindeti – qaıyrymdylyq kómekterimen kelgen azyq-túlik, túrli kıimder, birinshi qajettilikke qajetti dári-dármek, t.b. qoraptarǵa salyp, halyqqa taratý. «Biz aldymen kómek zattaryn ózimiz halyqtan jınaǵan bolatynbyz. Árkim qolda baryn ákeldi. Men halyqtyń júreginiń keńdigine tańǵalamyn. Bir ájeı tipti «osydan basqa eshteńem bolmaı tur» dep úıinde turǵan bir kılogramm kúrishine deıin ákelipti. Ájeı ketken soń qyzdar kózimizdiń jasyn syǵyp aldyq. Qazir jan-jaqtan kelgen qaıyrymdylyq kómek kóbeıdi. Solardyń bárin bólip, qoraptarǵa salyp, adamdarǵa taratýdamyz. Oǵan Damıra degen qyzymyz basshylyq jasap, 15 adam eńbek etip jatyr», dedi M.Tatarenko.
Volonterlerdiń Nazarbaev kóshesindegi «Kommýnaldyq bazardaǵy» taratý alańyna kezekke turǵan halyqtyń ushy-qıyry joq, tipti aıaldamaǵa deıin sozylypty. Árıne, bulardyń bári tasqynnan zardap shekkender emes ekeni aıdan anyq. Arasynda tegin dúnıeni alyp qalaıyn degen ashkózder de joq emes. Keıbireýleri tipti telefondarymen tanystaryn, týystaryn da shaqyryp jatyr. «Tegin taratyp jatyr, alyp qalaıyq» degen sózderdi estip qalasyń. Marııa kezekte turǵandardy zardap shegýshi me, basqa ma – aıyra almaıtynyn aıtty. «Biz tek qujattaryn suraımyz. Sosyn mekenjaıyn jazyp alamyz. Árıne, keıbireýlerdiń zardap shegýshi emes ekeni bilinip turady, biraq ondaıdy anyqtap jatýǵa ýaqytymyz da, qaqymyz da joq. Árkimniń óz uıaty biledi ǵoı», deıdi ol.
Sóıtip, oblystaǵy 8 myńdaı belorýs halqynyń ókili Marııa da jurttyń bel ortasynda, eriktilerdi uıymdastyryp, halyqqa qoldan kelgen kómegin jasap júr. Mundaılarǵa «myń bolǵyr» dep qalaı aıtpassyń!
PETROPAVL