Májilis spıkeri Erlan Qoshanovtyń tóraǵalyǵymen bıýro ótip, aldaǵy jalpy otyrystyń kún tártibi naqtylandy.
Depýtattar birinshi oqylymda oıyn bıznesi, lotereıa jáne lotereıa qyzmeti máseleleri jónindegi zań jobasyn qaraıdy. Bul zań jobasy men Ákimshilik quqyq-
buzýshylyq týraly kodekske ózgeris engizý týraly ilespe zań jobasyn Parlament depýtattary Memleket basshysynyń tapsyrmasyn oryndaý úshin azamattardy qumar oıyndar men bás tigýge qatysý kezinde oıynǵa táýeldilikti (lýdomanııany) qalyptastyrýdan qorǵaý maqsatymen ázirledi.
Usynylǵan túzetýler 25 jasqa tolmaǵan jeke tulǵalarǵa, qatysýy shektelgen jáne boryshkerlerdiń biryńǵaı tizilimine engizilgen tulǵalarǵa oıyn jáne bás tigýge qatysýǵa tyıym salýdy belgileýge baǵyttalǵan. Sonymen qatar lotereıa bıletterin taratýǵa (satýǵa) bólek talaptar engizilip, býkmekerlik keńseler men lotereıalardy jarnamalaýǵa tyıym salý kózdelgen. Elektrondyq kazınolar men onlaın kazınolardyń qyzmetin uıymdastyrǵany úshin qylmystyq jaýapkershilik, sondaı-aq 25 jasqa tolmaǵan jáne qumar oıyndar men bás tigýge qatysýy shektelgen tulǵalardy qatysýǵa jibergeni úshin ákimshilik jaýapkershilik engiziledi.
Birinshi oqylymda depýtattarǵa mass-medıa máseleleri boıynsha Ákimshilik quqyqbuzýshylyq týraly kodekske buryn Májilis qabyldaǵan «Mass-medıa týraly» zańnyń erejelerimen úılestirý maqsatymen ázirlengen Úkimet engizgen túzetýlerdi qaraý usynylady.
Jalpy otyrystyń kún tártibiniń jobasyna ekinshi oqylymda jańartylatyn energııa kózderin, elektr energetıkasyn jáne tabıǵı monopolııalardy paıdalanýdy qoldaýǵa qatysty depýtattardyń zańnamalyq túzetýleri talqylanady.