Keshe «ECO Network» kompanııasynyń uıymdastyrýymen Almatyda «jasyl» kún tártibin talqylaýǵa arnalǵan dıalog alańynda «Eko-dırektorlar meet-up» is-sharasy ótti, dep jazady Egemen.kz.
Is-sharany Almaty qalasy ákiminiń orynbasary Álisher Ábdiqadyrov ashyp, ol qalanyń taza aýasy men qaldyqtarmen kúresýdegi júrgizilip jatqan jumystardyń alǵashqy nátıjelerin bólisti.
«Biz áriptesterimiz ben dostarymyzdy súıikti Almatynyń kókteminde, otandyq eko-salanyń Qazaqstanda ǵana emes, jalpy óńirdegi basty oqıǵalarynyń birine aınalǵan jyl saıynǵy kásibı alańymyzda qýana qarsy alamyz. Qatysýshylarǵa tıimdi jeliler, sapaly mazmunda biregeı keıster men eń ózekti aqparattar berildi», deıdi «Eco Network» negizin qalaýshy Evgenıı Muhamedjanov.
Atalǵan forýmǵa «Halyqaralyq jasyl tehnologııalar jáne ınvestısııalyq jobalar ortalyǵy» KEAQ basqarma tóraǵasynyń mindetin atqarýshysy Dıdar Qarymsaqov, «ESG Officer KASE» kompanııasynan Madına Qasymbaeva, «KazakhTourism» ulttyq kompanııasynyń basqarma tóraǵasy Qaırat Sádýaqasov, «EQDB geff» jasyl qarjylandyrý baǵdarlamasy basshysynyń orynbasary Ekaterına Karseva jáne Qazaqstannyń qurmetti ekology ári «ESG-Lab» quryltaıshysy Sergeı Soı qatysyp, biraz máseleni talqylaǵany bar.
«Eko-Dırektorlar Meet-up» formatynda bilim berý-aqparattyq modýl mańyzdy keısterdi taldaýǵa arnalǵan. ESG, jasyl qarjylandyrý, energııa kózderiniń tıimdiligi men jasyl sheshimderdi sýbsıdııalaý. «Jasyl startaptar» pıtchınginde «GreenTech, CleanTech, ClimateTech» salasyndaǵy úzdik ınnovasııalyq ázirlemeler qaraldy. Konkýrs jeńimpazdaryna óz startaptaryn iske asyrý úshin konsýltasııalyq jáne tálimgerlik kómek pen 1 mln teńge júlde belgilengen.
Atalǵan shara osydan bes jyl buryn ońtústik astanadaǵy qala turǵyndary men bıznes ókilderi úshin dıalog alańy retinde quryldy. «USAID» kásipkerlikti jáne bıznes-ortany damytý jobasy – «City Experiment Fund» óńirlik jobasy sheńberinde, Sergek group, Home Credit Bank, BUUDB, Astana Hub, KazakhTourism, igtic, Most bıznes-ınkýbatorynyń qoldaýymen iske qosylǵan edi. 2018 jyldan bastap «Eco Network» kompanııasy ESG, eko-bokstardy ornatý, bólek jınalǵan qaldyqtardy shyǵarý, statıstıka men taldaýdy júrgizý qaǵıdattaryna oqytý arqyly elimizdegi kompanııalardyń jańa HR-brendi, eko-ımıdjin damytýǵa jáne qalyptastyrýǵa baǵyttalǵandyǵyn aıtýǵa bolady. USAID – Ortalyq Azııa elderimen birlese áleýmettik jáne ekonomıkalyq ál-aýqatty qamtamasyz etýge járdemdesetin Amerıkanyń jetekshi úkimettik agenttigi.