Qytaıǵa barǵan qazaqstandyqtarǵa endi qolma-qol aqsha nemese kartany alyp júrýdiń qajeti joq. Qytaı aýmaǵyndaǵy dúkender, kafeler, taksı jáne basqa da 80 mıllıonnan astam saýda, qyzmet kórsetý núktelerde Kaspi.kz sýperqosymshasy arqyly QR kodpen tóleýge bolady, dep jazady Egemen.kz.
«Qytaıda jumys isteıtin, oqıtyn jáne demalatyn qazaqtar óte kóp. Biz súıikti tutynýshylarymyzdan shetelde tólem jasaý óz elimizdegideı ońaı bolsa degen pikirdi jıi alamyz. Sondyqtan biz AliPay+ kompanııasymen seriktestik ornatyp, árbir qazaqstandyq úshin jańa qyzmetti iske qostyq. Endi Kaspi.kz mobıldi sýperqosymshasynyń kómegimen Qytaıdyń túkpir-túkpirindegi saýda núktelerinde kez kelgen taýar aqysyn tóleýge bolady. Biz seriktesimiz AliPay+ seriktestik úshin, al súıikti klıentterimizge - bizben birge bolǵany úshin alǵys aıtamyz!», dedi Kaspi.kz basshysy jáne negizin qalaýshylardyń biri Mıhaıl Lomtadze.
Qytaıdaǵy Ant International bas dırektory Venesııa Lı atalǵan seriktestik eki el arasyndaǵy saıahat pen satyp alý sapasyna oń áserin tıgizedi dep sanaıdy.
«Alipay + Kaspi.kz-ti paıdalanýshylardyń kóbi úshin Qytaıdyń materık bóligindegi mobıldi tólemderdiń kedergisiz prosesin qamtamasyz etý úshin, bizdiń tuńǵysh jáne Qazaqstandaǵy jetekshi úzdik Kaspi.kz qosymshasymen seriktestik ornatqanyn qýana jarııalaıdy. Bul seriktestik Kaspi.kz-ti paıdalanýshylar úshin saıahat pen satyp alý sapasyn jaqsartady. Biz saıahat, saýda jáne kommersııa arqyly adamdar men qaýymdastyqtardy jaqyndastyrý úshin ınnovasııalyq tehnologııalarymyzdy damytýdy, qyzmet kórsetý sapasyn jaqsartýdy jalǵastyra bermekpiz», dedi ol.
Satyp alǵan zattyń aqysyn tóleý úshin Kaspi.kz qosymshasyn ashyp, AliPay+ qyzmetin tańdap, satýshyǵa QR kodty skanerleýge múmkindik berseńiz bolǵany. Nemese satýshynyń QR kodyn skanerleýge bolady.
Kaspi QR kómegimen Qytaıda satyp alǵan zat aqysyn qalaı tóleýge bolatyny týraly tolyǵyraq Kaspi.kz mobıldi qosymshasyndaǵy Gıd bóliminen bilýge bolady.