Almaty oblysy ákiminiń baspasóz qyzmeti Ankara qalasynda kórnekti jazýshy, balalar ádebıetiniń báıteregi Berdibek Soqpaqbaevtyń 100 jyldyq mereıtoıy shymyldyq ashqany týraly habarlady, dep jazady Egemen.kz.
«TÚRKSOI» halyqaralyq uıymynyń bas hatshysy Sultan Raevtyń qoldaýymen ótken aýqymdy is-shara konferensııadan bastaý aldy. Konferensııa barysynda Qazaqstannyń Túrkııadaǵy Elshisi Erkebulan Ońalbekuly eki eldiń mádenı qarym-qatynasyn damytý deńgeıi artqanyn aıtty. Sondaı-aq Qazaqstan Jazýshylar odaǵynyń tóraǵasy Mereke Qulkenov ádebı murany baýyrlas memleketterde dáripteýdiń mańyzyna toqtaldy.
Is-sharada sóz alǵan Almaty oblysy ákiminiń birinshi orynbasary Nurlan Ábdirahym uıymdastyrýshylarǵa alǵys aıtyp, óńir basshysy Marat Eleýsizulynyń jyly lebizin jetkizdi.
«Eki eldiń arasynda mádenı yntymaqtastyqty damytý maqsatynda «TÚRKSOI» halyqaralyq uıymymen birlesken jumys jospary jasalǵan. Sonyń aıasynda qazaq ádebıetiniń klassıgi Berdibek Soqpaqbaevtyń 100 jyldyq mereıtoıy halyqaralyq deńgeıde atap ótildi. Atalǵan uıymnyń qoldaýymen mańyzdy halyqaralyq joba qolǵa alynyp otyr. Ol – Berdibek Soqpaqbaevtyń «О́lgender qaıtyp kelmeıdi» romanynyń jazylǵanyna 40 jyl tolýyna baılanysty, tamasha týyndy túrik tiline aýdaryldy. Osy ispettes ıgi sharalardyń basynan tabylǵan árbir azamatqa alǵys bildiremin», dedi oblys ákiminiń birinshi orynbasary Nurlan Erǵalıuly.
Mereıtoı aıasynda halqymyzdyń rýhanııatyna óshpes mura qaldyrǵan jazýshynyń jeke zattary, kitaptary jáne eksponattar qoıylǵan kóshpeli kórme uıymdastyryldy. Kórmede Kegen aýdandyq tarıhı-ólketaný mýzeıiniń negizgi qorynda saqtalǵan Berdibek Soqpaqbaevtyń qolshatyry, saǵaty, otbasylyq sýretteri jáne taǵy basqa da zattary kópshilik nazaryna usynyldy.
Túrkııanyń tórinde ótken mádenı-ádebı is-sharada QR eńbek sińirgen ártisi, dáýlesker kúıshi-kompozıtor Seken Turysbektiń jetekshiligimen «Aqjaýyn» kameralyq orkestri óner kórsetti. Konsertte qazaq kompozıtorlarynyń týyndylarymen qatar túrik eliniń áýezdi áýenderi men ánderi oryndaldy.
Túrik jurty qarymdy qalamgerdiń shyǵarmalarymen tanysyp, tátti kúı tyńdap, qazaqtyń mýzyka ónerin tamashalady.
Almaty oblysy