Oblys ortalyǵynyń soltústik batysynda «Jeńis» parki bar. «Taza Qazaqstan» ekologııalyq aksııasy osy parkte aıryqsha boldy. О́ıtkeni munda jastarmen qatar jastary kem degende 70-80-ge kelgen qarııalar qolyna eńbek qarýlaryn ustap, tazalyq naýqanyna óz úlesterin qosty.
«Kópten qolyma kúrek ustamap edim, tosyrqap qalyppyn. Osy kúrekti ómir boıy ustap ne qazbaǵan edik, endi, mine, az ǵana ustaǵannyń ózinde saby qoldy kúldiretip ketti. Osyndaı senbilikter jıirek bolyp tursa ǵoı, bel jazýǵa da, kúrekti jıi ustaýǵa da jaqsy bolar edi», dep kúledi aǵash otyrǵyzýǵa jer qazysqan, qalaǵa kóship kelgenine 10 jyldaı bolǵan Aqymbet aqsaqal.
Bul parktiń ózi erekshe. Munda shýly mýzyka, balalardyń attraksıondary joq, keń jolaqty joldarmen erkin tynystap, qydyryp júrýge bolatyn jaıly, tynysh meken. Naǵyz qarttar men jarym kóńildi jandardyń tynystaýyna qolaıly oryn. О́zi Esildiń bıik jarqabaǵynda, ishindegi aǵashtarymen birge ózen jaqtan taza sýdyń ıisi de ańqyp turady.
Alaıda senbilikke qarttar ǵana emes, memlekettik qyzmetkerler, bıýdjettik sala qyzmetkerleri de, jastar men qoǵamdyq uıymdar ókilderi de kóp kelgen eken. Jastar bolǵan soń ásem mýzyka únderi de jumys istep jatqandardyń kóńilin kótere túsken. Petropavl qalasy ákiminiń baspasóz hatshysy osy kúni Petropavlda birneshe tonna qoqys shyǵarylyp, 500-deı aǵash óskini otyrǵyzylǵanyn aıtty. Al oblys boıynsha 20 myń aǵash kósheti otyrǵyzylypty.
Munyń ózi Qyzyljar óńirine taǵy bir jasyl orman keldi degen sóz ǵoı. Keshe ǵana tasqynnyń sýynan úrpıisip, alańdap qalǵan jarym kóńil qyzyljarlyqtar «Taza Qazaqstan» aksııasyn qýana qarsy alǵandaı boldy. Júzderi jarqyn, daýystary ashyq. Senbilik jańa ómir, jas ómirmen baılanystyrylǵandaı. Tipti kúnniń sál salqyn, qońyrjaı bolǵanyna da eshkim qarap jatqan joq, kóńildi kúıdi ózderi týdyryp jatyr.
«Biz «Taza Qazaqstan» aksııasynyń sheńberin «Búkilqazaqstandyq aǵash otyrǵyzý» aksııasymen tolyqtyryp otyrmyz. Búgin Petropavl qalasy men aýdandardy qosqanda barlyǵy 20 myń túp kóshet otyrǵyzýdy josparladyq. Aǵashtardyń ózi ártúrli, olardyń arasynda óte sırek kezdesetin hosh ıisti aǵashtar da bolady. Árıne, kóbi – bizdiń súıikti aq qaıyńdarymyz. Petropavl qalasynyń ózinde ǵana bul jumysqa 1,5 myń adam óz erikterimen shyqty. Prezıdent Q.Toqaev 2 mlrd túp aǵash kóshetin otyrǵyzý týraly tapsyrma bergen edi. Sol tapsyrmany iske asyrý aıasynda biz jyldyń aıaǵyna deıin 38 mln túp aǵash egýdi josparladyq», deıdi oblys ákiminiń orynbasary Rústem Qurmanov.
Al Qyzyljardyń túbindegi Qyzyljar aýdanynda «Taza Qazaqstan» aksııasyna 600-den asa adam qatysty. Tasqyn sýdan eń kóp zardap shekken qamkóńil aýdannyń ózi búkileldik aksııaǵa tartynbaı qatysqan. Bul tipti qyzyljarlyqtyń jyl basynan beri shyqqan ekinshi senbiligi eken. «Taza Qazaqstan» aksııasyna oblystyq barlyq aýdandary da ún qosyp, senbilikke shyqty.