Qyzyljar óńirine aǵylǵan qaıyrymdylyq kerýeni tolastar emes. Sý tartyla bastaǵanyn bilse de, aǵaıyn halyqtyń jaǵdaıy áli tolyqtaı ornyqpaǵanyn bilip otyr. Mine, Jetisý óńirinen taǵy da 40 tonna júk jetti. Munyń bári – azyq-túlik qana emes, kúndelikti qajet basqa da zattar. Buǵan deıin jetisýlyqtar elimizdiń basqa da sý basqan óńirlerine 190 tonna júk jibergen eken.
«Qaıyrymdylyq kómegin Jetisý jurty shyn júrekten, janashyrlyqpen jiberip otyr. Igilikti iske múmkindigi shekteýli jandar da belsene atsalysty. Sondaı-aq «Ajar» tigin fabrıkasy, Qazaqstan halqy assambleıasy, qarapaıym adamdar da óz úlesin qosty. Biz osylaı birikken kezde ǵana barlyq qıyndyqty jeńip shyǵamyz», deıdi «Amanat» partııasy Jetisý oblystyq fılıalynyń tóraǵasy Arystanǵalı Aryn.
Al Almaty oblysynan «Damu Logistics» kompanııalar tobynan da 45 tonna gýmanıtarlyq kómek keldi. Onyń ishinde buqtyrylǵan et ónimderi, turmystyq hımııa, tamaq, balalar taǵamy, sý jáne basqa taýarlar bar. «Biz 50 mln teńgege kerekti zattar ákelip otyrmyz. Onyń arasynda ventılıatorlar, útikter men tósektik-oryndar bar. Kómekke muqtaj jandar resmı túrdegi taratý oryndaryna kelip, kerek zattaryn ala alady», deıdi «Damu Logistics» kompanııalar toby dırektorynyń orynbasary Arman Sháımergenov.
Jalpy, keıingi eki aptada oblysqa 1 300 tonnadan asa gýmanıtarlyq kómek keldi. Barlyǵy «Radýga» JShS qabyldaý ortalyǵyna túsirilip, suryptalǵan soń resmı taratý oryndaryna jiberiledi. Munyń úsheýi Petropavlda ornalassa, qalǵany Qyzyljar aýdanynda ashylǵan. Osy oryndarda qansha aýdannyń qansha adamy zardap shekkeni týraly tizim bar. Qaıyrymdylyq kómek soǵan sáıkes taratylady. Árbir aýdanda ákimdik tarapynan jaýapty adamdar taǵaıyndalǵan, olar kómekti naqty zardap shekkenderdiń ózine ǵana berýdi uıymdastyrady.
«Qyzyljar» AEA kótergish krandar shyǵarýmen aınalysatyn reseılik «KazKran» kompanııasy da zardap shekkenderge óziniń azdy-kóp kómegin berdi. Olar medısınalyq oryndardyń zardap shekken qyzmetkerlerine 3 mln teńgeniń qarajaty men birinshi kezekte qajetti zattaryn áperdi. Kópbeıindi oblystyq aýrýhananyń bas dárigeri Sáken Ámrınniń aıtýyna qaraǵanda, tek oblystyq aýrýhananyń biraz qyzmetkeri tasqynnan zardap shekken eken. «Sondaı jandarǵa azyq-túlik, turmystyq hımııalyq buıymdar, tósek japqyshtar, kórpe-jastyq satyp áperdik», dedi ol.
Zardap shekken áriptesterine aldymen aýrýhananyń óz qyzmetkerleri ortalarynan aqsha jınap kómek beripti. Bul qarajat turǵyn úı jaldaýǵa, dári-dármek, azyq-túlik alýǵa jumsalǵan. «Oıqala» aýdanynda turyp, tasqynnan zardap shekken Rıta Muqanova osy aýrýhanada qyzmet isteıdi. «Ujymymyzdyń basshysyna aıtar alǵysym sheksiz. Otbasymyzdyń qıyn jaǵdaıda qalǵanyn bilgen soń, ol áriptesterimniń kómegin jedel uıymdastyrdy. Eger áriptesterim aqsha jınap bermese, maǵan turǵyn úı jaldaý qıynǵa túser edi», deıdi ol.
Sýda qalǵan turǵyndarǵa qalany aýyzsýmen qamtamasyz etetin «Qyzyljar sý» kásiporny da qolynan kelgen kómegin berip jatyr. Seriktestik tasqyn sý basqan barlyq shaǵyn aýdannyń turǵyndaryn sáýir aıynyń tóleminen bosatty. Árıne, olar ózderi de aýyzsýdy osy aıdyń aldyńǵy on kúninde, evakýasııaǵa ketkenshe ǵana alǵan edi. Biraq sol on kúnniń aýyzsýy qaıyrymdylyq kómek retinde turǵyndardan alynbaıtyn boldy.
Búkil el bolyp osylaı tabıǵat apatymen kúresip jatqanda, «jaý jaǵadan alǵanda, bóri etekten tartady» degendeı, alaıaqtar da jatpaıdy. Olardyń birazy ótirik kómek tilep, aqsha jınaǵan bolsa, endi basqa qıturqylyqqa kóshýi múmkin degen áńgime shyqty. Olar evakýasııadaǵy jandarǵa jany ashyǵansyp telefon soǵyp, sizdiń zardap shegýshi ekenińizdi anyqtaý úshin SMS nómirińiz kerek deıtin kórinedi. Eger turǵyn ony berip qalsa, birden onyń atyna nesıe resimdep úlgerýi múmkin eken. Sondyqtan polısııa turǵyndarǵa jeke derekterińizdi eshkimge bermeńizder dep qulaqtandyryp júr.
Soltústik Qazaqstan oblysy