Búgin Úkimette áleýmettik mańyzy bar taýarlar men kókónis baǵasyn retteý máselesi qaraldy, dep jazady Egemen.kz.
Úkimet maýsymaralyq kezeńde kókónis baǵasynyń ósýine jol bermeý úshin О́zbekstan jáne Tájikstan jetkizýshilerimen tikeleı kelisimshart jasaý múmkindikterin pysyqtady. Saýda jáne ıntegrasııa mınıstrligine qarasty «QazTrade» AQ ózbek jáne tájik seriktesterimen tıisti sharttarǵa qol qoıdy.
Kókónis Qazaqstan naryǵyna «jasyl dáliz» arqyly jáne deldaldar men alypsatarlarsyz tıimdi baǵada tasymaldanady.
Qazaqstannyń barlyq óńiriniń qajettiligin qamtamasyz etý jáne maýsymaralyq kezeńde kókónis baǵasynyń aýytqýyn boldyrmaý úshin Premer-mınıstr kelisimsharttardy ýaqtyly bekitýdi jáne ónimniń úzdiksiz jetkizilýin qamtamasyz etýdi tapsyrdy.
Ákimdikter keminde 18,6 myń tonna kartop, 7,2 myń tonna sábiz jáne 5 myń tonna pııazǵa aldyn ala kelisimshart jasaý qajet. Qazirgi ýaqytta qolda bar qorlardan 81 myń tonna kóleminde kókónis ónimderi paıdalanýǵa berildi.
Sonymen qatar jıynda áleýmettik mańyzy bar azyq-túlik ónimderin ótkizý kezindegi talaptardyń saqtalýyn memlekettik baqylaý nátıjeleri qaraldy. Mınıstrlik jyl basynan beri múddeli organdarmen birlesip, taýarlyq ústeme baǵany asyrǵan 732 faktini anyqtap, 1 myńnan astam ákimshilik is qozǵaldy, daıyn ónimi joq 109 deldaldyń jumysyna shekteý qoıyldy.
Jalpy jyl basynan beri baǵa belgileýge áser etetin 2,5 myńnan astam tizbekke taldaý jasalyp, saýda, salyq jáne monopolııaǵa qarsy zańnamalardy buzýdyń 800-den astam táýekeli anyqtaldy. Barlyq anyqtalǵan faktiler boıynsha aqparat jedel shara qoldaný úshin ýákiletti organdarǵa joldandy.
«Baqylaý-fıskaldyq jáne quqyq qorǵaý organdaryn tartý arqyly óńirlik komıssııalardyń qyzmeti qaıta qaralyp, kúsheıtildi. Keıbir taýarlar boıynsha baǵanyń ósýi tirkelgen Jambyl jáne Abaı oblystary ákimderine olardy turaqtandyrý sharalaryn kúsheıtý kerek. Saýda mınıstrligine baǵanyń ózgerýine kún saıyn taldaý júrgizý, Aýyl sharýashylyǵy mınıstrligine naryqty otandyq ónimmen sapaly ári tolyq kólemde qamtyp, agroónerkásip kesheni salasyndaǵy óńdeý kólemin arttyrý jónindegi barlyq josparlanǵan sharalardy iske asyrý kerek», dedi Oljas Bektenov.