О́ńirde tasqynnan zardap shekkenderge arnalǵan jańa úılerdiń qurylysy bastalyp ketti. Sonyń ishinde petropavldyqtar úshin «Solnechnyı-2» shaǵyn aýdanynda bir qabatty tıptik úıler turǵyzylyp jatyr. Gazblok kirpishinen qalanyp jatqan úılerdiń qurylysy jyldam júrgiziledi. Qazir munda 400 adamdy qamtyǵan on qurylys brıgadasy jumysqa kirisken.
Qalalyq ákimdiktiń baspasóz qyzmetiniń habarlaýyna qaraǵanda, jańa úıler úsh bólmeden turady, aýdany – 80 sharshy metrden. Búgingi tańda munda barlyǵy 500 úı turǵyzý josparlanǵan. Sonyń ishinde 100 úı «Qazaqstan halqyna» qorynyń esebinen turǵyzylmaqshy. Qordan bul úılerdiń qurylysyna 2,7 mlrd teńge qarajat bólingen. Qurylysty júrgizip jatqan jumysshylar sany jaqyn kúnderde 600-ge deıin jetpekshi. Qurylysshylardyń qaramaǵynda 30-dan asa túrli tehnıka bar. Qurylys jylytý maýsymy bastalǵansha aıaqtalýǵa tıis. Barlyq úı qala ákimdiginiń balansyna beriledi.
Qalanyń ishindegi shaǵyn aýdandardyń arasynda Oıqalanyń sý astynda qalǵan úıleri 1 383 eken. Qazir bul aýdannyń biraz aýmaǵynyń sýy tartyldy. Turǵyndar ózderiniń mekenderine kelip, barynsha qıyn jaǵdaıdy kórip, jaǵa ustap jatyr. Birneshe kún terezeden joǵary turǵan sý jıhaz ataýlyny tegis búldirip, úı ishiniń ákteri men japsyrma qaǵazdaryn talqan etipti. Sýda qalǵan zattardan da joba joq. Qala ákiminiń baspasóz hatshysy Ásem Aıtulova turýǵa jaramdy úılerge mehanıkalyq brıgadalardyń adamdary kelip, jóndeý jumystaryn júrgizetinin aıtty. Alaıda jóndeý jumystary eden astyndaǵy kólkildegen sý tolyqtaı sorǵymen sorylyp, úı ábden kepkennen keıin jasalsa durys. Al qazir jasalsa, paıdasyz bolatynyn turǵyndar kórip tur. Osy shaǵyn aýdanǵa Taıynsha, Aıyrtaý, Ǵ.Músirepov aýdandarynda jasaqtalǵan mehanıkalyq brıgadalar jóndeý jumystaryn júrgizbek.
«Biz jóndeý jumystaryna birden kirispeımiz. Brıgada aldymen jaramsyz jıhazdardy, túrli qoqystardy shyǵarady. Sodan keıin edenniń taqtaılaryn qoparyp, astyndaǵy sýdy ábden qurǵatamyz. Sosyn qalpyna keltirý jumystaryna kirisemiz», dep brıgadany bastap kelgen Taıynsha aýdany ákiminiń orynbasary Erlan Amanjolov turǵyndardy tynyshtandyryp jatyr. Taıynshalyqtardyń enshisine 176 úıdi qalpyna keltirý mindeti júktelipti.
Barlyq aýdan men qalanyń ózinen qalpyna keltirý jumystaryna 100 mehanıkalyq brıgada jasaqtalǵan. Olardyń qaramaǵynda shamamen 600 adam, 140 dana tehnıka bar. Tasqyn sýy sapasyz jumystardyń da betin ashyp ketti. Normatıvtik talaptar oryndalyp, durys tyǵyzdalǵan asfalt joldary sýǵa myzǵymasa, keıbir asyǵys qalqaıta salǵan ýchaskelerdi sý shaıyp ketken.
Oblys ákimi bastaǵan top osy Oıqala, Teri zaýyty, Teplıchnyı shaǵyn aýdandaryndaǵy qalpyna keltirý jumystaryn óz kózimen kórip shyqty. Baǵalaý komıssııasy qalpyna keltirýge bolmaıdy dep qorytyndy bergen úıler jedel syrylmaqshy. Qazir aýlalar men úıdiń ishinde qalǵan sýdy sorý jumystary qyzý júrip jatyr.
Tasqynnan zardap shekkenderge kelgen qaıyrymdylyq kómekter áli de taratylyp jatyr. Kásiporyn-mekemeler ǵana emes, kóptegen qoǵamdyq uıym men shetelderden, jeke azamattardan kelgen kómekterdiń kólemi – ulan-ǵaıyr. Sonyń ishinde Qazaqstan musylmandarynyń «Zerde» qory músheleriniń uıymdastyrýymen 9 aýyr tonnalyq júk kóligi, 38 «Gazel», 1 «KamAz»
tirkemesimen, 4 «Djıp» kóligi toly 20 mln teńgedeı qarajattyń qaıyrymdylyq júgi keldi. Olardy Soltústik Qazaqstan oblysy jáne «Qyzyljar» ortalyq meshitiniń bas ımamy Hamzat Ádilbek bastaǵan meshit qyzmetkerleri 637 otbasyna úlestirdi. Sonymen qatar Shyǵys Qazaqstan oblysy men Reseıdiń Omby qalasynan kelgen 6,5 mln teńge aqshalaı qarajat 40 otbasyna teń bólinip berildi. Jaqynǵa árqashan janashyrlyq bildiretin musylman qaýymynyń kómegine halyq tánti boldy.
Soltústik Qazaqstan oblysy