Premer-mınıstrdiń orynbasary – Ulttyq ekonomıka mınıstri Nurlan Baıbazarov Astanada Dúnıejúzilik banktiń (DB) jáne Halyqaralyq qarjy korporasııasynyń (HQK) ókilderimen kezdesti.
Kezdesýge DB Ortalyq Azııa boıynsha óńirlik dırektory Tatıana Proskýrıakova, Dúnıejúzilik banktiń QR-daǵy turaqty ókili Andreı Mıhnev, Qazaqstan, Qyrǵyzstan, Tájikstan boıynsha HQK óńirlik menedjeri Zafar Hashımov jáne HQK-nyń Qazaqstandaǵy ókildiginiń basshysy Ekaterına Bendjamın qatysty.
Taraptar ekologııalyq jobalarǵa bólingen buryn qarjylandyrylǵan ınvestısııalyq jobalar men granttardyń iske asyrylý barysyn, sondaı-aq yntymaqtastyqtyń yqtımal jańa baǵyttaryn talqylady.
Nurlan Baıbazarov Dúnıejúzilik banktiń Qazaqstan atynan basqarýshysy retinde Uıymmen odan ári jumys isteýde memlekettik-jekeshelik áriptestikti damytý jáne ınfraqurylymǵa ınvestısııalar tartý máselelerine erekshe nazar aýdarýǵa nıetti ekenin atap ótti. Ol sondaı-aq el Úkimetin konsýltasııalyq qoldaý sheńberinde Dúnıejúzilik bank iske asyratyn Birlesken ekonomıkalyq zertteýler baǵdarlamasyn jalǵastyrýdyń mańyzdylyǵyna toqtaldy.
Dúnıejúzilik bank pen HQK ókilderi óz tarapynan ornyqty ári ınklıýzıvti ekonomıkany damytýǵa, ekologııalyq jaǵdaıdy jaqsartýǵa baǵyttalǵan Úkimettiń is-qımylyna qoldaý bildirip, osy baǵyttardaǵy jobalardy qaraýǵa daıyn ekenderin habarlady. Sondaı-aq Qazaqstandy Ortalyq Azııa úshin CAWEP sý-energetıkalyq baǵdarlamasyna belsendi qatysýǵa shaqyrdy. Atalǵan baǵdarlama ózgermeli klımat jaǵdaıynda óńirdiń sý-energetıkalyq qaýipsizdigin arttyrý úshin jaǵdaı jasaýǵa baǵyttalǵan.
Dúnıejúzilik bank toby turmystyq qaldyqtardy qaıta óńdeý, ınfraqurylymdy qaıta qurý, aýyl sharýashylyǵyn, sý jáne energetıka salalaryn damytý, Aral teńizin qalpyna keltirý, ǵylym men bilim berýdi damytý jónindegi jobalardy qarjylandyrýǵa múddeli. Elimiz úshin qıyn kezeńde granttyq qoldaý retinde aýqymdy sý tasqynynan keltirilgen zalaldy baǵalaýdy júrgizý usynyldy.
Nurlan Baıbazarov Qazaqstan eldiń áleýmettik-ekonomıkalyq damýyna yqpal etetin Dúnıejúzilik bank tobymen áriptestikke úlken mán beretinin aıtty. Neǵurlym tıimdi ózara is-qımyl jasaý úshin qazaqstandyq tarap qolda bar bıýrokratııalyq kedergilerdi joıýǵa nıetti. Máselen, kvazımemlekettik kompanııalar úshin halyqaralyq qarjylandyrýǵa qol jetkizý kezinde qarsy kepildikter berý jónindegi talap alynyp tastalmaq.
«Dúnıejúzilik bank toby – 30 jyldan astam ýaqyt boıy bizdiń elimiz úshin mańyzdy strategııalyq seriktesterdiń biri ári eń iri jeke kapıtal kózi. Biz seriktestiktiń qalyptasqan dástúrlerin saqtap, jańa birlesken jobalardy damytýǵa nıettimiz», dep sózin túıindedi vıse-premer.