Astana qalasynda Ortalyq Azııa elderiniń Qaýipsizdik keńesi hatshylarynyń alǵashqy otyrysy ótti. Jıynǵa Qazaqstan tarapynan Qazaqstan Respýblıkasy Qaýipsizdik keńesiniń hatshysy Ǵızat Nurdáýletov qatysty.
Is-sharada jıynǵa qatysýshylar qaýipsizdiktiń óńirlik jáne halyqaralyq ózekti máseleleri, sonyń ishinde sý-energetıkalyq jáne azyq-túlik qaýipsizdigi jóninde jan-jaqty pikir almasty.
Sóz basynda Ǵızat Nurdáýletov Ortalyq Azııa memleketteri prezıdentteriniń maqsatkerlik kúsh-jigeriniń jáne birizdi qadamdarynyń arqasynda ortaazııalyq yqpaldastyq jańa deńgeıge kóterilip otyrǵanyn atap ótti.
– Bul elderimiz arasynda ornaǵan senim, dostyq pen tatýkórshiliktiń sanǵasyrlyq dánekerin nyǵaıtýǵa degen umtylysty bildiredi. Qarym-qatynasymyzdy tereńdetýde Ortalyq Azııa memleketteri basshylarynyń konsýltatıvtik kezdesýi mańyzdy rólge ıe. Birlesken ózara is-qımyldyń bul úlgisi saýda, ónerkásiptik kooperasııa, energetıka, kólik jáne logıstıka salalaryndaǵy jan-jaqty yntymaqtastyqtyń damýyna aıtarlyqtaı serpin berdi, – dedi Qaýipsizdik keńesiniń hatshysy.
Ǵızat Nurdáýletov sondaı-aq qazirgi tańda aldaǵy tamyz aıynda Astanada bolatyn VI Sammıtti oıdaǵydaı ótkizýdiń daıyndyq jumystary qyzý júrip jatqanyn aıtyp ótti.
Budan bólek, taraptar Ortalyq Azııa elderiniń kólik qaýipsizdigi jáne kólik-logıstıka áleýetin damytý aspektilerin talqylady.
Qaýipsizdik keńesiniń hatshysy áriptesterine atalǵan máseleler boıynsha Qazaqstannyń ustanymyn jetkizdi. Transshekaralyq ózen resýrstaryn tıimdi basqarý, teń jáne ádil sý paıdalaný qaǵıdalaryna negizdelip, shoǵyrlandyrylǵan sý saıasatyn ázirleý jáne júzege asyrý, ózara mindettemelerdi múltiksiz oryndaý boıynsha yntymaqtastyqty damytý jóninde birqatar usynys engizdi.
– Geosaıası jáne geoekonomıkalyq týrbýlenttilik óńirimizdiń qaýipsizdik jaǵdaıyna teris áserin tıgizedi. Búgingi bizben bolǵan kezdesýde Qazaqstan Prezıdenti Qasym-Jomart Toqaev atap ótkendeı, Ortalyq Azııa elderi Qaýipsizdik keńesiniń hatshylary deńgeıindegi kezdesýler syrtqy jáne ishki qaýip-qaterlerge qarsy turýda kúsh-jigerdi biriktirý alańy bolýǵa baǵyttalǵan. Sonymen qatar bizdiń ózara is-qımyl formatymyz saıası jáne saýda-ekonomıkalyq yntymaqtastyqty damytýdaǵy oń dınamıkany nyǵaıtýǵa septigin tıgizbek, – degen Ǵ.Nurdáýletov osy múmkindikti paıdalanyp, elimizdegi sý tasqyny kezinde týystyq tilektestigin bildirip jáne gýmanıtarlyq kómegin kórsetken ortaazııalyq baýyrlas elderge shynaıy alǵysyn bildirdi.
Sondaı-aq ol memleketterimizdiń múddelerin eskere otyryp, búgingi kezdesýdiń kún tártibi bekitilgenin atyp ótti.
– Biz bastapqy kezeńde úsh tarmaqqa basymdyq berip, olardy júzege asyrý úshin dáıekti túrde ilgerileýge ýaǵdalastyq. Birinshi, sý-energetıkalyq qaýipsizdigi, ekinshi, azyq-túlik qaýipsizdigi, úshinshi, Ortalyq Azııa elderiniń qaýipsizdigi men kólik-logıstıkalyq áleýetin damytý. Kórsetilgen barlyq baǵyt ornyqty áleýmettik-ekonomıkalyq
damýǵa ózekti ári mańyzdy bolyp otyr. Sondyqtan olar óńirdegi strategııalyq turaqtylyqty qamtamasyz etýdi eskere otyryp, úılestirilgen salaaralyq tásilderdi talap etedi, – dedi Ǵ.Nurdáýletov.
Mańyzdy jıynda Ortalyq Azııa azyq-túlik qaýipsizdigin qamtamasyz etýdiń ortaq strategııalyq tásilderin qalyptastyrý, sondaı-aq ekonomıkalyq baılanysty nyǵaıtý maqsatynda kólik dálizderin odan ári damytý qajettigi atap ótildi.
Birinshi kezdesýdiń qorytyndysy boıynsha taraptar óńirlik qaýipsizdikti nyǵaıtý salasyndaǵy tyǵyz yntymaqtastyqty jalǵastyrýǵa daıyn ekenderin bildirdi.