Halyqaralyq Túrki mádenıeti uıymy 2024 jyldy túrki áleminiń uly aqyny, oıshyl Maqtymquly Pyraǵy jyly dep jarııalady. Aqynnyń mereıtoıy 2024-2025 jyldary IýNESKO-men birge atap ótiletin ataýly kúnder tizimine endi. Mereıtoı aıasynda Túrikmenstanda oıshyl Maqtymquly Pyraǵynyń týǵanyna 300 jyl tolýyna oraı halyqaralyq konferensııa uıymdastyryldy.
Konferensııaǵa 20 eldiń mádenıet mınıstrlerimen birge Qazaqstannyń Mádenıet jáne aqparat mınıstri Aıda Balaeva da qatysty. Aıda Balaeva quttyqtaý sózinde kúlli shyǵys áleminiń óskeleń urpaǵy men jastar úshin aqyn shyǵarmalarynyń róli mańyzdy ekenin atap ótti.
«Búgin biz qarym-qatynasymyzdyń qarqyndy damyp kele jatqanyn jáne mádenı-gýmanıtarlyq salada ózara tyńǵylyqty jumys júrgizilip jatqanyn kórip otyrmyz. Munyń bári eki el kóshbasshylarynyń kúsh-jigeri men senimdi, dostyq baılanystarynyń arqasynda ekeni sózsiz. Maqtymquly Pyraǵynyń mol murasy halyq úshin asa mańyzdy. Dostyq sımvoly, qazaq halqynyń aqynǵa jáne onyń búkil baýyrlas túrikmen halqyna degen qurmetiniń belgisi retinde el astanasynda uly oıshylǵa eskertkish ornatý úshin qajetti jumystar júrgizilip jatyr», degen mınıstr Maqtymquly Pyraǵy atyndaǵy halyqaralyq ádebı syılyqty taǵaıyndaýdy usyndy.
Aıda Balaeva áriptesterin taý tulǵalardyń shyǵarmashylyǵyn júıeli túrde nasıhattap, olardyń shyǵarmashylyǵy arqyly álemdik mádenı keńistikke shyǵýǵa shaqyrdy. Aıta keteıik, Ashhabadta túrikmen aqyny Maqtymquly Pyraǵynyń eskertkishi ashyldy.
Aqyn músini Ashhabattyń ońtústigindegi qyratta 60 metrlik monýmentaldy eskertkish túrinde turǵyzylǵan. Alyp nysannyń etegindegi jańa mádenı saıabaq kesheninde álemdik deńgeıdegi 24 tulǵanyń eskertkishi ornalasqan. Bul – rýhanı birlik rámizi.