Atyraý oblysynyń ákimdigi tasqyn sý basqan Qulsary qalasyn damytýdyń strategııalyq josparyn jasady. Oblys ákimi Serik Shápkenovtiń aıtýynsha, Jylyoı aýdanynyń ortalyǵyndaǵy Mahambet dańǵylynda ornalasqan eki qabatty 8 apatty úıdi buzý máselesi sheshimin tapqan.
Qulsaryda jergilikti turǵyndardy alańdatatyn jaıt kóp. Sonyń biri – apatty úılerdiń máselesi. Taǵy biri monoshahardaǵy Dostyq shaǵyn aýdany men 5-ýchaskeniń aralyǵyn jalǵaıtyn kópirdi jańartýǵa baılanysty týyndap otyr. О́ıtkeni bul kópirdiń tozyǵy jetken.
«Bul máseleni turǵyndar jıi kóteredi. Sol sebepten kópirdi jańartýǵa qarjy bólinip, qajetti jumys bastalady. Qulsary qalasyn damytýdyń strategııalyq jospary boıynsha barlyq jumys atqarylady. Alaıda dál qazirgi sátte birinshi kezekte turǵan mindet – cý tasqynynan zardap shekken turǵyndardyń shyǵyndaryn óteý, qalypty ómir súrýge oralýyna qolaıly jaǵdaı jasaý. Qazir barlyq kúsh turǵyn úılerge tehnıkalyq zerdeleý men baǵalaý júrgizýge baǵyttalyp otyr. Daıyn qujattardyń alǵashqy legi qolǵa tıip jatyr», dedi S.Shápkenov.
О́tken aptadan beri Qulsary qalasynda sý tasqynynan zardap shekken turǵyndardyń búlingen úıi men múlkin baǵalaý nátıjesimen tanystyrý jalǵasyp jatyr. Osyǵan baılanysty qurylǵan mobıldi toptar kúsheıtilgen rejimde jumys isteýge kóshti. Máselen, 16 mamyrda mobıldi toptardyń músheleri 100-ge jýyq turǵynǵa baǵalaý nátıjelerin tanystyrdy. Baǵalaý nátıjesimen tanysqan Qulsary qalasynyń turǵyny Gúlnur Ilııasovanyń aıtýyna qaraǵanda, úıine kirgen tasqyn sýdyń deńgeıi tereze jaqtaýyna deıin jetken.
«Úıimiz turýǵa jaramsyz bolyp qaldy. Sol sebepten úıdiń bir sharshy metrine 240 myń teńge berilse, oǵan kelisemin. Bul qarajat úıimizdi buzyp, qaıtadan salýǵa jetkilikti bolady», deıdi G.Ilııasova.
Sý tasqynynan zardap shekken taǵy bir turǵyn Kúlásh Amanbaıqyzy memlekettiń qoldaý kórsetetinine senedi. Onyń qazirgi maqsaty – sý basqan úıin tezdetip salyp alý. Sondyqtan memleket tarapynan úıimniń bir sharshy metrine 200 myń – 240 myń teńge kóleminde usynylyp otyrǵan qarjyny jetkilikti dep sanaıdy.
Al Toıǵan Qarabaevanyń úıi 5 sáýirdegi sý tasqynynyń saldarynan qulap qalǵan. Sharýashylyq maqsatta paıdalanyp otyrǵan ǵımarattar da zardap shekken. Endi ol sonyń baǵalaý nátıjesinde kórsetilgen aqshalaı ótemaqy somasyn alýǵa kelisimin berip otyr.
«Men qazir Qulsary qalasyndaǵy shaǵyn aýdandardyń birinde páter jaldap júrmin. Sondyqtan tezirek baspanaǵa qol jetkizýim qajet. Aqshalaı ótemaqyny alǵannan keıin jańadan úı salamyn nemese jańa baspana satyp alýym múmkin», deıdi T.Qarabaeva.
Zardap shekkenderdiń qatarynda Laýra Sandybaeva da bar. Ol sý tasqynyna deıin Qulsary qalasynyń «Atyraý» shaǵyn aýdanynda turǵan. Onyń da úıi 5 sáýirde sý astynda qalǵan. Keıin aýlasy qurǵatylyp, mamandar úıine tehnıkalyq baǵalaý júrgizgen.
«Meniń sý basqan úıime eki baǵalaý komıssııasy keldi. Qazir mamandardyń sý basqan úıimniń zalaly týraly qorytyndysyn kútip júrmin. Eger usynylǵan soma qajetimdi óteıtindeı deńgeıde bolsa, aqshalaı ótemaqy alýǵa kelisemin», dedi L.Sandybaeva.
Atyraý oblysynyń jedel shtabynyń málimetine súıensek, sý basqan turǵyn úı ıelerinen túsken 250 ótinish qaralǵan. Al turǵyndar baǵalaý nátıjesimen tanysqannan keıin eki kún ótken soń, memleketten kómek alýǵa Jylyoı aýdanynyń ákimdigine júgine alady.
«Memorandýmǵa sáıkes turǵyndarǵa tasqyn sýdan búlingen úıine ótemaqy tóleýge baılanysty eki nuqsa usynylady. Turǵyndar ózine yńǵaıly nusqany tańdaýy qajet. Birinshisi – zardap shekkenderdiń arnaıy nysanaly shotyna tıisti qarjyny aýdarý. Bul qarjy jańa turǵyn úı satyp alýǵa, turǵyn úı salýǵa nemese jóndeý-qalpyna keltirý jumystaryna jumsalýy kerek. Ekinshisi – jergilikti atqarýshy organnyń jobalyq úlgisi boıynsha 3 aı ishinde paıdalanýǵa berý mindettemesimen úı salý», dep málimdedi oblystyq jedel shtabtan.
Oblystyq qurylys, sáýlet jáne qala qurylysy basqarmasynyń basshysy Nurbergen Qusaıynovtyń deregine qaraǵanda, Qulsary qalasynda jańadan 150 úı salý kózdelip otyr. Qazir tıptik úlgidegi 74 úıdiń ýchaskesi belgilendi. Turǵyn úılerdiń qurylysy jaqyn arada bastalady.
«Ár úıdiń aýdany – 80 sharshy metr. Turǵyn úıler oblystyq bıýdjettiń jáne demeýshilerdiń qarajatyna salynady. Qurylysty jergilikti merdiger mekemeler júrgizedi. Jańa shaǵyn aýdan jaryq jáne sý jelisi sekildi ınjenerlik-kommýnıkasııalyq ınfraqurylymmen qamtylǵan. Endi gaz jelisi júrgizilip jatyr», dedi N.Qusaıynov.
Onyń aıtýynsha, shaǵyn aýdan aýmaǵynda 2 myń oryndyq «Binom» mektebin salý josparlanyp otyr. Sonymen qatar 300 oryndyq balabaqsha qurylysy bastalady. Sondaı-aq shaǵyn alleıalar salý josparda bar. Áleýmettik nysandardyń jobalyq-smetalyq qujattamasyn ázirleý qolǵa alyndy.
Atyraý oblysy