Bıylǵy tasqynnyń zalaly áli uzaq jyl boıy aıtylary sózsiz. Mundaı apat júzdegen jylda bir ret kelgen. Tasyǵan Esildiń sarqyraı aqqan sýy 3-4 metrlik dambany buzyp qalaǵa kirip ketkeni, birneshe shaǵyn aýdandy úsh aptadaı basyp turǵany áli talaı áńgimege arqaý bolar.
Soltústik Qazaqstan PD baspasóz qyzmetkeri Igor Mersalov osy oqıǵany baıandaıtyn kórkem pýblısıstıkalyq shyǵarmasyn bastap ketken tárizdi. Ol apat kezderinde patrýldik kezekshilikte bolǵan PD qyzmetkerleriniń bastan keshken oqıǵalaryn jazyp alyp, qazir baspasózde taratyp jatyr. Ásirese Oıqala shaǵyn aýdanynda kezekshilikte bolǵan áriptesteriniń kózben kórgenin jazyp alypty.
«Polıseıler bul aýdanda qurǵaq jerde ǵana emes, tereń sý basqan kóshelerde de quqyqtyq tártipti qamtamasyz etti. Qazir qalypty qyzmetke oralǵan tártip saqshylary qaıyqqa minip, patrýldeýden alǵan áserimen, tájirıbesimen bólisti. Sý tasqyny týraly qutqarýshylardyń, aýa raıyn boljaýshylardyń aqparatyna súıengen Petropavl qalasy polısııa basqarmasynyń basshylyǵy sýda júzý quraldaryn aldyn ala daıyndap, eskekpen ese biletin jáne motorly qaıyq júrgizýde tájirıbesi bar qyzmetkerlerdi iriktedi», deıdi ol.
Solardyń biri, patrýldik polısııa batalonynyń ınspektory Talǵat Aýǵalıev bastan keshken oqıǵasyn bylaı eske alypty: «Meniń ákem tájirıbeli balyqshy boldy. Ákemmen birge qaıyqqa minip júretinmin. Sý ústinde ózimdi qalaı ustaýdy bala kezimnen bilemin. Alaıda sý basqan kóshelerde júzýge qatty aǵys kedergi keltirdi. Ári bul óte qaýipti. 13 sáýir kúni saǵat 17.00 shamasynda úlken sýdyń Oıqala aýdanyn áp-sátte basqanyn óz kózimmen kórdim. Bul apatty eshqashan umytpaımyn. Keıde tipti túsime kiredi. Barlyq jedel qyzmetter bul ýaqytta adamdardy evakýasııalap jatty. Polıseılerge qutqarýshylardyń ózin de qutqarýǵa týra keldi. Sýdyń tez kelip qalǵany sonshalyq, olar avtokólikterimen keri burylyp úlgermegen. Kólikti bıik jerge shyǵaryp, bizdi kómekke shaqyrýǵa májbúr bolǵan. Qatty aǵysqa qarsy júze otyryp, biz olardy qaıyqpen shyǵaryp aldyq. Keıin de mundaı sátter kóp boldy. Qutqarýshylar da polıseılerge kómekke kelip, bir-birine kómektesti».
I.Mersalov basqa da áriptesteriniń bastan keshken oqıǵalaryn jazyp úlgeripti. Sonyń ishinde Jaqsylyq Baıbosynov ta bar. «Mynadaı alapat apatty buryn kórmegendikten basynda qıyn boldy. Keıin úırenip, shıraq qımyldadyq. Qalyp qoıǵan ıt pen mysyqtardy da shyǵaryp, úılerine ótý úshin TJ qyzmetinen ruqsat alǵan adamdardy jetkizip otyrdyq. Sondaı-aq sý basqan aýdanda bógde adamdardyń júrmeýin qadaǵaladyq. Keıbir kúnderi táýliktep kezekshilikte boldyq, keıin 12 saǵat saıyn aýysyp otyrdyq», dep eske alady ol.
Mine, bul da – tabıǵat apatynyń qaldyrǵan bir túıini. Al Petropavl qalasynyń ákimdigi, buryn aıtqanymyzdaı, «Solnechnyı-2» degen jańa shaǵyn aýdan turǵyzyp jatyr. Apyraı, buryn da «Solnechnyı» bar edi, mynany ekinshi demeı, jańasha, memlekettik tilde ataıyq degen usynysymyzdy ákimdik áli eskergen joq.
Jýyrda qala ákimdigi jańa salynyp jatqan úılerdi zardap shekkenderge kórsetti. Tııanaqty salynyp jatqan úıler qyzdyń jınaǵan júgindeı. Aýmaǵy – 80 sharshy metr, jer ýchaskesi – 10 sotyq. Aýlanyń ishi órnektaspen árlengen, al dýaldyń bıiktigi 2 metrge jetedi. Mundaı úılerdi tipti buryn 40 sharshy metr úıi bolǵandar da alýyna bolady. «Baqytsyzdyq bolmasa, baq kelmes edi» degen orys maqalyndaı, durys úıge qol jetkize almaı júrgen keıbireýlerdiń joly boldy. Solardyń biri Aleksandr Korchıga qýanyshyn jasyra almady: «Mynaý ádemi úıler ǵoı. Maǵan óte unady. Jylytylatyn eden tóselipti, kafel jarqyrap tur, tóbesi bıik. Úı kórnekti, jaryq, jan-jaǵynan kún túsedi, sanýzelderi ishinde. Demek men eski úıden jańa úıge kóship turmyn, qýanyshtymyn», dedi ol.
Mine, osyndaı úılerdi qonys aýdarýshylarǵa da salsa ǵoı. Jyly jaqtan keler aǵaıyndarymyz qýanyp qalar edi. О́kinishke qaraı, olarǵa degende ashyq-tesik birdeńelerdi qalap, qanshama aqshany bosqa shashyp, saqyldaǵan sary aıazda turýǵa múmkin qylmaı, kóbin qaıta kóship ketýge májbúr qyldy.
Soltústik Qazaqstan oblysy