Premer-mınıstrdiń orynbasary – Ulttyq ekonomıka mınıstri Nurlan Baıbazarov Azııa damý banki (ADB) Ortalyq jáne Batys Azııa departamentiniń bas dırektory Evgenıı Jýkovpen jáne Qazaqstandaǵy ADB ókildiginiń dırektory Ýtsav Kýmarmen kezdesý ótkizdi.
Taraptar Qazaqstan men ADB-nyń 2023-2027 jyldarǵa arnalǵan Eldik áriptestik strategııasy aıasynda odan ári yntymaqtastyqtyń basymdyqtaryn, sondaı-aq óńirlik kún tártibindegi ózekti máselelerdi talqylady.
Nurlan Baıbazarovtyń aıtýynsha, Qazaqstan ADB-men ózara árekettestikti odan ári keńeıtýge daıyn.
«Elimiz energetıka, «jasyl» ekonomıka, kólik jáne logıstıka, sý resýrstaryn basqarý salalaryndaǵy birlesken jobalardy iske asyrýǵa múddeli. Otandyq sarapshylar qatysatyn tájirıbe men bilim almasý baǵdarlamalary da biz úshin mańyzdy», dedi N.Baıbazarov.
Evgenıı Jýkov Azııa damý banki ınvestısııa arqyly eldiń ekonomıkalyq damýyna qoldaý kórsetip, memleket-jekemenshik áriptestikti ilgeriletý ári saraptama usyna otyryp, negizgi seriktes retinde Qazaqstanmen 30 jyl boıy yntymaqtasa kele jatqanyn aıtty. Uıymnyń negizgi jáne basym baǵyttardyń biri – klımattyń ózgerýiniń saldarymen jáne dekarbonızasııamen kúreste qoldaý kórsetý.
Kezdesý barysynda Qaraǵandy kópsalaly ýnıversıtet aýrýhanasynyń qurylysy boıynsha júzege asyrylyp jatqan jobanyń aǵymdaǵy jaǵdaıy, sondaı-aq ADB-nyń «Qyzylorda-Jezqazǵan» jolyn qaıta jańǵyrtýǵa qatysý máselesi talqylandy.
Nurlan Baıbazarov memlekettik organdarǵa jobalardy tıimdi iske asyrý úshin memleketishilik rásimderdi jedeldetýdi, sonymen qatar Sý resýrstary jáne ırrıgasııa mınıstrligine eldiń sý ınfraqurylymyn jańǵyrtý úderisine ADB-nyń qatysý múmkindigin talqylaýdy tapsyrdy.