Parlament senaty «Mass-medıa týraly» zańdy maquldady, dep habarlaıdy Egemen.kz.
Palatanyń Áleýmettik-mádenı damý jáne ǵylym komıtetiniń múshesi Aıgúl Qapbarovanyń aıtýynsha, bul zań jańa táýekelderdi eńserý, zaman talabyna saı medıa keńistikti qalyptastyrý úshin birqatar jaǵdaı jasaıdy.
Zańda birneshe jańashyldyq kózdelgen. Dálirek aıtqanda, memlekettik emes BAQ-qa otandyq kontentti damytý, Qazaqstannyń aqparattyq egemendigin nyǵaıtý jáne qorǵaý úshin granttyq qarjylandyrý beriledi. BAQ-ta jarııalanǵan aqparattar boıynsha jeke nemese zańdy tulǵalardyń talap qoıý merzimi bir jyl bolyp belgilendi.
«Memlekettik tildegi tele, radıobaǵdarlamalardyń apta saıynǵy kólemin 50%-dan 60% -ǵa deıin kezeń-kezeńimen ulǵaıtý belgilendi (2025 jyldan bastap 55%, 2027 jyldan bastap 60%). Sondaı-aq otandyq tele, radıo baǵdarlamalardyń jáne qazaqstandyq avtorlardyń/oryndaýshylardyń mýzykalyq shyǵarmalarynyń otandyq tele, radıoarnalardaǵy kólemin 50%-dan 60%-ǵa deıin kezeń-kezeńimen ulǵaıtý kózdeldi», dedi Qapbarova senattyń jalpy otyrysynda.
Al otandyq tele, radıoarnalardaǵy sheteldik baǵdarlamalardyń retranslıasııasy 20%-dan 10%-ǵa deıin azaıtylady. Buǵan qosa, BAQ suraýlaryn qaraý merzimi 7 jumys kúnnen 5 jumys kúnine deıin qysqartyldy.
Sonymen qatar sýısıd jasaý tásilderi jáne sýısıd jasaýǵa shaqyrý týraly aqparat taratýǵa tyıym salynady.
BAQ qyzmetine ózin-ózi retteýge, medıa salany damytýǵa múmkindik berý maqsatynda erikti negizde qoǵamdyq-kásiptik keńes qurýǵa jáne jýrnalısterdiń ádep kodeksin ázirleýge múmkindik beriledi. Jýrnalıstiń kásibı qyzmetiniń quqyqtyq kepildikterin qamtamasyz etý jóninde normalar engizildi.