Jańbyr seýip ótkennen keıingi jarqyraǵan ashyq kúnniń astynda úılerin sý basyp, dúnıe-múlikterinen de aıyrylyp, qamkóńil bolyp júrgen jandarǵa keshe oblys ákimi Ǵaýez Nurmuhambetov buryn «Solnechnyı-2» bolyp, endi «Birlik» atanǵan shaǵyn aýdannyń ortalyq alańynda jańa úılerdiń kiltin saltanatty jaǵdaıda tapsyrdy.
Bala-shaǵasymen birge jańa úıdiń kiltin alýǵa kelgen otbasylardyń júzderi qýanyshtan bal-bul janady. Olardy quttyqtaýǵa qalalyq ardagerler keńesiniń músheleri, volonterler, basqa da memlekettik, qoǵamdyq uıymdardan kelgen jandardyń nópiri qalyń. Árıne, qaladaǵy jýrnalıst ataýly da bul sharadan tegis qalmaǵan sııaqty. Jınalǵan halyqtyń báriniń de júzderi jadyrańqy, qýanyshty kóńilderi tasyp tur.
Jınalysty ashqan sózinde oblys ákimi Ǵ.Nurmuhambetov qurylysty qarjylandyrǵan «Qazaqstan halqyna» qorynyń basqarma tóraǵasy Bolat Jámishevke, onyń osy sharaǵa qatysyp otyrǵan ókili Lázzat Shyńǵysbaevaǵa, «Kaspi.kz» korporasııasynyń basshysy Vıacheslav Kımge, «Kazakhmys» korporasııasy dırektorlar keńesiniń tóraǵasy Edýard Ogaıǵa, «Kazminerals management» kásipornynyń basshysy Eldar Mamedovke, «OAEK» kompanııasynyń aksıoneri Sergeı Kanǵa, jumysty toqtaýsyz júrgizgen barlyq qurylys kompanııalary men olardyń jumysshylaryna jáne qonystanýshylarǵa úı jıhazy men turmystyq tehnıkany tegin bermekshi bolyp otyrǵan «ZIKSTO» zaýytynyń quryltaıshysy Sergeı Pavlıngerge alǵys aıtty. «Halqymyzdyń basyna qıyn sátter týǵanda sizder eren eńbek etip, tabıǵat apatyna ushyraǵan myńdaǵan adamnyń júregine erteńge degen senim men qýanysh otyn jaqtyńyzdar. Prezıdentimiz Qasym-Jomart Toqaev Soltústik Qazaqstanǵa kelgen saparynda «Birde-bir otbasy qoldaýsyz qalmaıdy, bárińiz de úı alasyzdar» dep turǵyndarymyzdy sendirgen edi. Mine, endi, Prezıdenttiń aıtqan sózi iske asyp, alǵashqy 53 otbasy jańa úıleriniń kiltin alyp, qýanyp otyr. Qýanyshtaryńyz qutty bolsyn!», dedi ákim.
Sonymen birge ol osy aýdanǵa barlyǵy 700-den artyq úı salynatynyn, balabaqsha, mektep, dárigerlik beket te ashylatynyn aıtty. Jańa aýdannyń atyn jańasha ataýǵa el gazeti «Egemen» birinshi bolyp, birden kóńil aýdarǵan edi. Bizdiń de tilegimiz qabyl bolyp, jańa aýdan «Birlik» atanǵanyn joǵaryda aıttyq. Saltanatty sharada sóz sóılegen «Qazaqstan halqyna» qorynyń ókili Lázzat Shyńǵysbaeva 100 úıdiń qurylysyna birden qarajat bólgenderin aıta kelip, ony qaıda salasyzdar degende jergilikti bılik osy jerdi kórsetkenderin eske aldy. «Onda bul jer bos jatqan dala edi. Abyroı bolǵanda, kommýnaldyq júıeler tartylǵan eken. Basqa tirlikten esh habar bolmaǵan. Sodan bergi 1,5 jarym aıdyń ishinde ǵana mynadaı kent boı kóteripti. Úıler qandaı sándi, tamasha. Qalaı qýanbassyń? Biz birge bolsaq almaıtyn qamalymyz joq eken ǵoı», dep jalyndy sózder aıtty.
Jańa qonysqa túskenderge 700 mln teńge qarajat bólip, otbasylyq tehnıka men jıhazdar syılaǵan «ZIKSTO» zaýytynyń bas dırektory Konstantın Igýmnov halyqtyń basyna túsken qıyndyqty bólisýge ózderiniń asyqqandaryn aıtty. «Ár adamnyń qasireti barsha azamattyń qaıǵysy bolý kerek. «Biz birgemiz» degen urandy bárimiz de júregimizge túıýimiz qajet», dedi ol óziniń sózinde.
Úı alǵandardyń arasynan otbasy múshelerimen, sonyń ishinde kishkentaı nemeresimen kelip, kilt alǵan Birlik Baekın sóz aldy. Mıkrofonǵa barǵany sol edi, eki kózine jas úıirilip, tamaǵy da bitelip qalǵandaı, sóıleı almaı qaldy. Biz onyń kóńil kúıiniń neden sonshalyq buzylǵanyn suraǵan edik: «Endi qaıteıin, úıimizdi sý basyp, ómir-boıy tirnektep jınaǵan dúnıe-múlikterimiz sýda qalǵanda, bul dúnıede jetimsirep, sorly bolyp qalǵandaı qaıǵyrdyq. Qaıda bararymyzdy bilmedik. Kózimizden jasymyz da shyǵyp ketken kúnder boldy. Sol ýaqytta Prezıdentimiz bizdiń qasymyzdan tabylyp, «eshqaısyńyz da qoldaýsyz qalmaısyzdar, bárińizge de úı beremiz» dep úmit otyn jaǵyp ketti. Degenmen ol úı qashan bitedi, qaı ýaqytta kiremiz dep alańdap júrgen edik. Mine, endi, búgin sonyń kiltin alyp, tóbemiz kókke jetkendeı bolyp turmyz. Sol qýanyshtan ǵoı kózime jas kelgeni. Bizdi qıyn jaǵdaıda tastamaǵan Prezıdentimizge, onyń tapsyrmasyn buljytpaı oryndaǵan ákimdikke aıtar alǵysym sheksiz», dedi ol.
Birlik Baekınniń ózi TJD ardageri, qazir zeınettegi azamat. Áıeli oblystyq ádistemelik ortalyqta jumys isteıtin kórinedi. Bes balasy bar, kishisi 3-synypta oqıdy. 2007 jyly óz kúshimen, nesıe ala júrip Oıqala shaǵyn aýdanynda úı turǵyzyp alǵan eken. Sonyń bári sýda qalypty. «Jıhazdardan da joba qalmady, eshteńe alyp ta úlgere almaǵan edik», dedi ol.
Úı alǵandardyń biri – Iýrıı Týchınniń otbasy. О́zi «Zertteý» mekemesinde júrgizýshi, al kelinshegi saýda salasynda qyzmet isteıdi. Eki balasy bar onyń otbasy osy kúnge deıin páter jaldap kelipti. «Bizdiń úıimiz «Teri zaýyty shaǵyn aýdanynda edi. Úıge kirgen tasqyn sý bárin búldirip ketti. Komıssııa ony qalpyna keltirý múmkin emes dep sheshti. Biz báribir, sońǵy kezde sol dymqyl úıde turyp kelgen edik, endi, mine, jaryq, jańa, jarqyraǵan baspanaǵa kelip otyrmyz. Prezıdentke, ákimdikke aıtar alǵysymyz sheksiz», dedi ol.
Qýanyshtan kózine jas alǵan kilt alýshylardyń biri – Svetlana Rasshepkına boldy. «Bizdiń burynǵy úıimiz nashar, eski edi. Endi sý jańa úıge qonystanǵaly turmyz, qýanyshymyzda shek joq», dedi ol kóziniń jasyn súrtip turyp. Kilt alǵan Sabyrjan Jusypovtyń áıeli Kúlbarshyn da kózindegi qýanysh jasyn irikpedi. «Úsh balamyz bar. О́zim perınataldy ortalyqta qyzmet isteımin. Úıimiz sýda qalǵan soń qaıda bararymyzdy bilmeı, júdep-jadap qalyp edik. Endi, mine, jańa úı alyp turmyz. Qýanyshymyzda shek joq, Prezıdentke rahmet!», dedi ol.
Jańa úılerdiń ishi qyzdyń jınaǵan júgindeı. Edenge lamınat tóselgen, qabyrǵalarǵa tusqaǵazdar japsyrylǵan. Asúıdegi pesh otynmen de, gazben de jumys isteı alady. Sanýzel de jarqyrap tur. Aýladaǵy baqshalyq oryn 10 sotyq, ol eki metrge jýyq dýalmen qorshalǵan. «Endi tezirek jańa topyraq ákelip, kóń seýip kókónister otyrǵyzýymyz kerek» dep Iýrıı Týchınniń áıeli erteńgi kúnniń de qamyn oılap jatyr...
«Birlik» shaǵyn aýdanynda bolashaqta, boljam boıynsha 3 myńdaı adam turatyn kórinedi. Oblys ákimi bul jerdiń mını-qalashyqqa aınaldyrylatynyn, jańa jaıly mekteptiń qurylysy da uzamaı bastalatynyn aıtty. Osy jerde, kúndiz-túni qurylystyń basynda bolyp, uıymdastyrýshylyq qabileti jáne jigerli kúsh-qaıratymen jumysty bir kún de toqtatpaı júrgizgen oblys ákiminiń birinshi orynbasary Marat Tasmaǵanbetovtiń eńbegin de aıta ketýimiz kerek. Ony halyq ta aýzynan tastamaı aıtyp júr. Aınaldyrǵan 5 aptanyń ishinde osynsha úı turǵyzý jigerli basshynyń arqasy ekenin de bilgen durys. Sáýir aıynda búkil Qyzyljar qalasynyń ózi sýsyz qalǵanda «Pestroe» kólinen 2 kúnniń ishinde 900 metrlik qubyr tartqyzǵan da osy Marat Tasmaǵanbetov edi.
Apattyń álegi isti eren qaıratpen uıymdastyra alatyn naǵyz isker jandardy da tanytyp otyr. Sóıtip, 6 maýsym Soltústik Qazaqstan oblysynyń tarıhynda halyqty qýanyshqa keneltken bir kún retinde tirkeletin boldy.
Soltústik Qazaqstan oblysy