Almaty oblysynda ótip jatqan Azııa chempıonaty qarsańynda Teńge ilýden halyqaralyq federasııa quryldy. Federasııanyń quramynda Qazaqstan, Qytaı, Mońǵolııa, Vengrııa elderiniń ulttyq federasııalary bar, dep habarlaıdy Egemen.kz Ulttyq sport qaýymdastyǵynyń baspasóz qyzmetine silteme jasap.
Halyqaralyq federasııanyń basshysy bolyp kásipker, Teńge ilý respýblıkalyq federasııasynyń prezıdenti Amangeldi Ábdiqadyrov saılandy. Al atqarýshy dırektor bolyp Aıbek Túrkebaı bekitildi. Jańadan qurylǵan federasııanyń vıse-prezıdenti bolyp Qytaı ókili Jı Jııaýın taǵaıyndaldy. Negizin qalaǵandardyń qataryna Vengrııa etnosport federasııa prezıdenti Attıla Hottak, Monǵolııa Ulttyq sport qaýymdastyǵynyń prezıdenti Rom Aýeshan kirdi. Arnaıy uıymdastyrylǵan konferensııada teńge ilý sportynyń ortaq erejesi qabyldanyp, bolashaq jospary talqylandy.
Jıyn barysynda Teńge ilý respýblıkalyq federasııasynyń prezıdenti Amangeldi Ábdiqadyrov atqarylǵan jumystarǵa toqtalyp, aldaǵy jumys josparymen tanystyrdy.
«Qazir kúzde elimizde ótetin 5-shi Dúnıejúzilik kóshpeliler oıyndaryna qarqyndy daıyndyq jumystary jáne oǵan qatysatyn sportshylardy irikteý júrip jatyr. Osy dúbirli dodaǵa tyńǵylyqty daıyndalý úshin ulttyq qurama aı saıyn oqý-jattyǵý jıyndaryna qatysýda. Sonymen qatar sáýirde teńge ilýden Azııa kýbogk ótse, búgin Azııa chempıonaty bastalady. Oqý-jattyǵý jıyndary tamyz, qyrkúıek aılarynda da jalǵasyp, osy jıynda DKO-na qatysatyn ulttyq qurama jasaqtalady», dedi federasııa basshysy.
Ulttyq sport qaýymdastyǵynyń vıse-prezıdenti Tastanbek Esentaev qazir ózge memleketterde teńge ilý ulttyq sportymyzǵa degen qyzyǵýshylyq artyp kele jatqanyn atap ótti.
«Teńge ilýden Azııa federasııasynyń qurylýy ulttyq sportymyzdyń damýyna qosymsha serpin beretini anyq. Dástúrimiz ben qundylyqtarymyzdy dáripteıtin ulttyq sport túrleriniń álemge tanymal bola túsýine qyrkúıekte elordamyzda ótetin 5-shi Dúnıejúzilik kóshpeliler oıyndarynyń da zor yqpaly bolady dep oılaımyn», dedi T.Esentaev.
Qytaı eliniń ókili Jı Jııaýın óz elinde teńge ilý sportyna qoldaý da, qyzyǵýshylyq ta bar ekenin aıtty.
«Bul ulttyq sport túri – mádenı-sporttyq qarym-qatynasty nyǵaıta túsý úshin óte jaqsy qural. Aldaǵy ýaqytta teńge ilýdiń bizdiń elimizde de tanymal sport túrine aınalýy úshin jumys isteımiz», dedi ol.
«Koreıa, Jańa Zelandııa, Bangladesh, Bolgarııa sııaqty at sportymen shuǵyldanatyn kóptegen memleket teńge ilýge qyzyǵýshylyq bildirip otyr. Muny ary qaraı damytý úshin qazaq eliniń múmkindigi mol. О́ıtkeni Qazaqstannyń árbir oblysy men aýdandarynda ulttyq sport mektepteri bar. Olarda jyl saıyn ulttyq sport túrleri boıynsha jasóspirimder, jastar, eresekter arasynda túrli jarystar ótip turady», dedi Monǵolııa Ulttyq sport qaýymdastyǵynyń prezıdenti Rom Aýeshan.
Aıta keteıik, búgin Almaty oblysynda tuńǵysh ret teńge ilýden eresekter arasynda Azııa chempıonaty bastaldy. Eki kúnge jalǵasatyn chempıonatqa 10 eldiń sportshylary qatysyp jatyr. Sary qurlyq saıysynda Qazaqstan, О́zbekstan, Qyrǵyzstan, Vengrııa, Tájikstan, Túrkimenstan, Mońǵolııa, Qytaı, Aýǵanstan, Reseı sportshylary baq synaıdy.
Eske sala keteıik, respýblıkalyq teńge ilý federasııasy Qazaqstan Respýblıkasy Ulttyq sport qaýymdastyǵynyń quramyna kiredi. Qaýymdastyq quramynda budan ózge báıge, kókpar, aýdaryspaq, sadaq atý, jamby atý, qusbegilik, asyq atý, «JORYQ» at sporty jáne t.b. federasııalar bar. Ulttyq sport qaýymdastyǵyn belgili kásipker, mesenat, «Altyn Qyran Foundation» Qoǵamdyq qory Qamqorshylyq keńesiniń tóraǵasy Islambek Saljanov basqarady.