Almaty qalalyq onkologııa ortalyǵynda Almaty qalalyq ákimdiginiń qoldaýymen ınteroperasııaly sáýleli terapııa júrgizýge arnalǵan LIAC 10 MEY qurylǵysy ornatyldy. Osyǵan oraı ortalyqta ıtalııalyq mamandardyń qatysýymen IOLT qoldanýǵa arnalǵan sheberlik synybyna elimizdiń qalalyq, aýdandyq, aımaqtyq onkologııalyq dıspanserlerdiń bas dárigerleri, hırýrgter men radıologtar qatysty.
Almaty qalalyq onkologııa ortalyǵynda jylyna 1500 operasııa jasalatyn bolsa, sonyń 500-i ınteroperasııalyq sáýleli terapııany qajet etedi eken. Endeshe, sáýleli terapııa búginde qaterli isik aýrýlaryn emdeýdiń eń tıimdi tásili bolyp tabylady. Osy aty jaman aýrýǵa shaldyqqandardyń 80 paıyzy sáýleli emdi qajet etetinin eskersek, sáýleli terapııa, ásirese, ókpeniń, jutqynshaqtyń, asqazan, bas pen moıyn jáne tik ishek, jatyr moıny, sút beziniń qaterli isiginde jıi qoldanylady.
Búginde IOLT nemese ınteroperasııalyq sáýleli terapııa Azııa, Eýropa men Amerıkadaǵy kóptegen klınıkalarynda paıdalanylady. Al bul tásil birinshi ret Qazaqstanda, onyń ishinde Almaty qalalyq onkologııa ortalyǵynda tuńǵysh ret qoldanylmaq. Qaterli isik aýrýlaryna shaldyqqan qala turǵyndarynyń densaýlyǵyn jaqsartýmen qatar, ómir jasyn uzartýǵa septigi mol LIAC 10 MEY qural-jabdyǵyn satyp alýǵa Almaty qalalyq ákimdigi qoldaý kórsetipti.
Almaty qalasynyń bas onkology, qalalyq onkologııa ortalyǵynyń bas dárigeri Dılıara Qaıdarovanyń aıtýynsha, bul qurylǵyny qoldaný arqyly aldaǵy ýaqytta qaterli isik aýrýlarynan bolatyn ólim-jitimdi azaıtyp, dertke shaldyqqan naýqastardyń ómir jasyn uzartýǵa qol jetkizbek. Oǵan sheteldik áriptesterimizdiń is-tájirıbeleri dálel bola alady. Osy IOLT tásilin qoldaný arqyly ıtalııalyq áriptesterimiz máselen, bir ǵana uıqy beziniń qaterli isiginen bolatyn ólim-jitimdi tómendetip, operasııadan keıingi ómir súrý múmkindikterin 8 paıyzdan 24 paıyzǵa arttyrýǵa qol jetkizgen. Bolashaqta biz de osyndaı jetistikterge qol jetkizemiz dep oılaımyz. Oǵan mamandarymyzdyń múmkindigi mol, deıdi qalanyń bas onkology.
Gúlzeınep SÁDIRQYZY,
«Egemen Qazaqstan».