Kóktem shyqqaly beri respýblıkalyq «Taza Qazaqstan» ekologııalyq aksııasy aıasynda ózimiz turatyn aýladan bastap kósheler kórikti keıipke enip, óńirimiz ózgeshe túrlene bastady. Respýblıkalyq mańyzy bar sharadan Abaı oblysy turǵyndary da shet qalǵan joq. Eki aıdyń ishinde oblystyń seksen myńǵa jýyq turǵyny aýlalardy abattandyrý, kóshet otyrǵyzyp kórkeıtý men talmaı tazalyq jumystaryn júrgizý isinde belsene boı kórsetti.
«Taza Qazaqstan» aksııasy bastalǵaly beri oblys aýmaǵyn, qalalar men eldi mekenderdi tazartý, buǵan qosymsha qoǵamdyq oryndardy qalpyna keltirý jumystaryna 3 136 uıym men arnaıy 1 807 tehnıka qatysqan. Turǵyndardyń qatysýymen 52,5 myń aýla tazalanyp, 34,1 myń tonna turmystyq qaldyq pen qoqys shyǵarylǵan. «Móldir bulaq» aptalyǵy aıasynda Aıagóz, Besqaraǵaı, Úrjar jáne jańadan qurylǵan Jańasemeı aýdandarynda ózen-kólderdi, sýburqaqtar men kanaldardy qoqystan tazartý jumystary júzege asty. Onyń ishinde 602 sý qoımasy, 66 myń tekshe metr ózen-kól sýy, 27 myń metr sýarý aryqtary, 30 sýburqaq túrlenip, óńir kelbetine jańasha keskin ústegen eken.
Jarma aýdanynda atalǵan aptalyq aıasynda «О́zen-sý – ólke ajary» is-sharasynyń nátıjesinde aýdan jurtshylyǵy 30-dan artyq ózenniń arnasy men jaǵalaýyn kúl-qoqystan aryltyp, iri ózenderdiń biri Shar ózeniniń jıegin qulpyrtýǵa kúsh salǵan. Belsene aralasqan bastamashylar men eriktiler toby ózen jaǵasyna demalýǵa baratyn aýdan turǵyndary men qonaqtaryna tabıǵatty aıalaý maqsatynda úgit-nasıhat jumystaryna jumyldyrylǵan. Al Besqaraǵaı aýdanynyń birligi bekem jastary kógaldandyrý jumystary negizinde begonııa, sınııa, gasanııa jáne barqyt sııaqty 7 800 túp kópjyldyq gúl otyrǵyzyp, aýdan ajaryn aıshyqtaýǵa atsalysty. Aıagóz aýdanynda qalany abattandyrý jáne kógaldandyrýdy kózdegen eriktiler jasaǵy 300 túp terek, 100 túp qaıyń men 200 túp shyrsha otyrǵyzyp, oıǵa alǵan jumystaryn jalǵastyrǵan. Jalpy, oblys aýmaǵynda 135,5 myń kóshet egilgen. Abaı oblysy ákimi baspasóz qyzmetiniń málimetinshe, aldaǵy ýaqytta 6 100 gektar jerge 28 mln 700 myń kóshet otyrǵyzylmaq.
Semeıde «Taza Qazaqstan» jobasyn júzege asyrý aıasynda «Qyzyl kitap» betterin paraqtaý» ekoaksııasy ótti. Onda turǵyndarǵa qorǵalatyn tabıǵı aýmaqtar men qoryqtar tanystyrylyp, qorshaǵan ortany qorǵaý baǵytyndaǵy oń bastamalar týraly dárister uıymdastyryldy.
Jalpyulttyq ekologııalyq aksııa týrızm salasynyń damýyna da birshama jol ashyp kele jatqanyn aıtýymyz kerek. Oblys boıynsha turǵyndar men meımandar kóp baratyn 239 saıabaq pen oblystaǵy jergilikti mańyzy bar 175 eskertkishtiń aýmaǵyn tazartý josparly túrde iske asyrylyp keledi.
Búgingi kúni aksııa mektepter men balabaqshalardy qosa alǵanda 938 áleýmettik nysandy, sondaı-aq 2 120 óndiristik jáne kásipkerlik nysandy qamtyǵan. Bul is-shara jyl boıy jalǵasyn taýyp, oblys halqynyń belsendiligi arqasynda aımaqtyń ajaryn kirgizý, kóshelerdi kórkeıtý, alańdardy abattandyrý isiniń ilgerileıtinine senim kámil.
Abaı oblysy