О́tken jyly Oral áýejaıynyń ushý-qoný jolaǵyna kúrdeli jóndeý júrgizildi. Eki kezeńnen turatyn bul is bıyl odan ári jalǵaspaq. Alaıda, kóp ýaqyt ótpeı-aq bitken iske synshy kóp degendeı, atqarylǵan jumystyń sapasyna kiná artýshylar da tabyldy. Atap aıtqanda, olar jańadan tóselgen ushý-qoný jolaǵynyń betonnan quıylǵanyn, bul tásil kúzgi-qysqy kezeńderde áýe kólikteriniń qozǵalys qaýipsizdigine nuqsan keltiretinin tilge tıek etti. Sonymen birge, osy pikirdi alǵa tartýshylardyń tujyrymdaýynsha, betonǵa ony qar men muzdan tazartýǵa septigin tıgizetin hımııalyq reagentter sebilgen jaǵdaıda bul faktor atalǵan materıaldyń isten tez shyǵýyna áser etpek.
Rasynda da solaı ma? Mundaı ártúrli alypqashpa pikirlerdiń anyq-qanyǵyna jetý maqsatynda ótken aptada respýblıkadaǵy Azamattyq avıasııa komıtetiniń sarapshy mamandary Oral áýejaıyndaǵy ushý-qoný jolaǵyna júrgizilgen jumystardyń sapasyn qarady. Onyń nátıjesine qatysty Investısııalar jáne damý mınıstrligi Azamattyq avıasııa komıteti tóraǵasynyń orynbasary Serik Myqtybaev BAQ ókilderine bylaı dedi.
– Ushý-qoný jolaǵyn betonmen bekemdeý álemdik tájirıbede keńinen qoldanylady. О́ıtkeni, bul óndiris ónimi aýa raıynyń kez kelgen qubylysyna tózimdi keledi. Ári uzaq ýaqytqa deıin buzylmaıdy. Sonyń ishinde mundaǵy jolaqtyń paıdalaný merzimi 15-20 jyldan kem túspeıdi. Al betonnyń hımııalyq reagentterge qatysty reaksııaǵa túsý tártibine kelsek – bul budan múldem zardap shekpeıdi. Tek bir qosarymyz munyń ózindik qoldanylý tehnologııasy men tizbesi bar. Osy tártip tolyqtaı oryndalǵan jaǵdaıda jyldyń tórt mezgilinde ushý-qoný jolaǵyn alańsyz paıdalana berýge bolady. Búgingi kúni atalǵan hımııalyq reagentterdiń tizbesi bizdiń tarapymyzdan áýejaı ıelerine jetkizildi.
Budan ári ol Oral áýejaıynda ótken jyly tóselgen ushý-qoný jolaǵy búgingi avıasııalyq qaýipsizdik talaptaryna tolyq sáıkes keledi degen túıin jasady.
Temir QUSAIYN,
«Egemen Qazaqstan».
ORAL.