19 maýsym kúni Eýrazııalyq ıntegrasııa ınstıtýtynda «Ashyq saıasat» saraptamalyq klýby «Qazaqstan óńirlerindegi ókildi bılik organdary: jumys isteý máseleleri men perspektıvalary» taqyrybynda kezekti pikirtalas ótkizdi. Oǵan ǵylymı-saraptamalyq qoǵamdastyq ókilderi, qoǵam qaıratkerleri, depýtattar qatysty, dep habarlaıdy Egemen.kz.
Sarapshylar máslıhattardyń óńirlerdegi naqty rólin, sondaı-aq olardyń qoldanystaǵy zańnama sheńberinde óz ókilettikterin qanshalyqty tıimdi iske asyratynyn jáne Qazaqstanda júrgizilgen saıası reformalardan keıingi áleýetin talqylady.
Eýrazııalyq ıntegrasııa ınstıtýtynyń basshysy Orazǵalı Selteev saıası ınstıtýttardyń is júzinde qalaı jumys isteıtinin, olardyń óńirlerdegi jumysyn odan ári reformalaý qajet ekenin atap ótti. Sondaı-aq sarapshy máslıhat depýtattarynyń jergilikti jerdegi basqarý prosesterinde passıvti ekenin aıtyp ótti.
«Rasynda qabyldanatyn basqarýshylyq sheshimderdiń sapasy máslıhattarǵa tikeleı baılanysty. Olar ákimdikterdiń jumysyna júıeli baqylaý júrgizip, sheneýnikterdiń sybaılas jemqorlyq táýekelderine jol bermeýi tıis. Sondyqtan barlyq sýbektilerdiń ókilettikteri men ózara is- qımyl reglamentteri naqty jazylatyn jergilikti ózin-ózi basqarý týraly jeke zań qabyldaý kerek», dep atap ótti Eýrazııalyq ıntegrasııa ınstıtýtynyń dırektory.
«Memleket tarıhy ınstıtýty» RMM jetekshi ǵylymı qyzmetkeri, saıasattaný ǵylymdarynyń kandıdaty Baýyrjan Sherııazdanovtyń aıtýynsha, birinshi kezekte zańnamada máslıhattar men ákimdikterdiń basqarmalar men bólimderdegi ókilettikterin naqty aıqyndaý qajet. Bul jyldam kezeń emes, munyń bárin egjeı-tegjeıli túrde oılastyryp, taldaý qajet.
Memlekettik basqarý salasyndaǵy sarapshy Sabına Sadıeva máslıhattardyń qoldanystaǵy ákimshilik rásimder men júıeler sheńberinde jumys isteıtinine nazar aýdardy. Onyń aıtýynsha, eger qalypty bıýdjettik josparlaý bolmasa, onda depýtat kóp nárse isteı almaıdy. Sondyqtan Bıýdjet kodeksin reformalaý jáne ákimshilendirý men baqylaý sapasyn arttyrý úshin nátıjelerdi baǵalaýdyń jańa júıesin ázirleý talap etiledi.
VIII shaqyrylǵan Astana qalasy máslıhatynyń depýtaty Sáýle Samıdın ákimdikterge baqylaý jáne yqpal etý tetikteriniń jetkiliksizdigin atap ótti. «Máslıhat depýtattarynyń ákimdikke áser etýiniń negizgi tetigi – bıýdjetti bekitý», dedi depýtat. Bul rette halyq qalaýlysy máslıhat depýtattarynyń bilim berý josparyn bekitý jáne aqsha qarajaty qoryn jumsaý rásimin ózgertý qajet dep sanaıdy.
Jalpy sarapshylardyń pikirinshe, máslıhattardyń baqylaý fýnksııalaryn iske asyrýdyń jańa pármendi tetikteri qajet. Talqylaýǵa shyǵarylǵan usynystardyń biri tekserý komıssııalaryn máslıhattar quramyna qaıtarý boldy. Panelge qatysýshylar bul bıýdjet shyǵyndaryn baqylaýdy jáne atqarýshy organdardyń resýrstardy tıimdi paıdalanýyn kúsheıtip, olardyń azamattar aldyndaǵy jaýapkershiligin arttyrady deıdi.
Talqylaýdyń taǵy bir mańyzdy máselesi máslıhat apparattaryn nyǵaıtý jáne keńeıtý boldy. Prezıdent janyndaǵy Qazaqstandyq strategııalyq zertteýler ınstıtýty dırektorynyń orynbasary Alýa Joldybalına atap ótkendeı, máslıhattardyń qyzmeti turaqty taldamalyq qamtamasyz etýmen qatar júrýi tıis. Parlament Májilisiniń depýtaty Nıkıta Shatalovtyń pikirinshe, máslıhattar apparatyndaǵy kómekshiler sanyn kóbeıtý esebinen óńirlerdegi depýtattyq korpýstyń quzyrettiligin arttyrý múmkindikterin qarastyrý qajet.
Sonymen qatar sarapshylar saılanǵan depýtattar sanynyń oblys, qala, aýdan halqynyń sanyna sáıkes kelmeýine jáne belgili bir aımaqtaǵy halyq qalaýlylarynyń ońtaıly quramyn anyqtaý úshin qoldanylatyn zańnamada belgilengen koeffısıentterdi qaıta qaraý qajettiligine nazar aýdardy.
Talqylaý qorytyndysy boıynsha «Ashyq saıasat» saraptamalyq klýbynyń qatysýshylary máslıhattardyń ókilettikteri men mindetterin naqty aıqyndaıtyn jáne ókildi jáne atqarýshy bılik arasyndaǵy ózara is-qımyl tártibi egjeı-tegjeıli belgilenetin jergilikti ózin-ózi basqarý týraly jeke zańdy ázirleý keregin aıtty. Mundaı zań jergilikti deńgeıde ashyq jáne túsinikti basqarý júıesin qura alady.