Bıylǵy oqý jylynda óńirimizdegi 321 mekteptiń 11-synybyn 9 236 túlek aıaqtasa, onyń 480-i «Altyn belgige», 663-i jalpy orta bilim týraly úzdik attestatqa ıe boldy. Al Aqtóbe oblysynda ulttyq biryńǵaı testileýdi tapsyrý merzimi 25 mamyrdan 11 shildege deıin jalǵasady.
Oblystyq bilim basqarmasy basshysynyń orynbasary Nurgúl Bertileýovanyń aıtýynsha, Joǵary bilim jáne ǵylym mınıstrligi sý tasqynynan zardap shekken óńirlerdiń qatarynda bolǵan Aqtóbe oblysynyń túlekteri úshin testileý merzimin 11 shildege deıin sozǵan.
«Qazir aptanyń ár kúninde test ortalyǵynda synaq ótip jatyr. Osy ýaqytqa deıin qansha túlegimiz UBT tapsyrdy, qanshasy endi tapsyrady degen suraqqa jaýap bere almaımyz. Bizge ondaı málimet túspeıdi. О́ıtkeni UBT ótkizýge ulttyq testileý ortalyǵynyń mamandary jaýapty, test tapsyrǵandarǵa qatysty barlyq derek sol jerde saqtalady. Oblystyq bilim basqarmasynyń qyzmetkerleri 2017 jylǵa deıin UBT qorytyndysy boıynsha óńirdegi mektepterdiń bilim sapasyna taldaý jasap júrdi. О́ıtkeni testileý qala mektepterinde júrgiziletin. Al, 2022 jyldan bastap testileý formaty túbegeıli ózgerip, «Bir testilenýshi – bir kompıýter – eki kamera» erejesimen tapsyrý jolǵa qoıylǵannan bastap, barlyq jaýapkershilik Ulttyq testileý ortalyǵyna júkteldi», deıdi N.Bertileýova.
Aqtóbe oblysynda eki testileý ortalyǵy ashylǵan. Biri oblys ortalyǵynda, ekinshisi – Shalqar qalasynda. О́ńirimizde mektep bitirýshilerdiń UBT-ǵa tirkelýi 6 mamyrda bastaldy. Oǵan 8 342 (barlyq mektep bitirýshilerdiń 90,2%-y) túlek eki múmkindikpen tapsyrýǵa 16 556 ótinish jazǵan. Odan ózge ótken jyldary mektep, kolledjderdi aıaqtaǵan 994 bala tolyq oqý merzimine oqýǵa, al 289 kolledj túlegi qysqartylǵan oqý merzimine bilim grantyn alýǵa ótinish jazypty. Bıylǵy ulttyq testileýde tórt pán boıynsha 120 suraq qamtylǵan: «Qazaqstan tarıhy» páninen – 20, «Oqý saýattylyǵynan» – 10, «Matematıkalyq saýattylyqtan» – 10 tapsyrma jáne túlek tańdaǵan eki beıindik pán boıynsha 40 tapsyrma júkteldi.
Aqtóbe oblysy