H.Dosmuhamedov atyndaǵy Atyraý ýnıversıtetiniń stýdentteri arheologııalyq qazbadan kóne keseneniń dromosyn tapty. Ǵalymdar bundaı nysan burynǵy zertteýlerde kezdespegendigin aıtady, dep habarlaıdy Egemen.kz.
Bıyl tarıhshy-zertteýshi mamandyǵynyń stýdentteri «Saraıshyq» mýzeı-qoryǵyndaǵy arheologııalyq qazba jumystaryna baryp qatysqan. HV-XVI ǵasyrǵa tán nysan kúıdirilgen kirpishten berik ári sándi qalanǵan. Alaıda keseneniń kúmbezi qıraǵanymen jabyq dálizi sol qalpynda saqtalǵan.
«Bundaı túrde salynǵan keseneler Saraıshyq qalasynda burynda anyqtalǵan, biraq olar qatty búlingen edi. Bul keseneniń ereksheligi dromosy tolyq saqtalýynda. Ázirge aldyn-ala boljam boıynsha belgili, qoǵamdaǵy statýsy joǵary adamdar jerlengen bolýy múmkin», deıdi arheolog Amangeldi Zaınov.
Esigi ońtústik shyǵysqa qaraǵan dromostyń uzyndyǵy 170, bıikti 60 santımetr. Bul dálizdiń jartylaı qazylǵan bóligi dedi arheolog.
Arheologtar qazba jumysyn úsh bólikke bólip júrgizgen. Birinen dálizge jalǵasqan kólemdi qabirdiń qabyrǵalary tabyldy. Anyqtalǵan qabyrǵanyń uzyndyǵy 6, bıiktigi 1 metr, qalyńdyǵy 55 santımetr. «Bul keseneni salýǵa sary jáne qyzyl kirpishter paıdalanylǵan. Sary kirpishter – Altyn orda dáýiriniń eski kirpishteri, al qyzyl kirpishter – qurylys salynarda kúıdirilip jasalǵany anyq. Bul Saraıshyqtaǵy eń sırek kezdesetin nysan», deıdi arheologııalyq qazbaǵa qatysqan stýdent Erasyl О́mirbek.
Dromostyń ońtústik bóliginen sharýashylyq bólme de anyqtalǵan. Ondaǵy qazba kezinde qysh qumyralar men túrli buıymdar jáne orta ǵasyrlyq sándik japsyrmalar, mys tıyndar tabylǵan. Arheologııalyq nysan aldaǵy ýaqytta tereń zerttelmek. Orta ǵasyrlyq qalada stýdentterdiń oqý-praktıkasyn júrgizip tyń derekterdi tabýy H.Dosmuhamedov atyndaǵy Atyraý ýnıversıteti men «Saraıshyq» mýzeı-qoryǵy arasyndaǵy eki jaqty kelisim negizinde iske asqan. Praktıka kezinde belsendi jumys istep tarıhı keseneni qazýǵa atsalysqan 19 stýdentti mýzeı-qoryq basshylyǵy alǵys hattarmen marapattady.