Qańtar aıynyń qysqa kúniniń birinde Jańaqala aýdanyndaǵy Jańaqazan aýyldyq okrýgi ákimdigine shalǵaıdaǵy qystaqtan eki qyzdyń adasyp ketkeni týraly shuǵyl habar tústi.
Okrýg ortalyǵynan 50 shaqyrym qashyqtyqtaǵy qystaqta otyrǵan malshy Amangeldi Meńdiǵalıev tús kezinde óziniń jeke kóligimen joǵalyp ketken malyn izdeýge shyǵady. Qasyna joǵary synypta oqıtyn qyzy men onyń qurbysyn otyrǵyzyp alady. Mundaǵy oıy alystan qaraıyp kóringen maldy kórýge olardy paıdalaný eken. Olar qysqy mal ornynan alty-jeti shaqyrym uzaǵan kezde kóliktiń tegershigi jarylady. Amangeldi ony aýystyratyn quraly úıde qalyp qoıǵanyn osy kezde baıqaıdy. Degenmen, dóńgelekti retteýge kirisip ketedi. Onyń qapelimde aıaqtalmaıtynyn baıqaǵan eki qyz osy kezde úıge jaıaý júre bergendi jón kóredi. Bul kúndizgi kez eken.
Budan keıin biraz ýaqyt ótken soń avtokóligin júrgize almaıtynyna kózi jetken Amangeldi de jaıaýlap úıin betke alady. Ol keshki saǵat toǵyzdyń shamasynda qystaqqa kelgende eki qyzdyń kelmegenin bilip, osy sátte zaıyby ekeýiniń záresi ushady. Otaǵasy budan soń úıge kirmesten qaıtadan qyzdardy izdeýge ketedi. Onyń artynan baldyzy da túıege minip kómekke keledi. Okrýg ákimine habar beriledi. Ol habardy alysymen jolǵa shyǵady. Jer jaǵdaıyna jetik aýyl ákimi S.Ǵubashev qumnan kisi izdeý shóp arasynan ıne izdeýmen birdeı ekenin eskerip, shuǵyl qumǵa júre alatyn tórt kólikpen oqıǵa ornyna jetedi.
Bul kezde saǵattyń tili túngi on ekiden asyp ketken edi. Kózge túrtse kórgisiz qarańǵy túnde ottyń alystan kórinetinin eskergen aýyl ákimi taılanǵan shópti bıik shoqa ústine shyǵaryp jaǵyp aınala kólik jaryǵyn túsirip otyrýdy qajet dep tabady. Sóıtip, tórt kólik osylaısha iz kesip, qum arasyn sharlaýǵa kirisedi. Qysqasy, kelesi kúnge aýysqan saǵat túngi eki shamasynda on úsh saǵat boıy dalada adasqan eki qyz aman-esen tabylady.
– Qum ishinde qarańǵylyq erte túsedi ǵoı. Ásirese, qys kezinde. Adasqanymyzdy bildik. Alaıda sonyń ózinde qorqynysh pen úreıge boı aldyra qoıǵan joqpyz. Bir kezde júrip kele jatyp tereń shuńqyrǵa tap boldyq.Soǵan túsip demaldyq. Shuńqyrdyń ishinde shóp bar eken. Birimiz uıyqtap ta aldyq. Qatty tońa qoıǵan joqpyz. Izdep tapqandaryńyzǵa alǵysymyz sheksiz, – deıdi qyzdar.
О́mirzaq AQBASOV,
jýrnalıst.
Batys Qazaqstan oblysy,
Jańaqala aýdany.