Sáken Seıfýllın atyndaǵy oblystyq akademııalyq qazaq drama teatry 92-maýsymyn Ǵabıt Músirepovtiń áıgili klassıkalyq týyndysy «Qyz Jibek» mýzykalyq dramasymen aıaqtady. О́ner shańyraǵynyń janynan qurylǵan qýyrshaq trýppasy óziniń alǵashqy maýsymjabaryn sátti ótkerdi. Munymen qosa, teatr men oblystyq «Saryarqa» telearnasy memorandýmǵa qol qoıdy. Endi ár qoıylym arnanyń altyn qorynda saqtalady.
Qýyrshaq trýppasynyń ashylǵanyna bir jyl ýaqyt endi ǵana boldy. Degenmen az ýaqyt ishinde jańadan qurylǵan jap-jas ujym «Qarlyǵashtyń quıryǵy nege aıyr?» ertegisimen Omandaǵy halyqaralyq qýyrshaq teatrlarynyń festıvaline qatysyp qaıtty. Rejısseri – Aıdyn Salban. «Kerik penen múıiztumsyq», «Oıynshyqtar oıanǵanda» degen sekildi túrli qoıylym balalar nazaryna usynyldy. Qýyrshaq trýppasy alǵashqy maýsymyn Shyǵys halyqtary ertegisiniń jelisimen jazylǵan «Álı baba jáne qyryq qaraqshy» qýyrshaq qoıylymymen aıaqtady. Qoıýshy rejısser – Anton Zaısev.
Qýyrshaq teatrymen tize qosyp jumys istegen «Total fest» teatr festıvaliniń dırektory, qoıýshy rejısser Anton Zaısev qaraǵandylyq ujymnyń shyǵarmashylyq qabiletine joǵary baǵa berdi. Sonymen qatar ol teatrda kórkem týyndylardy sahnalaýǵa barlyq jaǵdaıdyń baryna rızashylyǵyn jetkizdi.
«Jas ujymmen bir aı jumys istedim. Sáken teatry birshama jetistikke jetken ekensizder. Akter oıny meni tańǵaldyrdy. Jumys isteýge óte qolaıly. Ásirese akterlik quramnyń basym bóligi jastar ekenin kórgenimde, óner shańyraǵynyń bolashaǵy jarqyn ekenine kózim jetti. Jetken jetistikterge masattanbaı, odan ári izdenetin talanttar zor qurmetke laıyq. Qýyrshaq teatryn ashyp, sonyń repertýaryn toltyrý, akterlerdi jasaqtaý, olardy daıarlaý – áste ońaı sharýa emes. Bul kóp eńbekti talap etedi. Bolashaqty tárbıeleý jolynda qýyrshaq teatrynyń mańyzy zor ekenin atap ótkim keledi. Kórermenniń ár sanatyn qamtı alatyn teatrdan úmit kútýge bolady», deıdi Anton Zaısev.
92-maýsymjabardyń tarıhı sáti – memorandýmǵa qol qoıyldy. Oblystyq «Saryarqa» telearnasymen jasalǵan ortaq memorandýmnyń aıasynda telearna Sáken teatrynyń premeralyq qoıylymdarynan tikeleı translıasııa jasaıdy. Oǵan qosa, repertýardaǵy barlyq spektakl Altyn qorda saqtalady.
«Qor kez kelgen eldiń mádenıeti men tarıhy úshin asa mańyzdy. Buny eldiń jady desek te bolady. Oblystyq «Saryarqa» telearnasynyń qory – oblystyq arnalardyń ishindegi eń úlken qor. Irgemizde turǵan teatrdyń sahnasyndaǵy ár qoıylym – erteńgi tarıh. Osyndaǵy ár akter erteńgi tulǵa dep senemin», deıdi telearna dırektory Berik Dúısetaev.
Sáken teatrynyń endigi alǵa qoıǵan maqsaty – mýzykalyq drama teatry mártebesine qol jetkizý. Sol úshin de teatr ujymy «Qyz Jibek» qoıylymyn mýzykalyq drama retinde sahnalady.
Ataqty «Qyz Jibek» mýzykalyq dramasyn tamashalaýǵa kelgen kórermenniń qarasy qalyń boldy.
Teatrdyń mártebeli kórermenderi bul joly qara shańyraq akterleriniń jańa qyryna kóz jetkizdi. Akterlerdiń asqaqtata salǵan ánderi qoıylymnyń sán-saltanatyn kelistirdi.
«Sáken teatrynda umytylmas kún, úlken oqıǵa. Qazaq dramatýrgııasynyń jaýhary «Qyz Jibek» mýzykalyq dramasynyń premerasy sahnalandy. «Qyz Jibek» osydan týra toqsan jyl buryn jazylyp, sahnalanǵany týraly az-kem bilýshi edik. Sodan bergi ýaqytta elimizdiń óńirlik teatrlarynda áredik qoıylyp keledi, árıne. Biraq jıi emes, sırek sahnalanady. Sebebi shoqtyǵy bıik shyrqaý shyǵarma. Árkimniń júregi daýalap bara bermeıtin dúr drama. Kózkórgenderdiń aıtýynsha, Qaraǵandy teatrynda ótken ǵasyrdyń orta tusynda bul spektakldi Múlik Súrtibaev, Jámılá Shashkına syndy sahna sańlaqtary somdapty. Odan bergi ýaqytta túrli sebeppen qoıylmaı kelgen eken. Sol olqylyqtyń orny toldy. Sáken sahnasynda Tólegen bolyp tolqydyq, Qyz Jibekpen qosa qýanyp, qatar qaıǵyrdyq. Shegeniń shyrqaı salǵan arııasyn aıyzymyz qanyp tyńdadyq. Qysqasy, teatrdyń ádemi álemine, tuńǵıyq tereńine súńgidik. Lıro-epostyq jyrdyń oqıǵasy teatrdyń Ult aspaptary jáne sımfonııalyq aspaptar orkestriniń súıemeldeýimen ártisterimizdiń oryndaýyndaǵy án-kúı, mýzykamen órildi. Dırıjer Ábilqaıyr Saǵymbaevqa, qoıýshy-rejısser Aıdyn Salbanǵa jáne barsha teatr ujymyna zor alǵysymdy bildiremin. Jańa maýsymǵa jaqsy demalyp, jańa ıdeıalarmen kelýlerińizge tilektespin», dedi oblys ákiminiń orynbasary Erlan Qusaıyn.
Osylaısha, Sáken teatrynyń jańalyǵy bolǵan mýzykalyq qoıylymnyń shymyldyǵy, teatrdyń maýsymy jabyldy. Kórermen qımaı-qımaı qoshemet kórsetti.
Qaraǵandy oblysy