Jýyrda Soltústik Qazaqstan oblystyq polısııa departamenti ákimdiktiń, jol qyzmetkerleri men múddeli uıymdardyń ókilderin qatystyra otyryp, barlyq jol ınfraqurylymyn tekserý barysynda 4 myńnan artyq aqaý tapty. Tekseriske qatysqandar jóndeý jumystaryn ýaqtyly júrgizýden, jol belgilerin ornatýdan basqa jol-kólik oqıǵalarynyń aldyn alýdyń tehnıkalyq quraldaryn qoldaný taqyrybyn da kóterdi.
Oblystyq polısııa departamenti (PD) basshysynyń birinshi orynbasary, polısııa polkovnıgi Qurmanǵalı Ismaǵulovtyń bastamasymen joldardyń qaýipti ýchaskelerinde avtokólik júrgizýshileriniń nazaryn aýdaratyn kún batareıalarymen jumys isteıtin stroboskoptardy jáne eldi mekenderdiń aýmaǵy arqyly ótetin ýchaskelerdegi júrgizýshilerge kólik jyldamdyǵy týraly habarlaıtyn profılaktıkalyq jyldamdyq ólshegishterdi ornatý máselesi pysyqtaldy. «Anyqtalǵan barlyq 4 211 jol aqaýy boıynsha kemshilikterdi joıý úshin kommýnaldyq organ ókilderine 975 nusqama berildi», deıdi PD ákimshilik polısııa basqarmasynyń bastyǵy, polısııa podpolkovnıgi Serik Áljanov.
Polısııa kórgen aqaýlarǵa halyq ta kúnde kezdesip, narazylyqtaryn bildirip almaı júredi. Qala kóshelerindegi joldardyń aqaýy, tereń shuqanaqtar saldarynan kóliktiń óz jolaǵynan shyǵyp ketip, qarsy kele jatqandarmen qaqtyǵysyp qalý oqıǵasy da jıi týyndaıdy. Mysaly, Petropavl qalasynyń qaq ortasyndaǵy Pýshkın kóshesiniń osyndaı jaǵdaıda turǵanyna jyldan asty. Respýblıkalyq, oblystyq, aýdandyq joldardyń da kóbi máz emes. Al jol qurylysy men jóndeý jumystaryn júrgizetin mekeme basshylaryn tyńdasaq, bári jap-jaqsy. Aıtylǵan sóz, jazylǵan qaǵazdyń bári tap-tuınaqtaı.
Taıaýda oblystyq ákimdikte osy máselege arnalǵan otyrys bolyp, onda oblys ákimdiginiń Jolaýshylar kóligi jáne avtomobıl joldary basqarmasynyń basshysy Erden Shortybaevtyń baıandamasynan sony kórdik. Onyń aıtýynsha, jalpy uzyndyǵy 6,4 myń shaqyrym bolatyn oblystyq jáne aýdandyq mańyzy bar joldar men Petropavl qalasy jáne basqa da eldi mekenderdiń ishki joldaryn jóndeýge 43,8 mlrd teńge bólingen.
«Osy bólingen qarajattyń esebinen 145 jóndeý jobasy iske asyrylyp jatyr. Sonyń 16-sy – oblystyq, 49-y – aýdandyq mańyzy bar joldar. Petropavl qalasynyń ishki joldaryn jóndeý boıynsha 23, qalǵan eldi mekenderdiń ishki joldary boıynsha 57 joba bastaldy. Búginge deıin uzyndyǵy 150 shaqyrymdy quraıtyn 21 jol jóndeý jobasy aıaqtaldy», dedi ol.
Odan ári E.Shortybaev iske asyrylyp jatqan jobalardyń árqaısyna toqtalyp, olardyń qandaı deńgeıde ekenin baıan etti. Joldardy buzatyn asa aýyr salmaqty júk tasıtyn kólikter ekeni, búginge deıin oblysta aýyr salmaqty 7 494 avtomobıl tirkelgeni aıtyldy. Alaıda bulardy esepke alynyp, júk salmaǵy shektelgenimen, tranzıtpen ótetin sheteldik kólikterge basqarma baqylaý ornata almaıdy. Ondaı jumystardy oblystaǵy Kólik baqylaýy ınspeksııasy atqarady. Onyń basshysy Abylaı Qazbaev baıandamasynda oblys aýmaǵynda kólik baqylaýyn jasaıtyn úsh-aq jyljymaly beket bar ekenin, onyń da ekeýi byltyr alynǵanyn jetkizdi.
Bireýi shekaradaǵy «Jańajol» ótkizý beketine qoıylyp, kúndiz-túni el aýmaǵyna engen sheteldik kólikterdi baqylaıdy. Al oblys aýmaǵyndaǵy respýblıkalyq, oblystyq, aýdandyq joldardan turatyn 9 myń shaqyrym joldy qalǵan eki jyljymaly beket baqylaýǵa alǵan. Bıyl barlyǵy 2 095 avtomobıl tekserilgen, sonyń 1 546-sy – sheteldik kólik. Jyl basynan beri el joldarynda júk tasymaldaý tártibin buzǵan 475 júrgizýshige ákimshilik is qozǵalyp, 49 mln teńge aıyppul salynǵan. Biraq mundaı sharadan jol sapasy jaqsarmasy belgili.
«Elimizde ruqsat etiletin salmaqtan aýyr júk artatyn mashınalardyń bári derlik – ınertti materıaldar tasıtyn, Qytaıdan shyqqan kólikter. Olardyń aýyr júk artýy karerlerden bastalady. Sondyqtan merdigerlerdiń jumysqa kirisýine ruqsat beretin kelisimsharttarda tasymaldanatyn júk salmaǵy belgilengen normadan aspaýy qatań talap etilip, jazylýy kerek», dedi Abylaı Qazbaev.
Kúnniń ystyǵynda bosaǵan asfalt joldar barynsha ezilip, aýyr júkterge shydas bere almaıdy. Sondyqtan kóliktiń beldigine túsetin salmaqtyń normasyn azaıta túsken durys sııaqty. Bul máselege oblysqa kelgen jumys saparynda Premer-mınıstr Oljas Bektenov te nazar aýdaryp, aýyr salmaqty júkter tasıtyn kólikterdi qatań baqylaý qajettigin tapsyrǵan. Ondaılardyń Petropavl men Sergeev gıdroýzelindegi kópirlerge de zııan shektirýi múmkin ekeni eskertilgen.
Soltústik Qazaqstan oblysy