ShYU-ǵa múshe memleketter basshylarynyń otyrysy Belarýs Respýblıkasyn Uıym quramyna qabyldaý, oǵan ShYU-ǵa múshe memleket mártebesin berý týraly sheshimge qol qoıýdan bastaldy. Bul biz úshin úlken qýanyshty sát bolyp otyr.
Keńes otyrysynda kóp qujatqa qol qoıyldy. Sonyń ishindegi ekeýi bizdiń elge qatysty. Olar – Belarýs Respýblıkasyn Uıymǵa múshelikke qabyldaý rásiminiń aıaqtalýy jáne oǵan Shanhaı yntymaqtastyq uıymyna múshe memleket mártebesin berý týraly keńestiń sheshimderi. Sonymen qatar Belarýs Respýblıkasyna Uıymǵa múshe memleket mártebesi berilýine baılanysty Shanhaı yntymaqtastyq uıymyna múshe memleketterdiń úlestik jarnasy týraly sheshim shyǵaryldy.
Osylaısha, Qazaqstan tóraǵalyǵynyń qorytyndysynda Astana sammıtinde bizdiń el uıymnyń tolyqqandy múshesi atanyp otyr. Belarýs Respýblıkasy 2015 jyldan beri ShYU jumysyna baqylaýshy mártebesinde ǵana qatysyp kelgen. Oǵan deıin dıalog negizindegi seriktes mártebemiz bolǵan.
Árıne, úsh jylǵa sozylǵan úderisti asa uzaq ýaqyt deýge kelmes. Degenmen osy az ǵana ýaqyttyń ishinde prosedýralyq kóp jumys atqarylyp, Belarýs ózine mindettelgen barlyq júktemeni abyroımen atqardy. Onyń ústine uıymnyń seriktesi bolǵan 2015 jyldan beri biz barlyq otyrysqa, túrli talqylaýǵa qatysyp, jalpy alǵanda, Uıymnyń negizgi baǵyttarymen, barlyq máselesimen tanyspyz.
Jalpy, Belarýstiń Uıymǵa qabyldanǵanyn Bas hatshy Chjan Mın «tarıhı jetistik» dep baǵalap otyr. Rasynda, Eýrazııa kontınentinde bastapqyda «bestik» qurammen qurylǵan irgeli uıymnyń «ondyǵyn» túıindep jatqanymyz – rámizdik turǵydan aıryqsha jańalyq. Eń bastysy, uıym elderiniń qataryn kóbeıtip, áleýetin arttyrý óńirdegi saýda-ekonomıkalyq baılanystardy, qaýipsizdik sharalaryn jandandyrý úshin asa qajet. Ásirese bizdiń elge jetkiziletin taýarlardyń 70 paıyzy búginde osy uıymǵa múshe memleketterge tıesili. Aldymen osy uıymnyń aıasynda Belarýsten Pákistanǵa deıingi kólik-logıstıkany barynsha damytýdy kózdep otyrmyz.
Jalpy alǵanda, Shanhaı yntymaqtastyq uıymy – mańyzdy kelissózderge qol jetkizip, aýqymdy saıası sheshimder qabyldaıtyn alań. Biz óz tarapymyzdan tehnologııa jaǵynan tájirıbe almasyp, aqparattyq qaýipsizdikti birlesip jetildirý, kólik-logıstıkalyq dálizderdi kóbeıtý bastamalaryna basymdyq bermekpiz.
Maksım RYJENKOV, Belarýs Respýblıkasynyń Syrtqy ister mınıstri