1500 adamdy jumyspen qamtyǵan seriktestik ekinshi besjyldyqtyń tuńǵysh nysanyn iske qosty

Indýstrııalandyrý is ústinde

Alǵashqy aıaq alys «Radýga» JShS elimizdiń naryǵynda jıyrma jylǵa jýyq jumys istep keledi. Alǵashqyda Reseı-Qazaqstan birlesken kásiporny retinde qurylyp, jeńil-jelpi, keıin kóterme saýda-sattyq túrlerimen aınalysty. Qyzyljar óńirinde tapshy azyq-túlik túrlerin, sharýashylyq taýarlary men turmystyq buıymdardy kórshi elden tasymaldap, jurtshylyq suranysyn ótep júrdi. Onyń aıaǵynan tik turyp ketýine partııa, keńes organdarynda uzaq ýaqyt jaýapty qyzmet atqarǵan Anatolıı Sharapaevtyń yqpaly zor boldy. О́mirden túıgen-bilgeni mol tájirıbeli basshy balalaryna jón siltep, baǵyt-baǵdar berip otyrdy. Alaıda, bilikti ekonomıst bir ǵana alypsatarlyqpen sharýanyń oraıy kelmeıtinin túsinip, derbes óndiris ornyn qurýǵa bel baılady. Bul oıy otbasy tarapynan qoldaý tapqannan keıin toqyraýǵa ushyraǵan zaýyttyń bir ǵımaratyn jalǵa aldy. Sóıtip, maıly syrdyń bir partııasyn shyǵaryp, jer­gi­likti tutynýshylarǵa jónelt­ti. Alǵashqy aıaq alys kútken­de­gideı nátıje berip, sheteldik qon­dyrǵylar satyp alyna bas­tady. Serik­testiktiń negizgi óndiristik bazasy oblys ortalyǵyndaǵy kóp­qabatty ǵımaratta ornalasyp, ondaǵy sehtar­da júgeri taıaqshalaryn, dámdi pop­korn shyǵarýǵa basym­dyq berildi. «Dobraıa», «Impe­rator» degen ataýlarǵa ıe 2, 5, 10 kılolyq oramalardaǵy jo­ǵary, birinshi surypty un ónim­deri joǵary sapalyǵymen erekshelendi. Kásiporyn Qyzyljar aýdanynda ıesiz qalǵan ǵımaratty satyp alý úshin memlekettiń qar­jylyq qoldaýyna júgindi. Ekinshi deńgeıli bankten alyn­ǵan nesıege kúrdeli jóndeý júr­gi­zilip, 50, 100, 150, 200 gram­dyq salmaqta jyltyr orama­da qýyrylǵan «Dobraıa» shekil­deýigin shyǵaratyn seh retinde jabdyqtaldy. Sodan beri bul ónimge degen suranys esh úzilgen emes. Bir aıdaǵy ónim kólemi 50-60 mıllıon teńge­ni quraıdy. Onyń janynan keń­se, májilis zaldary, 30 oryn­dyq ashana, shaǵyn qonaq úı ashyldy. Búginde lak jáne syr materıaldaryn saýdalaýmen aınalysatyn qazaqstandyq óndiristik-saýda kompanııasy kópsalaly baǵyt ustanyp, elimizdiń 12 qala­synda bólimshelerin asha bildi. О́nimniń 40 túri shyǵarylady 1997 jyly Anatolıı Mıhaı­lovıch órken jaıǵan bıznes salasyn uldary Dmıtrıı men Petrge tapsyrdy. Bular bolsa, áke amanatyn buljytpaı oryndaýǵa bar kúsh-jigerlerin jumyldyryp, sátti damytyp keledi. О́z qarajat­taryna Beskól kentinde jańa ǵıma­rat turǵyzyp, tattanbaıtyn aq qańyl­tyrmen qaptaǵan soń polımerli turmys qaldyqtaryn óńdep, plastmassa buıymdaryn shyǵaratyn úshinshi óndiris oshaǵyna aınaldyrdy. Buǵan deıin Petropavl aýyr mashına zaýytynan satyp alynǵan eski qondyrǵylar qoldanylyp kelse, endi ýaqyt talabyna oraı ozyq tehnologııalarmen jabdyqtaý qajettigi týdy. Sol sebepti, Qazaqstan Halyq banki arqyly mıllıon AQSh dollary mólsherinde nesıe alynyp, «Polımerlerdi qaıta óńdeýge arnalǵan óndiristi jańǵyrtý» jobasy júzege asyryldy. Qarjy birinshi kezekte polımer ónimderin shyǵaratyn sheteldik zamanaýı stanoktar ornatýǵa jáne avtokólik parkin jańalaýǵa jumsaldy. Aǵaıyndy kásipkerlerdiń tyń bastamasy «Bıznestiń jol kartasy-2020» baǵdarlamasy sheńberinde de qoldaý taýyp, 25,5 mıllıon teńge demeýqarjy berildi. Osylaısha shıkizatqa táýeldilikten de birjola qutyldy. Qazirgi kúni jergilikti jerlerde satyp alynatyn jáne elimizdiń ózge óńirlerinen ákelinetin turmys qaldyqtaryn keptirip, óńdeıtin qýatty jeli jumys isteıdi. Al, daıyn polımer túıirshikteri alýan túske boıalyp, shıkizat retinde qoldanylady. Ekijaqty kelisimge oraı Reseıdiń birqatar aımaqtaryna eksporttalady. Búginde munda 40-qa jýyq buıym túrleri ázirlenedi. Olardyń arasynda turmystyq shelekter, kıimilgishter, túrli-tústi tósenishter, balalar, balyqshylar shanalary, bıodárethanalar sekildi úlken suranysqa ıe ónim túrleri bar. О́nimderdiń arzan bolýyna jergilikti shıkizatty paıdalaný áser etse, ekinshiden, polımerlerdi ekinshi qaıtara óńdeýge arnalǵan óndiristiń iske qosylýy aıtaryqtaı yqpal jasaǵanyn ańǵarý qıyn emes. Jańalyqqa jany qushtar Sharapaevtar negizgi óndiristik bazaǵa kompıýtermen basqa­ry­latyn germanııalyq «Heizomar» qazandyǵyn ornatyp, kól-kósir rahatyn kórip otyr. Otyn retinde aǵash qaldyqtary men jańqalar paıdalanylady. Seriktestik iri kásipkerlik sýbektiler arasynda «Eko­logııaǵa qosqan úlesi úshin» ata­lymynda «Paryz-2014» bıznestiń áleýmettik jaýap­ker­shiligi baıqaýynyń qola júldegeri atansa, D.Sharapaev «Eren eńbegi úshin» medalimen marapattalǵan. Eksport – basty baǵdar Qazaqstannan tysqary aımaqtarǵa da «Dobraıa rat» saýda markasy brendimen tanymal «Radýga» JShS-de búginde 1500 adam turaqty jumyspen qam­tylǵan. Taýarlyq-qar­jy­lyq aınalymy 2013 jyly 7 mıllıard, 2014 jyly 10,5 mıllıard teńgeni quraǵan. Byltyr 1,3 mıllıard teńgeniń ónimin óndirip, aldyńǵy jylǵa qaraǵanda 1,5 ese ósken. Bıyl bul kórsetkishti 2,5 mıllıard teń­gege jetkizý belgilengen. Kom­panııa dıstrıbıýtorlyq júıe arqyly ónimderin elimiz­diń barlyq óńirlerine, sondaı-aq, Re­seıdiń kóp bóligine taratady. Jýyrda kompanııanyń Beskól fılıalynda turǵyn úı-kommýnaldyq sharýashylyq jáne halyq tutynatyn taýarlar shyǵarýǵa arnalǵan jańa keshen Indýstrııalandyrý kartasy sheńberinde paıdalanýǵa berildi. Onyń ashylý saltanatyna oblys ákimi Erik Sultanov qatysyp, plastmassa buıymdary, tútikti temir ónimderi, polıetılen qubyr­lary, qaltashalar men baýly qapshyqtar óndiretin keshendi iske qosty. – Memleket basshysy N.Nazar­baev Qazaqstan ekono­mı­kasynyń 6 paıyzdyq ósimin qamtamasyz etý úshin jyl saıyn 10 myń jańa jumys ornyn ashý talabyn júkte­gen bolatyn. Osyǵan oraı óńir­de ındýstrııalyq-ınnovasııa­lyq damý memlekettik baǵdar­lamasynyń ekinshi besjyl­dyǵyna 100 mıllıard teńgeniń 70-ke jýyq jobasy engizildi. Olardyń arasynda 10 mıllıard teńge bolatyn Taıynsha qalaıy kombınaty sekildi iri jobalar bar. ÚIIDB barlyq aýdandarda júzege asatyn bolady. Solardyń eń alǵashqysy retinde polıetılennen 40-shaqty ónim túrlerin alatyn kásiporyn boı kóterip, 40 adamǵa jumys taýyp berip otyr. Plastmassaǵa kerekti shıkizattyń osyndaǵy turmystyq qaldyqtardan óndiriletini jobanyń basty artyqshylyǵy deýge bolady, – dedi BAQ ókilderine bergen suhbatynda Erik Hamzauly. Odan keıin fılıaldyń tútik metaldardan eki túrli ba­la­lar shanasyn, kıim-keshek útik­teıtin taqta, úsh túrli kıim-ke­shek keptirgish, saty, keńselik oryn­dyqtar sııaqty halyq keń tutynatyn taýarlar men buı­ymdar jasaıtyn sehta boldy. Kompanııanyń bas dırektory Dmıtrıı Sharapaevtyń aıtýynsha, fılıalǵa «Bıznestiń jol kartasy-2020» baǵdarlamasy boıynsha 1,5 mıllıard teńgeniń qural-jabdyqtary ornatylyp, ónim túrleri eki ese kóbeıgen. Jańa jyldan bas­tap óz kúshine engen Eýrazııalyq ekonomıkalyq odaq ózara tıimdi áriptestik baılanystarǵa, qolaıly kelisimsharttarǵa, taýarlardyń úzilissiz eksporttalýyna keń jol ashatyn bolady. «Dobraıa rat» brendimen jumys isteıtin kompanııada taýar logıstıkasy, brendmenedjerler, marketıng qyzmetteriniń qýatty júıesi qalyptasqan. Aldaǵy ýaqytta polımerli turmys qaldyqtaryn jınaýǵa arnalǵan orama jasaý, taýar túrlerin kóbeıtý, qosymsha saýda oryndaryn ashý, eksport úlesin arttyrý belgilengen. О́mir ESQALI, «Egemen Qazaqstan». Soltústik Qazaqstan oblysy.