Ulytaý oblystyq tarıhı-arheologııalyq mýzeıiniń jádigerleri qatarynda halyq aqyny Maıasar Japaqovtyń da dombyrasy saqtaýly tur.
Halqymyzdyń júreginde esimderi máńgilikke saqtalyp qalǵan Úkili Ybyraı, Mádı, Muhıt ispetti ári aqyn, ári ánshi tulǵalardy ózine ustaz tutqan Maıasar aqyn 1889 jyly ómirge kelip, 1965 jyly qaıtys bolǵan. Ol ultymyzdyń aıtys ónerin damytýǵa aıryqsha úles qosa bildi. Onyń Bolman, Nurlybek, Kóshen, Qaıyp aqyndarmen sóz qaǵysy kóptegen jınaqqa engen. Ol sonymen birge eskilikti ańyz áńgimelerdi, qıssa-dastandardy, ózinen buryn jasaǵan aqyndardyń jyr-tolǵaýlaryn jatqa bilgen. Shortanbaıdyń «Qarakesek», «Aǵybaı batyr» dastandary men óleńderi, sondaı-aq «Shóje men Kempirbaıdyń aıtysy», «Shal men qasqyrdyń aıtysy» atty aýyz ádebıetiniń úlgileri M.Japaqovtyń aıtýymen jazylyp alynyp, ádebı qordyń murasyna engizilgen.
Ulytaý oblystyq tarıhı-arheologııalyq mýzeıindegi Maıasardyń qos ishekti dombyrasy qaıyń aǵashynan jasalǵan, moıyn uzyndyǵy – 48 sm, shanaǵy – 32 sm. Dombyrany mýzeıge 1985 jyly aqynnyń uly Ábdiqul tapsyrǵan. Dombyra kúnine oraı ótkizilgen «Dombyra – qazaq halqynyń asyl murasy» atty kórmege Maıasar aqynnyń dombyrasy qoıylyp, kelýshilerdiń qatty qyzyqqanyn baıqadyq.
Jezqazǵan