Qaraǵandy oblysynda «Jastar taza Qazaqstan úshin!» ekologııalyq aksııasy bastaldy. Aksııaǵa birinshi bolyp Metallýrgter qalasynyń ekobelsendileri qatysty, dep habarlaıdy Egemen.kz.
Jastardyń belsendiligi joǵary boldy. Júzdiń ústinde erikti atsalysty.
«Jasyl el» eńbek jasaǵynyń jas jaýyngerleri, KTA komandalarynyń qatysýshylary, sportshylar, QHA jastar qanatynyń ókilderi «Metallýrg» qalalyq stadıonynyń aýmaǵyn qoqystan tazalady. Jas jalyndar basqalarǵa úlgi bola otyryp, qalanyń ekologııalyq máselesine tıtteı de bolsyn úles qosýdy kózdep otyr.
«Bizdiń basty mindetimiz – jastardy ekologııalyq bastamalarǵa tartý jáne aýqymdy aksııany belsendi qoldaý. Stadıonda kún saıyn jattyǵýlar, komandalyq oıyndar ótedi. Street Workout-oıyn alańy keshke sporttyń kóptegen jankúıerlerin jınaıdy. Búgin biz sportshylar dál osy jerdi tazalaýdy tańdaǵanymyz da beker emes. Turǵyndardy tazalyqqa barynsha muqııat qarap, sportpen shuǵyldanýǵa shaqyramyz», deıdi «Taý» sport klýbynyń erkin kúresten jattyqtyrýshy-oqytýshysy Maksım Samsov.
Qalanyń jas belsendileri ekoaksııanyń aýmaǵyn arttyra beremiz dep ýáde berip otyr.
«Bizdiń jastar árqashan eko bastamalarǵa qatysady. Qalys qalyp kórgen emes. Jastardyń tazalyq pen qorshaǵan ortany qorǵaýǵa degen umtylysy joǵary. Soǵan qýanyshtymyz. Ári qaraı bul ıgi isti jalǵastyramyz. Qalanyń basqa da jas turǵyndaryn bizdiń sapqa qosylýǵa shaqyramyz», deıdi Temirtaý qalasynyń Jastar resýrstyq ortalyǵy dırektorynyń mindetin atqarýshy Rýslan Qojekenov.
Munymen qosa, aksııa kezinde jas eriktiler arasynda túrli ekooıyndar uıymdastyryldy. Komandalar baq synasqan ekokvest oıyny tartysty boldy. Qoqys qaldyqtaryn suryptaý, olardy óńdeý boıynsha semınarlar men sheberlik saǵattarynyń jastarǵa paıdasy tıdi.
«Jastar taza Qazaqstan úshin!» – sáýir aıynyń basynda Memleket basshysynyń bastamasymen iske asyrylǵan «Taza Qazaqstan» respýblıkalyq ekologııalyq aksııanyń jalǵasy.
«Taza Qazaqstan» aksııasyna Temirtaý qalasynyń 20 myń turǵyny, 300 túrli uıym-ujymy qatysyp, saıabaqtar men gúlzarlar tazalanyp, 15 myń tonna qoqys shyǵaryldy.
Munymen qosa, ekoaksııa kezinde 5 myńnan astam túrli kóshet egildi. Tarıhı jáne mádenı eskertkishteriniń aýmaqtary jınaldy.