Jýyqta jaqsy kitap jaryq kórdi. Týyndynyń basty keıipkeri – qazaq kúresiniń janashyry hám 2004-2017 jyldary Dúnıejúzilik qazaq kúresi federasııasynyń prezıdenti bolǵan – Serik Tókeev. Bul tulǵa – shyn máninde halqymyzdyń baıyrǵy jekpe-jek óneri qazaq kúresin jańa zamanǵa saı damytýda eren eńbek sińirgen adam.
Iаǵnı buǵan deıin shekara sheginen asa almaı júrgen ulttyq kúresimizdi alty qurlyqqa apardy. Oǵan dálel mynaý: 2005 jyly Tókeevtiń tegeýrindi tuıaq tireýiniń arqasynda jeke shańyraq kótergen qazaq kúresi 12 jyldyń ishinde (2017 deıin) 8 álem chempıonaty, 11 Azııa chempıonaty, 3 Álem kýbogi, 3 Eýropa birinshiligin ótkizip úlgeripti. Rasynda, joǵarydaǵy jarystardy ótkizý ekiniń biriniń qolynan kele bermesi anyq. Munyń syrtynda sonaý qıyrda jatqan Brazılııa elinde qazaq kúresinen kadetter jáne jastar arasynda qurlyq birinshiligin uıymdastyrý, Ońtústik Afrıka respýblıkasynda eki dúrkin qara qurlyq chempıonatyn ótkizý ońaı ma?!
Kitapta joǵarydaǵy sporttyq is-sharalardyń barlyǵy aıtylyp, jazylǵan. Qundylyǵy – osynda. Iаǵnı keıipkerdi biletin, tálimin úırengen, qaptaldasyp úzeńgi soǵystyryp birge júrgen shákirtteri men jora-joldas áriptesteriniń júrekjardy estelikteri toptastyrylypty. Ásirese óziniń aǵaıyn-týǵandary men ápke-baýyrlarynyń júreksózi taza bulaqtyń qaınarynan úzilip túsken móldir tamshydaı. Mysaly, Tókeevtiń týǵan apaıy Uldyqyzdyń esteliginde: «Qazaqta áke balaǵa synshy» degen bar emes pe, birde ákeı maǵan: «Balam, erte kezde bizdiń jaýyryny jer ıiskemegen Qaıypberdi degen batyr-balýan atamyz bolǵan eken. Myna Serik iniń sol atasy sııaqty. Batyrdy el maqtaıdy, jurt jaqtaıdy, sóıtip aqylynan adastyrady. Buǵan kóz qyryńdy sala júr! Bul balaǵa Alla Taǵala naýadaı qylyp nesibe bergen. Bul perdemen týǵan bala», dedi».
Egerde týyndyny bir ǵana tulǵany maqtaý-madaqtaý maqsatynda qurastyrylǵan dúnıe deseńiz, qatelesesiz. Munda táýelsizdik jyldaryndaǵy qazaq kúresine degen janashyrlyq hám ult upaıyn túgendeý jolyndaǵy jeke tulǵanyń jankeshti eńbegi týraly bile alasyz. Bir sózben aıtqanda, bul shyǵarma Tókeevtiń jeke tulǵasy arqyly bir dáýirdiń saıası-psıhologııalyq ahýaly men ulttyq kúrestiń muraty jolyndaǵy kúrdeli oqıǵalar tizbegi ispetti.
Sózimizdi túıindep aıtar bolsaq, týyndynyń negizgi qundylyǵy – tileýlester lebiziniń toǵysýy. Bul stıl zamanaýı suranysqa ıe. О́ıtkeni munda bir adamnyń kózqarasy emes, keıipker týraly qalam terbegen 48 adamnyń ártúrli paıymy, túsinigi, uǵymy, pikiri sińirilgen. Kitapty qurastyrýshy qazaq sportynyń shejireshi-jýrnalısi Qydyrbek Rysbekuly osy joldy durys tańdapty. Iаǵnı bul tásil – keıipkerdiń bolmysy men áreketin tolyq ashyp, túsindire alatyn birden-bir amal. Kitaptyń utary da osynda. Sondaı-aq kólemi 340 bettik týyndy tamasha sýrettermen bezendirilgen. Árbir foto – bir-bir tarıh. Qazirgi tańda áleýmettik ortada «kózben seziný» deıtin psıhologııalyq uǵym paıda boldy. Tápsirlep aıtqanda, fotoderekter arqyly kózben oqý, túısikpen seziný. Dál bul stıl myna kitapqa sińirilgen.