Elimizde zorlyq-zombylyqtan zardap shekken balalarǵa arnaıy kómek baǵdarlamasy engizilip jatyr. Maqsat – zorlyq-zombylyqqa, qatygezdikke, býllıngke ushyraǵan, sondaı-aq qylmysqa kýá bolǵan balalarǵa ýaqtyly járdem berý. Bastamany Oqý-aǵartý mınıstrligi júzege asyrady.
Baǵdarlama jasóspirimderdiń emosııalyq, kognıtıvtik jáne minez-qulqyndaǵy saldardy eńserýge baǵyttalǵan. Onda arnaıy kómek kórsetý algorıtmi jáne medısınalyq, psıhologııalyq, pedagogıkalyq, áleýmettik jáne quqyqtyq negizder qamtylady. Ári baǵdarlama sheńberinde kámeletke tolmaǵandardan bólek, olardyń ata-analaryna da biryńǵaı ádisteme ázirlenedi.
– Ár bala zorlyq-zombylyqtan qorǵalýǵa tıis. Bul baǵdarlamanyń qabyldanýy memleket pen qoǵamnyń bala quqyǵyn qorǵaý jáne olardyń qaýipsizdigin qamtamasyz etýdegi mindettemesiniń kórinisi. Bastama balalarǵa zardap saldarymen kúresý jáne psıhologııalyq turǵyda qoldaý júıesin qurýdaǵy mańyzdy qadamnyń biri, – dedi Oqý-aǵartý mınıstrligi Balalardyń quqyqtaryn qorǵaý komıteti tóraǵasynyń orynbasary Iýlııa Ovechkına.
Kómek kórsetý baǵdarlamasy oblystyq deńgeıde psıhologııalyq qoldaý ortalyqtarynyń, aýdandyq bilim bólimderiniń bazasynda iske asyrylady.