2010 jyldan bastap Astanada mıneraldardyń alýan túrliligi boıynsha Ortalyq Azııadaǵy eń úzdik mıneralogııalyq murajaı jumys isteıdi. Onyń kolleksııasynda myńnan astam eksponat bar. Aıta keterligi, mektep oqýshylary bul murajaıǵa tegin bara alady.
Murajaıdyń negizin qalaýshy, Qazaqstannyń eńbek sińirgen geologi Oljabaı Ismaılov osy salada talaı jyldan beri eńbek etip keledi. Ol jádigerlerdiń ǵylymı, sondaı-aq estetıkalyq qundylyǵyna erekshe nazar aýdarǵan. Árıne, bul, murajaıǵa kelgen qonaqtardyń qyzyǵýshylyǵyn arttyrady ári tanymdyq kókjıegin keńeıtedi. Atalǵan mýzeı geologııa, mıneralogııa salasyna qyzyqqan barsha qonaqqa, sheteldik týrısterge elimizdiń jerasty baılyǵy týraly mol maǵlumat berý maqsatynda qurylǵan. Eksponattardyń qatarynda túrli mıneral, taý jynysy, asyl tas, sondaı-aq paleontologııalyq olja bar. Mundaǵy negizgi kolleksııadan basqa, XIX ǵasyrdaǵy geologııalyq ádebıetter muraǵaty jáne XX ǵasyrdyń basy men ortasyndaǵy geologııalyq quraldardyń úlgileri bar.
«Mamandyǵym – geolog. Bar ómirimdi osy salaǵa arnap kelemin. Astanada mıneralogııalyq murajaı ashýǵa bel býǵanym da – osy mamandyqqa degen mahabbattyń belgisi. Buryn Almatyda mıneraldar mýzeıi bolǵan, biraq qazir joq. Sondyqtan oqýshylar osynda jıi keledi. Bizdiń murajaıdyń maqsaty — elimizdiń tabıǵı resýrstaryn dáripteý ári balalardyń óz eline, týǵan jerine degen súıispenshiligin qalyptastyrý. Sebebi bizde Mendeleev kestesiniń barlyq derlik elementin tabýǵa bolady», deıdi Qazaqstannyń eńbek sińirgen geologi Oljabaı Ismaılov.
Murajaı kolleksııasynda Qazaqstan aýmaǵynan jınalǵan jádigerlerden bólek, kórshiles elderden, tipti Eýropa, Afrıka, Ońtústik Amerıka, Aýstralııadan jınalǵan eksponattar da usynylǵan. Kolleksııalyq úlgilerdiń bir bóligin jergilikti geologter tegin syıǵa tartypty. Murajaı qory únemi jańartylyp, jańa túsimdermen tolyqtyrylyp otyrady.