Mádenıet jáne aqparat mınıstri Aıda Balaeva Islam yntymaqtastyq uıymy Áıelderdi damytý uıymynyń atqarýshy dırektory, doktor Afnan ál-Shýaıbımen kezdesti. Kezdesýde genderlik teńdik máseleleri talqylanyp, otbasylyq jáne genderlik saıasat salasynda tájirıbe almasý máseleleri sóz boldy.
Mınıstr bizdiń el kóp etnosty ári kópkonfessııaly memleket bolǵandyqtan, beıbitshilik, toleranttylyq jáne kemsitýshilikke jol bermeý saıasatyn ustanatynyn atap ótti.
– Prezıdent memlekettik saıasattyń basymdyqtarynyń biri sanalatyn genderlik teńdikke qol jetkizýge baǵyttalǵan jumystarǵa udaıy qoldaý kórsetedi jáne oǵan kóp kóńil bóledi. Buǵan mańyzdy dálel retinde genderlik alshaqtyq ındeksi boıynsha halyqaralyq reıtıngte Qazaqstan 2023 jyly 146 eldiń arasynda 62 orynǵa ıe bolǵanyn atap ótýge bolady, – dedi Aıda Balaeva.
Aıda Ǵalymqyzy Prezıdent janyndaǵy Áıelder isteri jáne otbasylyq-demografııalyq saıasat jónindegi ulttyq komıssııanyń qyzmetine, sondaı-aq otbasylyq jáne genderlik saıasatty zertteý ortalyǵynyń jumysyna toqtaldy. Genderlik saıasat máselelerimen aınalysatyn 500-den astam ÚEU jáne 70-ke jýyq ÚEU-ny biriktiretin áıelder kóshbasshylyǵy mektepteriniń ulttyq jelisi mańyzdy ról atqarady. Elimizdiń barlyq óńirinde «Áıel saıasatkerler klýby» jáne áıelder kásipkerligin damytý ortalyqtary jumys isteıdi.
Doktor Afnan ál-Shýaıbı elimizdiń otbasylyq-turmystyq zorlyq-zombylyqqa qarsy kúrestegi jetistikterine erekshe toqtalyp, Ortalyq Azııa elderi arasynda Qazaqstan osy salada kóshbasshy orynǵa ıe ekenin atap ótti.
Taraptar sondaı-aq halyqaralyq alańdardy da qosa alǵanda, Qazaqstan men IYU áıelder uıymynyń ózara baılanys perspektıvalaryn talqylady. Kezdesý sońynda qatysýshylar áıelder quqyǵyn qorǵaýdyń negizgi máseleleri boıynsha yntymaqtastyqty tereńdetýge jáne pikir almasýǵa nıet bildirdi.