Búgin «Býrabaı» ulttyq parkinde Qazaqstandaǵy eń joǵary tehnologııalyq ınteraktıvti murajaılardyń biri, Abylaı han alańynda ornalasqan mýltımedııalyq ınteraktıvti keshen ashyldy, dep habarlaıdy Egemen.kz.
Keshenniń saltanatty ashylý rásimine Mádenıet jáne aqparat mınıstri Aıda Balaeva, Aqmola oblysy ákimi Marat Ahmetjanov, Prezıdent Is basqarýshysynyń orynbasary Rýstam Baıalıev jáne taǵy basqalar qatysty. «Býrabaıdyń tumsa tabıǵatyn, tarıhı-mádenı baılyǵyn kópshilikke tanytý – óte ózekti. Búgingi zamanaýı ınnovasııalyq keshenniń ashylýy óskeleń urpaqty otansúıgishtikke tárbıeleýde mańyzdy qadamdardyń biri dep esepteımin. Munda jastar óńirdi ǵylymı-shyǵarmashylyq turǵydan tereń zerdelep, rýhanı kemeldenip, mol taǵylym alady dep senemin», dedi Aıda Balaeva.
Mádenıet jáne aqparat mınıstrliginiń baspasóz qyzmetiniń málimetinshe keshen 2021 jyly iske qosylyp, 3 jyldan soń tujyrymdamasy qaıta qaralyp, sońǵy anımasııalyq jáne aýdıovızýaldy tehnologııalardy qoldana otyryp jańartylǵan.
«Keshenniń Abylaı han alańynda ornalasqany – erekshe oqıǵa. Bul jer elimizdiń kıeli oryndarynyń tizimine kiredi jáne Býrabaı kýrortynyń eń basty kóz tartar orny. Mýltımedııalyq ortalyq demalys pen oıyn-saýyq orny ǵana emes, sonymen qatar mádenı pikir almasý ortalyǵy bolatynyna senemin», dedi Aqmola oblysynyń ákimi Marat Ahmetjanov.
Keshen Uly Dala murasy, Qazaqstanǵa saıahat, Samuryq qusynyń ushýy, Batyrlar dalasy, Máńgilik El, Uly Dala tarıhy, Qazaqtyń tarıhı tulǵalary, Ýaqyt dálizi, Abylaı han batasy dep atalatyn toǵyz taqyryptyq aımaqqa bólingen. Bul árbir kelýshige qazaq mádenıetin sezinýge jáne el tarıhymen tanysýǵa múmkindik beredi. Aıta ketsek, vızıt-ortalyqtarǵa jyl saıyn myńdaǵan adam keledi. Ile-Alataý ulttyq saıabaǵyndaǵy Túrgensaı jáne Sharyn shatqaly sekildi eń tanymal jerlerdi jylyna 300 000 adam tamashalaıdy. Atalǵan sandyq derekter – sol jerlerdiń ereksheliginen bólek, eldiń mádenı mol murasyn saqtaýǵa jáne nasıhattaýǵa yqpal etetin ınfraqurylymdy damytýǵa baǵyttalǵan jumystardyń nátıjesin kórsetedi.