PETROPAVL. 26 sáýir. Soltústik Qazaqstan oblysynda saılaýda jastar da belsendilik tanytty. Solardyń qatarynda jas maman Dosjan Nurpeıisov te bıylǵy saılaýǵa qatysyp, azamattyq paryzyn oryndady. Saılaý kezinde bizben áńgimesinde ol saılaýdyń máni men mańyzy týraly egjeı-tegjeı aıtyp berdi. Bul týraly egemen.kz tilshisi habarlady.
«Búginde adamzatty tolǵandyratyn álemdik máseleler jetip artylady. Qarjylyq daǵdarysqa urynǵan biraz elder onyń qursaýynan qalaı shyǵaryn bilmeı dal. Aınalany qorqynysh tumshalap, adam janyn úreı bılegen mezette sharasyzdyqqa túsip, týra joldan adasatyn sátter jıi kezigedi. Qazaqta «apat aıtyp kelmeıdi» degen sóz bar. Onyń qaýipti oshaqtary rýhanı ómirimizge dendep enip, jegi qurttaı jaılap barady. Ásirese, dinı ekstremıstik, terrorıstik baǵyttardaǵy neshe alýan uıymdar qataryna kóbine jastardy tartyp, oı-sanasyn ýlap jatatyndyǵy seskendiredi. Oǵan qarsy kúrestiń birden-bir joly–jastarymyzdyń saýatty, kózi ashyq bolýy. Birden-bir tosqaýyly – otanshyldyq qasıetti boıǵa qondyrý. Máńgilik El ıdeıasynyń túp-tórkinine úńilip, tereńine boılaǵan jan qaraqan bastyń «baqytynan» góri eldik máselelerdi birinshi orynǵa qoıady. Eshqandaı jańsaqtyqqa, aldaý-arbaýǵa urynbaıdy», - deıdi Dosjan Nurpeıisov.
Sonymen birge ol máseleniń ekinshi jaǵy tabıǵı apattarǵa kelip tireletinin aıtty. «Aldyńǵysy surap alǵan «bas aýrýymyz» bolsa, sońǵysy ǵaıyptan tóngen náýbet. Ekeýiniń de emi–bireý-aq . Ol qandaı qaýip-qaterlerge bolsyn jurttshylyq bolyp kúresý «Jut–jeti aǵaıyndy» dep tegin aıtylmaǵan. Qaı qaısysy bolsyn ákeletini –qaıǵy-qasyret, ekonomıkalyq zalal. Sonyń biri–topan sý. Onyń zardaptaryn Qazaqstannyń birqatar aımaqtary bıyl qatty tartty. Qardyń mol túsýi jáne jyldam erýi saldarynan Imantaý aýylyn da qarǵyn sý shaıyp, ábigerge túsirgenimen, jergilikti bıliktiń der kezinde kómekke kelýiniń arqasynda «tilsiz jaý» tez-aq toıtaryldy. Shyǵyndar qalpyna keltirildi. Búlingen nysandar men joldar jóndeldi. Qalypty tirshilik óz arnasyna tústi. Topan sýdyń aýyr zardaptaryn shekken ózge aımaqtarǵa da Úkimet, jurtshylyq kómek qolyn sozýda. Tabıǵattyń tosyn minezi kúndelikti tynys-tirshiligimizge nuqsan keltirip, birligimizge eshqandaı syzat túsire almasy anyq. Ornynda bar ońalar. Qısaıǵan túzeler. Yrys tolyǵar. Eń bastysy, elimizdiń amandyǵy. Elde bolsa, eshkim jutamaıdy, tarynshylyq kórmeıdi. Aýyldyqtardyń qıyndyqqa qaıyspaıtyn, barǵa-qanaǵat, joqqa salaýat deıtin márttigin úlken saıası belsendilikpen atap ótilgen prezıdenttik saılaý anyq baıqatty. Eldi meken turǵyndary bul joly da toptasqandyqtyń berik úlgisin tanytyp, óz tańdaýlaryn jasady. Saıası shara úlken uıymshyldyqpen atqaryldy. Mine, «birligi bar el ozady, birligi joq el borlaı tozady» degen osy!», - deıdi jas maman.
О́mir Esqalı.
Derek, sýret: egemen.kz