Keshe Parlament Senatynyń shahmat boıynsha «Senat Open» ashyq kýboginiń jartylaı fınaldaǵy bes týrnıriniń biri Aqtóbede ótti. Senat aıasynda Qazaqstan shahmat federasııasy men Kazchess alǵash ret uıymdastyrǵan týrnırge barlyq oblystar men respýblıkalyq mańyzy bar qalalar máslıhattarynyń depýtattary, oblystyq jáne qalalyq qoǵamdyq keńesterdiń músheleri jáne BAQ ókilderi qatysty.
Aqtóbe, Atyraý, Mańǵystaý jáne Batys Qazaqstan oblystarynyń irikteý kezeńderinde shahmattan jeńimpaz bolǵan 100 áýesqoı Aqtóbede ótken jartylaı fınalda baq synady. Jartylaı fınal oıyndarynyń ashylý saltanatyna oblys ákimdigi men máslıhatynyń jáne Qazaqstan shahmat federasııasynyń ókilderi qatysty.
9-týr rapıd qorytyndysy boıynsha «Senat Open» fınalyna qatysatyn «Batys» óńiriniń jıyrma bes ókili anyqtaldy. Olardyń ishindegi is-sharaǵa qatysyp, úzdik oıynshy atanǵan depýtattar, jýrnalıster, qoǵam belsendileri, áıelder men 60 jastan asqan qatysýshylar arnaıy sertıfıkatpen marapattaldy.
Týrnır barysynda toǵyzqumalaqtan halyqaralyq dárejedegi sport sheberi, eki dúrkin álem chempıony, Qazaqstannyń eńbek sińirgen jattyqtyrýshysy Nurbek Qabıev bir mezgilde máslıhat depýtattarymen, oblystyq jáne qalalyq qoǵamdyq keńesterdiń múshelerimen, BAQ ókilderimen oıyn ótkizdi.