Qaraǵandyda 17 jastaǵy kolledj stýdenti esirtki taratamyn dep 7,5 jylǵa bas bostandyǵynan aıyryldy. Bul týraly Joǵarǵy sottyń baspasóz qyzmeti habarlady, dep jazady Egemen.kz.
Qaraǵandy polıtehnıkalyq kolledjiniń 17 jastaǵy 3 kýrs stýdenti 2023 jyldyń sáýir aıynda ınternetten kýrer qajet ekendigi týraly habarlandyrýdy kóredi. Atalǵan telefon nómirine qońyraý shalyp, jumystyń qıyn emes ekenin, sonymen qatar jalaqysynyń joǵary ekenin biledi. Jasóspirim jaqsy oqymaǵanymen, ustazdar tarapynan shaǵymdar bolmaǵan, ákesimen jáne ógeı sheshesimen birge turady (olar ony tolyǵymen qamtamasyz etken), degenmen ol jeńil aqsha tabýǵa sheshim qabyldaıdy.Osylaısha ol kýrer boldy. Alynǵan geolokasııa boıynsha 5-15 jıyntyq taýyp, olardy bir-birden orap, Qaraǵandy kóshelerine salyp ketetin, kýratorǵa fotoesep jiberip otyrǵan.Árbir salynǵan orama úshin bank kartasyna 2,5 myń teńgeden aýdarym alyp otyrǵan, ony jeke qajettilikterine jumsaǵan. 2023 jyldyń qarasha aıynda 15 oramany alyp, onyń 4-in taratqan sátte ony polısııa qyzmetkerleri ustaıdy. «Jasóspirimniń sómkesi men qaltasynan psıhotroptyq zat (mefedron) bar 11 orama paket tabyldy. Jasóspirim psıhotroptyq zattyń analogyn ótkizý maqsatynda basqa adammen aldyn-ala sóz baılasý arqyly elektrondyq aqparattyq resýrstardy paıdalaný arqyly adamdar tobymen zańsyz saqtady dep aıyptaldy (QK-niń 297-baby 3-bóligi 1), 3), 5) tarmaqshalary boıynsha). Aıyptalýshynyń kinási – kýálardyń, polısııa qyzmetkerleriniń aıǵaqtarymen, kýágerlermen, saraptamalardyń qorytyndylarymen, salynǵan oramdardyń fotosýretteri tabylǵan uıaly telefondy tekserýmen, kýratormen hat almasýmen jáne qylmystyq istiń basqa materıaldarymen dáleldendi», delingen habarlamada.Jaza taǵaıyndaý kezinde sot asa aýyr qylmys sanatyna jatatyn jáne joǵary qoǵamdyq qaýipti bildiretin is-árekettiń sıpaty men qoǵamdyq qaýiptilik dárejesin, sottalýshynyń jeke basy, onyń minez-qulqyn, jaýaptylyqty jeńildetetin mán-jaılardy, aýyrlatatyn faktorlardyń bolmaýyn, taǵaıyndalǵan jazanyń sottalǵandy túzetýge jáne jańa qylmystardyń aldyn-alýǵa áserin nazarǵa aldy.QK-niń 297-babynyń 3-bóligi 1),3),5) tarmaqshasynyń 3-bóligi múlki tárkilenip, 10 jyldan 15 jylǵa deıingi merzimge bas bostandyǵynan aıyrýdy kózdeıdi. Aıyptalýshy aıypty dep tanyldy jáne onyń kámeletke tolmaǵan jasyn eskere otyryp, ol 7,5 jylǵa bas bostandyǵynan aıyryldy.Úkim zańdy kúshine endi.