Jaqsylyq jerde qalmaıdy

Bıyl qoǵam tarapynan qaıy­­rymdylyq kómek kútetin áleýmettik qorǵalmaǵan jáne az qamtylǵan otbasylardan shyq­qan mektep jasyndaǵy balalar sany byltyrǵydan 1 300-ge artyp otyr. Bul týraly oblystyq bilim basqarmasynyń basshysy Aınagúl Suraǵanova aıtty.

Buryn qoǵam tarapynan mate­rıaldyq kómek «Mektepke jol» atty aksııa arqyly memle­kettik ataýly áleýmettik kómek alýǵa quqyǵy bar otbasylardyń balalaryna, mundaı kómek almasa da jan basyna shaqqandaǵy tabysy eń tómen kúnkóris deńgeıinen tómen otbasylardyń balalaryna, otbasylarda turatyn jetim balalarǵa jáne ata-anasynyń qamqorlyǵynsyz qalǵan balalarǵa beriletin. Al bıyl osy sanattarǵa tótenshe jaǵdaı saldarynan shuǵyl járdemdi talap etetin otba­sylardan shyqqan balalar kirdi. Kók­t­emdegi tasqynnyń álegimen kóp­tegen otbasynyń balalary mektepke qa­jetti dúnıelerinen aıyrylyp qaldy. Mem­le­ket tarapynan otbasyna mate­rıal­dyq kómekter berilgenimen oqýshy­lar­dyń qajettilikteri eskeril­megen edi. Endi sol olqylyqty «Mektepke jol» aksııa­sy arqyly óteý qolǵa aly­nyp otyr. Son­dyq­tan bıylǵy qaıy­rym­dylyq kómek alýǵa tıisti balalar sany byltyrǵydan asyp tústi. Aksııa 1 ta­myzda bastalyp, 30 tamyzǵa deıin jal­ǵasady. Byltyr kómek qory ­337,4 mln teńge bolsa, bıyl kómek kólemin 472,2 mln teńgege jetkizý josparlanǵan. Aksııa urany «Jaqsylyq jasańyz!» dep atalady.

«Mektepke jol» aksııasy aıasyndaǵy kómektiń negizgi bóligi bıýdjet qarajaty esebinen (jalpyǵa birdeı bilim berý qory) jáne qaıyrymdy azamat­tar­dyń demeýshilik qarajaty esebinen kórsetiledi. Jalpyǵa birdeı bilim berý qory aıasynda bilim alýshylar men tárbıelenýshilerge kıim, aıaq­kıim, mektep kerek-jaraǵyn satyp alý úshin ata-analardyń esepshotyna eń tómengi kúnkóris deńgeıinen tómen emes mólsherde qarjylaı jáne materıaldyq kómek kórsetiledi.

Byltyr aksııa aıasynda bar­lyǵy 15 236 oqýshyǵa kómek kórsetildi. Kórsetilgen kómektiń jalpy somasy 404,8 mln teńgeni qurady, sonyń ishinde 5 676 oqýshyǵa bıýdjetten tys qarajattan 17,0 mln teńgege kómek kórsetilse, 9 560 bala bıýdjet qarajatynan 387,8 mln teńgege kómek aldy. Bul qarajatqa mektep, sport formalary, aıaqkıim jáne keńse taýarlary satyp alyndy.

Qysqasy, osy aksııanyń arqasynda 15 myńnan astam oqýshynyń áleýmettik sebeptermen mektepke barmaýyna jol berilmeıdi. Oblys kásipkerleri arasynda turaqty demeýshilik kómek kórsetetin aq júrekti azamattar da bar. Bilim basqarmasynyń basshysy Aınagúl Suraǵanova osyndaı kómekti únemi kórsetetin «Mambetov jáne K» seriktestigine, «Petropavl araq zaýyty» AQ, «AZKO», «Býdennoe SK», «Raısovskoe» JShS, «Astyq Prıvolnyı», «Zapadnoe SK», «ES Global agro», «Tahtabrod», «Adanı Agro», «Dostastyq» seriktestikteriniń, «Edıl» kompanııasy, «Azııa-Tarangýl» JShS, Vızıgına JK, «Hantemir-Agro», «Zagradovskoe», «Prometeı-Agro», «Bromot S.V.» JK jáne taǵy basqa uıym basshylaryna alǵys aıtatynyn jetkizdi. «Olardyń kómekteri – el bolashaǵyna quıylǵan kapıtal. Elimizdiń órkendeýi – oqýshylardyń eshteńeden taryqpaı jaqsy bilim alýyna tike­leı baılanysty. Sondyqtan jan­ashyr azamattarǵa aıtar alǵy­symyz sheksiz», dedi A.Suraǵanova.

Áleýmettik qoldaýdy qajet etetin oqýshylardyń ata-analary tıisti qu­jattaryn mektepke ótkizgennen keıin jár­demaqy taǵaıyndalady. Onyń mólsheri 43 407 teńge. Búgingi tańda oblys­ta osyndaı birjolǵy járdemaqy alýǵa úmitker 10 879 oqýshy anyqtalyp otyr. Olardyń sany áli óseri sózsiz. Alaıda járdemaqy alǵan ata-analar qara­jatty alǵan kúnnen bastap 10 ju­mys kúni ishinde bilim berý uıymyna qarajattyń nysanaly paıdalanylýyn qujattarmen rastaýy talap etiledi.

Soltústik Qazaqstan oblysy