EREN ERDI BASTAǴAN HALQYN BAQQA,
TÝǴAN ELI QONDYRDY ALTYN TAQQA!
Elin súıgen Elbasyn eli súıedi. Ony keshegi saılaý taǵy bir dáleldedi. Tórtkúl dúnıe kóz tikken mańyzdy saıası is-sharaǵa el halqy bir kisideı atsalysyp, el basqarar basshycyn saılady. Iá, halqy taǵy ony tańdady. Elin súıgen erdi – Elbasymyz Nursultan Nazarbaevty Qazaqstan Respýblıkasynyń prezıdenttigine laıyq dep tapty. Bulaı deýimizge kezekten tys prezıdenttik saılaýdyń alǵashqy nátıjeleri dálel, ıaǵnı Demokratııa ınstıtýty jarııalaǵan málimetterge súıensek, saılaýshylardyń 97,5 paıyzy Nursultan Nazarbaevqa daýys berdi. Sózdiń shyny kerek, Nursultan Nazarbaevtyń bul saılaýda da jeńiske jeterine ábden senimdi bolǵanbyz. Sebebi, ony saılaýǵa túsýge shaqyrǵan, qolqa salyp, úgitteı otyryp, ótinish jasaǵan da halyqtyń ózi edi. El taǵdyry úshin «bir jeńnen qol, bir jaǵadan bas shyǵara alatyn» yntymaqty eldiń halqy bul joly da birliktiń biregeı sıpatyn tanytty. Jahan jurty qulaq túrgen aıtýly saıası naýqanda da aýyzbirshilik tanytyp, eldiktiń erekshe úlgisin kórsetti. Tipti, bul saılaý eldiktiń, tatýlyqtyń jarqyn merekesine aınaldy desek, artyq aıtqandyq emes. Máselen, saılaýdyń qorytyndysyn astanalyqtardyń kóbi, ásirese, eljandy jastar elordadaǵy «Máńgilik El» monýmentiniń janynda kútti. Árıne, dál osynaý sátte «Máńgilik Eldiń» aldyna jınalýynda da úlken mán bar. Mezgildiń tún bolǵanyna qaramastan, «Máńgilik Eldiń» mańyn shat-shadyman kóńil-kúıge bólegen halyqtyń qýanyshy, Nursultan Nazarbaevqa degen zor senimi, ultymyzdyń uly perzentine degen sheksiz qurmeti ekeni daýsyz. Sebebi, biz úshin bolashaǵymyzǵa baǵdar etip ultty uıystyra uly maqsattarǵa jeteleıtin ıdeıa ol – Máńgilik El. Al eldi sol jolǵa jetelegen Elbasy Nursultan Nazarbaev. Elbasy Máńgilik El ıdeıasyn ultymyzdyń uly baǵdary, «Qazaqstan-2050» Strategııasynyń túpqazyǵy dep ustandy. Iá, elimiz búginde Táýelsizdigimizben birge, Tuńǵysh Prezıdentimiz Nursultan Nazarbaevpen birge máńgilik murattaryna baǵyt alyp barady. Elbasynyń ózi aıtqandaı, «Máńgilik El» – ata-babamyzdyń san myń jyldan bergi asyl armany bolsa, ol arman – álem elderimen terezesi teń qatynas quratyn, álem kartasynan oıyp turyp oryn alatyn táýelsiz memleket ataný. Ol arman turmysy baqýatty, tútini túzý shyqqan, urpaǵy erteńine senimmen qaraıtyn baqytty el bolý edi». Bizdiń el bul armandardy Nursultan Nazarbaevtaı Kóshbasshysynyń arqasynda aqıqatqa aınaldyrdy. Máńgilik Eldiń irgesi qalandy. Mine, búkil qazaqstandyqtar úshin eldiktiń synyndaı bolǵan kezekten tys prezıdenttik saılaýdyń qorytyndysy da jarııalanýǵa jaqyn bolatyn. Sol sát elordadaǵy eldigimizdiń sımvoly ispettes «Máńgilik Eldiń» janynda aıryqsha ásemdik ornady. Qoldaryna kók tý ustap, aspanǵa jelbiretken jastardyń janarynda ot oınap, kóńilderinde Elbasynyń jeńisine sengen sezimder menmundalap turdy. Halqymyzdyń asqaq rýhyn pash etip, birlik pen tatýlyqqa, jaqsylyq pen jasampazdyqqa shaqyrǵan «Máńgilik Eldiń» erekshe qasıetinen de shyǵar, jastardyń jalyny kóktemgi túnniń yzǵaryn da sezdirmeıdi. Bir sát quıǵyljyǵan kúı, ásem án, yrǵaqty bıdiń bári bir toqtady da, barlyǵy demderin ishke tartyp, saılaýdyń aldyn ala nátıjelerin kútti. Alańǵa qoıylǵan úlken ekrannan alǵashqy nátıjeler estilgende «Máńgilik Eldiń» túngi aspany jarqyrap, aınala túgel ot-shashýǵa bólendi. Osy sát jastar jarysa aıqaılasyp, óz tańdaýlarynyń, óz senimderiniń oryndalǵanyna qýanysyp, qıqýlasyp ketti. Mine, el bolashaǵyna, óz bolashaqtaryna senimmen qaraǵan jastardyń Elbasyna degen senimi osylaı bolsa kerek-ti. Jastardyń júzderi nurǵa bólenip, «Jasasyn Qazaq eli!», «Alǵa, Qazaqstan!» degen urandar búkil qazaq dalasyn sharlap ketkendeı áserge bóledi. Jeńistiń týyn jelbiretken shara odan ári Qazaqstannyń tanymal estrada juldyzdarynyń án-shashýlarymen jalǵasty. Munymen qosa, atalǵan monýment alańynan bastap biryńǵaı aq tústi kólik mingen qala jastary Qazaqstannyń Memlekettik týyn kóterip, avtokólik sherýimen elorda kóshelerimen júrip ótti. Dınara BITIKOVA, «Egemen Qazaqstan».