Keshe elimizdiń barlyq óńirlerinde Qazaqstan Respýblıkasy Prezıdentiniń saılaýy asa joǵary uıymshyldyqpen ótti

ALMATY Kezekten tys prezıdenttik saılaýǵa Almaty qalasynyń jurtshylyǵy bir kisideı tań azannan qatysyp, qala aýdandarynda ótkizilgen jeksenbilik oıyn-saýyq meıramdaryna barýǵa da ýaqyt tapty. Bul kúni qalada ádettegideı jeksenbilik kóńil-kúımen qatar, merekelik ekpin, qala turǵyndary men qonaqtarynyń janyn jadyratar jaǵdaı tolyqtaı saltanat qurdy. Almaty qalasy boıynsha saılaý kúni halyqtyń 17,25 paıyzy, ıaǵnı turǵylyqty halyqtyń qalalyq turaqty býyny óz daýysyn berip úlgerdi. Bul az kórsetkish emes. Qalaǵa keıinnen kelip qosylǵan, qala mejesinde tirkelgen qalalyqtar toby tolassyz daýys berý ortalyqtaryna bas suǵý arqyly, buǵan deıingi tirkelgen mejeni edáýir alǵa jyljytty. Bul saılaý barsha el úshin jaýapty da saıası serpilis jasaý múmkindigi ekenin qaladaǵy árbir saılaý ýchaskesine aǵylǵan jurt aıqyndady. Almaty qalasyndaǵy jańadan ashylǵan Alataý aýdanynyń turǵyny 100 jastaǵy keıýana Mámılııa Álim­baevanyń (sýrette) «Shańyraq» shaǵyn aýdanyndaǵy №26 mektep zalyna, №20 saılaý ýchaskesine óz aıaǵymen kirip kelýi­niń ózi saılaýǵa qatysýshylardy bir ser­piltip tastady. Sol jerdegi top 100 jasaǵan anamen sýretke túsip, estelik  úshin ana batasyn alýǵa asyqty. M.Álim­baeva apamyz óziniń azamattyq paryzy – daýys berý quqyǵyn oryndaı otyryp, saılaý ýchaskesindegi jamaǵatqa óz basynan keshirgen ǵumyrlyq shejiresinen habar berip, barsha qaýymǵa, búgingi saılaýǵa túsip jatqan azamattardyń barshasyna tilek tilep, bata berdi. Sosıalıstik Eńbek Eri, 7 bala, 25 nemere, 16 shóbere, 7 shópshektiń uly anasy Mámılııa apa Qazaqstan memleketiniń búgingi shyqqan belesi men baǵyndyrǵan bıikterine úlken qýanyshyn bildire otyryp, alda Qazaq eliniń asar asýy men jeter jeńisiniń moldyǵyna bek senimdi ekenin málimdedi. AQTAÝ Saılaý kúni Mańǵystaý oblysynda 177 saılaý ýchaskesi jumys jasady desek, sonyń 57-i oblys ortalyǵy Aqtaý qalasynda ornalasty. Bizge qyzmetimizge oraı, osy ýchaskelerdiń birnesheýine bas suǵyp, saılaý barysy men saılaýshylar qatysyn ańǵarýǵa múmkindik týdy. Qurylǵanyna shırek ǵasyrdan astam ýaqyt ótip, birneshe orta býyn mamandardyń tusaýyn kesken Mańǵystaý gýmanıtarlyq kolledji ǵımaraty óziniń qaı merekeni de jasantyp-jandyryp jiberetin daǵdysyna saı bul kúnge erekshe daıyndyqpen kelipti. Aýlasyn bildeı úsh jeke kásipkerdiń jáne ózderiniń stýdenttik ashanalarynyń jármeńkesine aınal­dyrǵan kolledj mańy abyr-sabyr adam. О́ıtkeni, munda №141 saılaý ýchaskesi ornalasypty. Tańerteń saılaýdy saltanatty jaǵdaıda bastaǵan atalǵan ýchaske jasy 18-ge tolyp, alǵash ret saılaýǵa kelgen 6 jasty quttyqtap, arnaıy syılyqtar tapsyrǵan. Patrıottyq án-áýen terbegen ádemi kóńilmen dálizge engenderdi tııanaqtylyq pen tazalyq lebi esken ýchaskeden komıssııa músheleri yqylaspen qarsy alýda. – Bizdiń ýchaskemizge 1734 saılaý­shy tirkelgen. Tórt saǵattan astam ýaqytta 600-ge jýyq adam kelip óz tańdaý­laryn jasady. EQYU-dan, TMD mıssııasynan jáne otandyq baıqaý­shylar da kelip, saılaý barysyn óz kózderimen kórdi. Eshqandaı saılaý zańdy­lyqtaryn buzatyn áreketter oryn alǵan joq, – dedi atalǵan saılaý ýchaskesiniń tóraǵasy, Mańǵystaý gýmanı­tarlyq kolledjiniń dırektory Mázilbek О́tebaev. Mázilbek Nur­bosyn­ulynyń bul sózin «Kaspıı» qoǵamdyq komıssııasynyń ókili – baıqaýshy Ryskúl Eseýova da maquldady. Qyzyldy-jasyldy bezendirilip, búıirdegi esikten samal esken keń zalda kelýshilerdi qarsy alyp, árqaısysyn óz úıleri tirkelgen ústelderden bıýlleten alýǵa siltep júrgen bul ýchaskeniń tyńǵylyqty tirligi Aqtaýdaǵy barlyq ýchaskelerde qaıtalanyp jatty. Sýretti túsirgen Talant QUSAIYN. AQTО́BE Qazaqstan Respýblıkasy Prezıdentiniń kezekten tys saılaýy oblysta belsendilikpen bastaldy. Saılaý kúni 14 aýmaqtyq komıssııa jumys istep, 521 saılaý ýchaskesi esigin aıqara ashty. Aqtóbelikter saılaýdy aıryqsha saıası mańyzdy oqıǵa retinde baǵalap, asqan uıymshyldyq tanytty. Saılaýǵa 448 myńnan astam adam qatysty. Bul saılaýǵa alys-jaqyn shetelderden kóptegen baıqaýshylar keldi. Solardyń 19-y kórshiles Orynbor oblysynan. Qaladaǵy №19 orta mektepte eki saılaý ýchaskesi ornalasqan eken. Biz barǵan №61 saılaý ýchaskesinde tańǵy 07.30-da 50-den astam saılaýshy óz tańdaýlaryn jasap úlgergenin bildik. Munda alǵash daýys berýshige, sondaı-aq, eń qart saılaýshyǵa qurmet kórsetilip, syı-sııapat jasalǵan. Saılaý ýchaskesinde merekelik kóńil-kúı baıqalady. Saılaý komıssııasynyń tóraıymy Roza Amanbaeva saılaýshylardyń aldy erteletip kelgenin jetkizdi. Ásirese, qarttar jaǵy belsendilik tanytqanyn alǵa tarta sóıledi. Al 62 saılaýshyǵa úılerine baryp, daýys berýge múmkindik týǵyzylǵanyn atap ótti. Osy saılaý ýchaskesinde alǵash ret daýys bergen Gúlmıra Amanjolova óz tańdaýyn jasaǵanyna qýanyshyn bildirdi. Osynda ornalasqan №60 saılaý ýchas­kesinde kezekten tys prezıdenttik saı­laý ótýine baılanysty saılaýdy baıqaý jónindegi respýblıkalyq qo­ǵamdyq komıssııanyń oblystyq fı­lıa­lynyń baıqaýshysy Ásııa Rah­ma­no­vany kezdestirip sózge tarttyq. Ol saı­­laýdyń ýaqtyly bastalǵanyn, esh­qan­­­daı zań buzýshylyq bolmaǵanyn jetkizdi. Metallýrgter Mádenıet úıinde ornalasqan №38 saılaý ýchaskesine kelgenimizde, adamdardyń qarasy kóp boldy. Munda kúndizgi 11.00 saǵatta saılaýshylardyń 52 paıyzy daýys berip úlgeripti. Bul metallýrgterdiń eńbekte ǵana emes, qoǵamdyq-saıası ómirde de bel­sendiligi joǵary ekenin taǵy bir ań­ǵartty. №38 saılaý ýchaskesinen Reseı­den kelgen TMD Baıqaýshylar mıssııa­synyń ókili, Orynbor oblysy úki­metiniń vıse-gýbernatory, ishki saıasat bólimi tóraǵasynyń orynbasary Oleg Dımovtyń saılaýdyń uıymshyldyqpen taza jáne ádil ótip jatqany týraly pikirin estip, marqaıyp qaldyq. Aqtóbelikter prezıdenttik saılaýǵa bir kisideı uıymshyldyqpen qatysty. Jalpy, oblys boıynsha keshki 19.00-de saılaýshylardyń 95,5 paıyzy daýys berip úlgerdi. Sýretti túsirgen Haırıldın RAÝShANOV. ATYRAÝ Munaıly óńirdiń turǵyndary pre­zıdenttik saılaýǵa atústi qaraǵan emes. Bul joly da azamattyq belsen­­­diliktiń úl­gisin kórsetken 304 593 saılaýshy 232 saı­laý ýchaskesinde óz tańdaýyn jasa­ýy tıis bolsa, kúndizgi saǵat 12.00-ge deıin olar­dyń 47,54 paıyzy daýys berip úlgerdi. Dál osy ýaqytta daýys berýde Isataı (72,41%), Qyzylqoǵa (58,38%) jáne Qurmanǵazy (55,08%) aýdan­d­arynda saılaýshylardyń daýys berý belsendiligi aıryqsha baıqalyp otyrdy. Oblystyq saılaý komıssııasy tór­aǵasynyń orynbasary Tamar Aman-Tur­lınanyń aıtýynsha, osydan keıingi eki saǵat­tyń ishinde, ıaǵnı kúndizgi saǵat 14.00-ge deıin daýys berýshilerdiń qata­ry 73,41 paıyzǵa jetti. Keıbir saılaý ýchas­­kelerinde adamdardyń daýys be­rý úshin kezekke turǵanyna ózimiz kýá boldyq. – Táýelsiz Qazaqstanymyzdyń eko­no­­mıkalyq órkendeý qarqyny sátti jal­­ǵasýy úshin daýys berdim. Bul – meniń aza­mattyq paryzym. Sebebi, men Qazaq­stannyń keleshegi jarqyn bol­ǵa­nyn, qýatty memleketke aınalyp, báse­kege qabi­letti 30 eldiń qatarynan oryn al­ǵa­nyn qalaıtyn patrıottyń birimin, – degen pikirimen bólisti myńdaǵan munaı­shynyń biri Batyrjan Mızamǵalıev. Atyraýda daýys berý bastalysymen saılaý ýchaskesine asyǵa jetkenderdiń biri – Gúldana Elemesova. Qazir ol H.Dosmuhamedov atyndaǵy Atyraý memlekettik ýnıversıtetinde ekonomıka jáne quqyq fakýltetiniń 2-kýrsynda oqıdy. Dál osy kúni alǵash ret óz tańdaýyn jasaǵan jalyndy jastardyń qatarynda burnaǵy kúni 18 jasqa tolǵan atalǵan oqý ornynyń taǵy bir stýdenti Imanǵalı Tólepov te bar. Sonymen birge, Atyraý qalasyna taıaý ornalasqan Tomarly aýylynyń 104 jastaǵy turǵyny Nyshan Jubaeva da óz tańdaýyn jasady. Bul kúni Atyraýdaǵy áskerı bólimderdiń sardarlary men sarbazdary, Kaspıı teńiziniń tórinde eńbek etip júrgen munaıshylar da daýys berdi. Keshki saǵat 20.00-degi málimet boıynsha daýys berýge quqyly atyraýlyqtardyń 97,75 paıyzy el keleshegi úshin mańyzdy tańdaýyn jasap úlgerdi. Bul kúni saılaý ýchaskelerinde kórkemónerpazdardyń ásem áni áýelep, myń buralǵan bıshiler sazdy áýenniń yrǵaǵymen terbetildi. Sýretti túsirgen Rahym QOILYBAEV. KО́KShETAÝ О́zimiz daýys berýge tirkelgen №6 saılaý ýchaskesine tańǵy saǵat 6.30-da kelgenbiz. Qyryqshaqty adam jınalyp qalǵan eken. Aralarynda 18 ben 25-tiń shamasyndaǵy jastar qalyńdaý. Kóbisin tanımyn. Júzderi jarqyn, jyly amandasyp jatyrmyz. Shýaqty kún merekelik aýandy ala kelgendeı jelpinis bar. Qaladaǵy №1 mekteptiń esigi týra 7.00-de ashyldy. Qazaqstan Res­pýb­lıkasynyń Ánurany oınaldy. Keń zaldyń tórinde táýelsiz elimizdiń Mem­lekettik nyshandary kóz tartady. Munda daýys berýshilerge komıssııanyń bes múshesi alfavıttik tártippen qyzmet kórsetedi, kógildir shymyldyqty bes kabına jabdyqtalǵan. Ýchaskelik saılaý komıssııasynyń tóraıymy Irına Golovchenko óz árip­tes­terimen jáne Saılaýdy baıqaý jónin­degi qoǵamdyq komıssııanyń múshesi Vıktor Geıdiń qatysýymen daýys berý bıýlletenderi salynǵan seıfti ashyp, daýys berý jáshigin mórmen bekit­ti. Mu­nyń barlyǵy komıssııanyń №1 qaý­lysynda kórinis taýyp, ilinip qoıyldy. Tóraıymnyń aıtýy boıynsha daýys berýge 2635 adam tirkelse, 40 kisige jol júrýine baılanysty saılaýǵa ózge óńirlerde qatysýǵa ruqsat berilipti. Saılaýshylardyń 12-si mańyzdy naýqanǵa tuńǵysh ret qatysady eken. Sondaı-aq, 31 kisi jyljymaly daýys berý jáshiginiń qyzmetin paıdalanady. Kókshetaýdaǵy S.Seıfýllın kóshesindegi 13-úıdiń, 20-páterinde turatyn stýdent Haırat Aıdyn birinshi bolyp daýys berdi. Jurtshylyq oǵan qoshemetpen qol soqsa, ýchaske tarapynan arnaıy syılyq tapsyryldy. Al A.Myrzahmetov atyndaǵy ýnıversıtettiń 3-kýrs stýdenti Keńes Móldir ata-anasymen birge júzi bal-bul janyp daýys berdi. Osy ýchaskede daýys bergen Aqmola oblysynyń ákimi Sergeı Kýlagın jurtshylyqty el taǵdyryndaǵy mańyzdy oqıǵamen quttyqtady. Saılaý barysyn baıqaýǵa qatysyp otyrǵan nurotandyq Boranbaı Begalın men Á.Qusaıynovtyń ókili Serik Esmaǵambetovti sózge tartqanymyzda, aıtýly sharanyń joǵary deńgeıde uıymdastyrylǵanyn, daýys berýdiń belsendilikpen ári zańdylyqqa saı ótkizilgenin atap kórsetti. Sýretti túsirgen Tólegen QOSShYǴULOV. QARAǴANDY Oblysta saılaý úlken belsen­dilikpen qatysý ústinde ótti. 784 saılaý ýchaskesine tirkelgen 800-myńǵa jýyq daýys berýshiniń saǵat 20.00-ge deıin 97, 21 paıyzy óz tańdaýlaryn jasady. Barlyq jerde saılaý saltanatty rásimmen ashyldy. Qaraǵandy qala­­syndaǵy Kenshiler Mádenıet saraıyn­daǵy №17 saılaý ýchaskesinde óz tańdaý­laryn jasaýǵa erteletip kelýshi­lerdi «Qyzyl Juldyz» ordeni men medaldardyń ıegeri, tyl ardageri, podpolkovnık Rahmetolla Ospanov aqsaqal el ómirindegi mańyzdy saıası oqıǵamen quttyqtap, alǵashqy bolyp daýys berdi. Saılaýǵa birinshi ret qatysýshy Qaraǵandy memlekettik tehnıkalyq ýnıversıtetiniń stýdenti Amanǵalı Rahımov jastar arasynan osyndaı qurmetke ıe boldy. «Men ózimniń, elim­niń bolashaǵy úshin daýys berýge keldim. Qalaýymdy úmitkerlerdiń qaısysyna jasaý úshin kóp tolǵandym. Sheshimim durys boldy dep oılaımyn», – dedi ol. Oblys ortalyǵyndaǵy №53 saılaý ýchaskesine tirkelgen saılaýshylar da belsendiligi esigi ashylǵan ýaqyttan joǵary boldy. Osynda TMD Baıqaýshylar mıssııasynyń basshysy Oleg Soskoves bolyp, daýys berý barysymen tanysty. Sý tasqynynan zardap shekken eldi mekender turǵyndary da qalaýlaryn bildirýge zor ynta tanytty. Nura aýdanyndaǵy Jańaqurylys aýylyna saılaý komıssııasynyń mú­sheleri bıýlletenderdi qaıyqpen alyp baryp, daýys berýge jaǵdaı jasady. Halyqaralyq jáne jergilikti baıqaýshylar saılaý ýchaskelerinde bolý kezinde daýys berýdiń el zańnamasyna sáıkes esh zań buzýshylyq ótýine joǵary baǵa berip, saılaýǵa qatysýshylardyń azamattyq paryzdaryn óteýge degen bıik jaýapkershilik kórsetýin atady. Saılaýdyń naqty qorytyndy­sy shyǵýyna baılanysty oblys orta­lyǵyndaǵy Muz aıdynynda saıası par­tııalar, qoǵamdyq uıymdar, qala jurt­shylyǵy ókilderiniń saltanatty bas qosýy ótti. QOSTANAI «Tynyshtyq kúni» Qostanaıda kóktemniń ókpek jeli turdy da, saılaý kúni tańerteńnen aq jańbyr jaýsyn kelip. Qolshatyryn ustap, saılaý­ǵa aǵylǵan jurt. Barlyq saılaý ýchaske­lerinde elimizdiń gımni oınap, daýys berý saltanatty túrde bastaldy. №3 saılaý ýchaskesine «Sharq» tájik-ózbek etnomádenı birlestiginiń jetekshisi Ergashvoı Holmetov tańerteńgi 7.00 bolmaı keldi. Bıýlleten alýǵa alǵash­qy­lardyń biri bolyp otyrdy. Ústinde ala shapan, kesteli kóılek, basynda ala topy. Ol óz qalaýyn jasaǵannan keıin tildestik. «Qulpyryp ketipsiz da» deımiz. «Merekeniń úlkeni búgin! Barym­dy kıip keldim. Birinshi daýys bergender qatarynda saılaý ýchaskesiniń syılyǵyn da alyp turmyn. «Alla erte turǵanǵa nesibe shashady» degen osy. Al búgingi saılaý halyqtyń nesibesin túgendeıdi. Elimizdiń birligi, tynyshtyǵy úshin ­daýys berdim», – dedi Ergashvoı áká. Shynynda, saılaý Qostanaıda merekeden kem túsken joq. Pedagogıka kolledjinde ornalasqan №60 saılaý ýchaskesinde stýdentter qolynan shyqqan qolóner buıymdaryn qyzyqtama­ǵan saılaýshy qalmady. Pedkolledj aýlasynda stýdentter jańbyrǵa qaramaı flesh-mob bıledi. Saılaý osy jastardyń baqytty bolashaǵy úshin ótip jat­qanyna qýanysh bildirgendeı áser qaldyrdy. Barlyq saılaý ýchaskeleri uıym­dastyrý ja­ǵy­nan básekege túsken­deı, óte mańyz­dy sharany shynaıy, qy­zyq­ty ótkizý­ge umtylǵany bilinip-aq tur. Saılaý ýchaskeleriniń barlyǵynda derlik túrli jastaǵy saılaýshylardyń túske qaraı kezegi qalyptasty. №21 saılaý ýchaskesine Uly Otan soǵysynyń ardageri, ataqty temirjolshy, 92 jastaǵy Bertran Rýbınshteın kelgende kezekte turǵan saılaýshylar jarylyp jol berdi. – Men kópti kórgen adammyn. Elge aldymen tynyshtyq kerek, onyń baǵasyn aınalamyzdaǵy jurttar jaqsy sezinip otyr. Ekonomıka damyp keledi. Men tańdaýymdy jasadym jáne durys tańdaý ekenine senimdimin, –dedi Bertran Iosıfovıch. Oblystyq saılaý komıssııasy túski saǵat 12.00-de saılaýshylardyń 55 paıy­zynan astamy, saǵat 16.00-de 80 paıyzy, keshki saǵat 18.00-de 91 paıyzdan asyp ketkenin habarlap otyrdy. Respýb­lıkalyq, jergilikti jáne syrttan kelgen baıqaýshylardyń barlyǵy da eń aldymen saılaýshylardyń belsendiligine tańdaı qaǵýmen boldy. Saılaý kúngi jańbyr aspannan jaýǵan nurdaı sezildi. Al aǵashtar dúr etip búrshik atqaly tur. Saılaýdan keıingi ómir sekildi... QYZYLORDA Tańsáriden saılaý ýchaskeleriniń aldy halyqqa toly boldy. Saǵat tili 7:00-di soqqanda barlyq ýchaskelerde Ánuran oryndalyp, saılaýshylar daýys­ bere bastady. Jalpy, Qyzylorda oblysy boıynsha 397 885 adam saılaýǵa qatysa alady. Bul – shamamen aımaq hal­­qynyń jartysynan astamy degen sóz. Saılaýǵa aqsaqaldy qarııalar men aq jaýlyqty analardan bastap jańa ǵana otbasyn quryp, nekege turǵan jas jubaılar men ómirinde tuńǵysh ret daýys berý quqyna ıe bolǵan azamattarǵa deıin belsendi túrde qatysty. Olar úshin óńirde 345 saılaý ýchaskesi jumys istedi. Túski saǵat 14:00-de saılaýǵa halyq­tyń 73,13 paıyzy qatysty degen aqparat aldyq. Arada eki saǵat ótkennen soń 346 698 adamnyń daýys bergendigi jóninde derek keldi. Iаǵnı, tústen keıinniń ózinde qyzylordalyq saılaýshylardyń 87,5 paıyzy daýys berip úlgergen edi. Osydan-aq halyqtyń el ómirindegi eleýli oqıǵaǵa enjar qaramaı, saılaýǵa óte belsendi qatysqanyn baıqaýǵa bolady. Osy arada saılaýdyń merekelik kóńil-kúıde ótkenin aıtqan abzal shyǵar. Mysaly, Qyzylorda qalasynyń turǵyndary nóserlep jaýǵan jańbyrǵa qaramaı saılaý ýchaskelerine baryp, óz tańdaýlaryn jasady. Munyń ózi elimizde saıası mádenıettiń kún sanap artyp kele jatqanyn dáleldese kerek. – Dál qazir Qyzylorda oblysy boıynsha ornalasqan barlyq 345 saılaý ýchaskesinde daýys berý prosesi aıaqtaldy. Tizimge ilingen saılaýshylardyń 97,5 paıyzy saıası naýqanǵa tolyqtaı qatys­ty. Bul qyzyl­ordalyqtardyń saıası belsendili­giniń artqanyn, el bolasha­ǵyna beıjaı qaramaıtynyn ańǵar­tady degen oıdamyn. Saılaý barysyn­da eshqandaı zań buzýshylyq tirkel­gen joq. Baıqaý­shylar tarapynan da syn-eskertpeler aıtylmady. Saıası naýqan óte joǵary deńgeıde ótti, – dedi Qyzylorda oblys­tyq saılaý komıssııasynyń tóraǵasy Qorǵanbek Qaırollaev. ORAL Elimizdiń batystaǵy qaqpasy – Oral óńirinde el erteńin aıqyndaıtyn eleýli kún – prezıdenttik saılaý kúni joǵary azamattyq belsendilik pen órshil kóńil-kúı jáne jarqyn da shat-shadyman mereke jaǵdaıynda ótkizildi. Eger biz bıylǵy 2015 jyldyń 26 sáýiri eldigimizdiń taǵy bir synǵa túsken, memlekettiligimizdiń mereıin ósirý úshin taǵy bir arshyndy qadam jasalǵan kún boldy dep sanasaq, osy synaqtan Jaıyqtyń boıyn jaılaǵan qalyń el de asqaq abyroımen shyǵa bilgeni anyq. Búginde dálelsiz, qısynsyz aıtylǵan sózdiń qadir-qasıeti men eshqandaı baǵasy joq. Iаǵnı, aldyńǵy aıtylǵan qorǵasyndaı salmaqty oı-pikirimizdi Batys Qazaqstan oblystyq saılaý komıssııasynan alynǵan sońǵy derektermen baıyta túser bolsaq, taǵy da kóńil shirkin odan ári toǵaıa túsedi. Mysaly, Oral óńiri aýmaǵynda keshe túski saǵat 12-00-ge deıin oblys boıynsha daýys berý úshin tirkelgen 404 myń 465 saılaýshynyń 40 paıyzdan astamy óz tańdaýlaryn jasap úlgerdi. Budan soń tústen keıingi saǵat 14.00-de bul paıyzdyq kórsetkish 67,13-ti qurady. Keshki saǵat 20.00-de, ıaǵnı óńirdegi daýys berý úderisteri qorytyndylanar kezde bul kórsetkish 100 paıyzdyq mólsherge ıek artqany bıik nátıje ekenine talas joq. – Buǵan deıingi respýblıkada ótkizilgen elektorattyq naýqandarmen salystyrǵanda, bıylǵy prezıdenttik saılaýdyń basty ereksheligi – onyń zańdylyǵy men móldirligin saqtaý jáne qadaǵalaý úshin otandyq jáne sheteldik baıqaýshylardyń úlken  jáne qalyń toptary qatysýynda. Oblysta olardyń sany myńnan asyp tústi. Onyń 14-i Eýropadaǵy qaýipsizdik jáne yntymaqtastyq uıymy delegasııalary atynan kelip, óńirdegi prezıdenttik saılaýǵa ázirlik pen onyń ótý barysyna jáne uıymdastyrylý deńgeıine oń baǵa berdi. Aımaqta ótkizilgen daýys berý úderisteriniń taǵy bir ózgesheligi saılaýshylar tizimderin túbegeıli túgendeý úshin árbir saılaý ýchaskesi halyqqa qyzmet kórsetý ortalyqtarymen baılanystyryldy. Bul úshin saılaý qosyndaryna arnaıy baılanys telefondary ornatyldy, – dedi gazet tilshisine Batys Qazaqstan oblystyq saılaý komıssııasynyń tóraǵasy Ǵaısa Qapaqov. Sýretti túsirgen Rafhat HALELOV. О́SKEMEN Shyǵys óńiriniń turǵyndary prezı­denttik saılaýǵa qatysýda joǵary bel­sendilik tanytty. Ony oblys orta­lyǵyndaǵy gýmanıtarlyq kolledjde ornalasqan №79 saılaý ýchaskesine tańǵy saǵat 7.00 bolmasa da turǵyndardyń molynan jınalyp, ýchaskeniń ashylýyn taǵatsyzdana kútkeninen ańda­dyq. Ýchaskeler Ánuranmen ashylyp, jınal­ǵan qaýymǵa daýys berý tárti­bi túsin­­dirildi. Bıylǵy erekshelik – erte daýys bergen azamattarǵa, alǵash ret daýys berýshilerge jáne balala­ry­men kelgen otbasylarǵa arnaıy syı­lyqtar úlestirildi. Barlyq saılaý ýchas­kelerinde balalardyń shyǵarmashylyq ujym­darynyń qatysýymen konsert­tik baǵdarlamalar men kishigirim saýda-sat­tyq, doıby, shahmat oınaıtyn oryndar uıymdastyryldy. Densaýlyǵyna baılanysty kele almaǵan ardagerler men zeınetkerler úıde daýys berdi. О́skemendegi Jibek matalar kombınaty shaǵyn aýdanynyń 80 jastan asqan turǵyndary Shernııaz Jamanbaev pen Sholpan Kábdikárimqyzy atalǵan kómekti paıdalandy. Erli-zaıypty eńbek ardagerleriniń bıýlle­tenderin №4 saılaý ýchaskesi komıssııa­sy tóraıymynyń orynbasary Rýlan Nysaınov alyp keldi. «1954 jyldan bastap daýys berip kelemin. Buryn saılaý ýchaskelerine óz aıaǵymmen baryp daýys beretin edim. Bıyl densaýlyǵym kótere almaǵandyqtan, ótinish jazdym. Balalardyń baraqatty, bereketti ómiri men keleshegi úshin tańdaýymyzdy jasadyq», – dedi Sholpan áje. Tarbaǵataı aýdanynda dúnıege kelgen qos qarııa 8 bala ósirip, 12 nemere men 4 shóbere súıip otyr. A.Baıtursynov atyn­daǵy mektepte ornalasqan №82 saı­laý ýchaskesinde «Altyn belgiden» úmit­ker oqýshy Saǵynysh Baıanbekova tuń­ǵysh ret óz tańdaýyn jasap, daýys berdi. Oblystyq saılaý komıssııasy tór­aǵasynyń orynbasary Aleksandr Rý­kınniń aıtýynsha, óńir halqynyń saılaýǵa qatysý deńgeıi óte joǵary bolǵan. «Keshe saǵat 16.00-degi máli­met boıynsha shyǵysqazaqstandyq saı­laýshylardyń 89,5 paıyzy daýys berdi. Onyń ishinde Katonqaraǵaı – 99,5, Bo­rodýlıha 98,8 jáne Besqaraǵaı 98,6 paıyz jınap, aýdandar arasynda aldyńǵy úshtikten kórindi. Daýys berýdiń tolyq qorytyndysy boıynsha bul tizim ózgerýi de múmkin», – dedi A.Rýkın. PAVLODAR Oblys ortalyǵyndaǵy №59 saılaý bólimshesine búgin tańǵy 7-de ashylǵan ýaqyttan bastap alǵashqy saı­laýshylar daýys bere bastady. Bári de kóterińki kóńil-kúıde. Osy ýchaskede alǵashqylardyń biri bolyp daýys bergen zeınetker Valentına Vershı­nınanyń jasy 80-de eken. Qart saı­laýshy qobaljyp, kóńili bosap, kózine jas aldy. «Osy jasqa jetemin, daýys be­remin dep kim oılapty», – deıdi. Pav­lodarǵa sonaý bir jyldary Tomskiden oqý bitirip joldamamen kelipti. Uzaq jyldar «Energo» ortalyǵynda energetıka salasynda qyzmet etipti. Bul kúnniń ózi úshin de, qazaqstandyqtar úshin de mańyzdy kún ekenin aıtty. Al saılaý ýchaskesiniń tóraǵasy Nurbol Omarovtyń aıtýynsha, barlyq qazaqstandyqtar úshin erekshe este qalatyn kún ekenin saılaýshylardyń saılaý bólimshesi ashyla salysymen erte kelgen belsendilikteri, el taǵdyry úshin beıjaı qarmaıtyndary aıqyn ańǵartady. Birinshi kelgen jáne 18 jasqa bıyl tolyp, birinshi ret daýys­ berýge qatysyp otyrǵan azamat­tar­ǵa belsendilik tanytqandary úshin syı­lyqtar berildi. Oblys ortaly­ǵy­nyń jastary da búgin erekshe belsendilik kórsetýde. Oblystyq saılaý komıssııasynyń tóraıymy Álııa Sabyrhanova tańerteń oblys ortalyǵyn aralap shyqqan kezde saılaý bólimshelerinde daýys berýge saılaýshylar kóptep kelip jatqanyn kórgen. «Aǵa urpaq ókilderimen qatar, bizdiń jastarymyzdyń ózderiniń azamattyq kózqarastaryn, jaýapkershilikterin tanytyp jatqandary qýantty. Jalpy, oblystyń barlyq aýyl, aýdan ortalyqtary, qalalary jaqsy belsendilik kórsetti. Ony bizder ózimizge aýdandardan kelgen fotosýretter arqyly da kóz jetkizip otyrmyz», – dedi Á.Sabyrhanova. Bizdiń kelesi kelgen №79 saılaý ýchaskesinde de belsendilik kórinip turdy, ádemi kıimderin kıinip, qýanysh­ty kóńil-kúıde kelip jatqan qala turǵyndary kóp edi. Saılaýdyń barysyn baqylap otyrǵan baıqaýshylar da eshqandaı zań buzýshylyqtardyń oryn almaǵanyn, bári de qalypty jaǵdaıda ótkenin aıtyp jatty. PETROPAVL Tańmen talasa turǵan soltústikqa­zaq­standyqtar erekshe merekelik kóńil-kúımen saılaý ýchaskelerine kele bastady. Saǵat tili tańǵy saǵat 7-ni kórsetkende, oblystyq balalar jáne jasóspirimder shyǵarmashylyq ortalyǵynda ornalasqan №644 saılaý ýchaskesiniń esigi aıqara ashyldy. Dúbirli doda bastalmaı jatyp jınalǵandardyń qarasy qalyń. Memlekettik Ánuran oınalǵannan keıin saılaý komıssııasynyń tóraǵasy Qanat Sádýaqasov saılaýshylardy daýys berýge shaqyrdy. О́z kózqarasyn aıqyndaýǵa kelgen Marııa Leonova keıýana daýys berýge kezeksiz ótkizilip, óz mıssııasyn atqaryp bolǵannan keıin arnaıy syılyq tartý etildi. Sóıtse, dál osy kúni tyl eńbekkeri 80-niń seńgirin eńsergen eken. О́ńirde «ov-tan» birinshi bolyp qu­tylǵan Altaı Qojahmet aǵamyz da daýys berýge aldyńǵylardyń qatarynda jetipti. Qazaqtyń oıýly shapanyn, oqaly qalpaǵyn kıgen ǵalym aǵamyz abyz aqsaqaldan aýmaı qalypty. Bir-birimen qatar ornalasqan №684 jáne 685 saılaý ýchaskelerinde de saılaýshylardyń belsendiligine kóz jetkizdik. Mundaǵy jaýapty adamdardyń aıtýyna qaraǵan­da, ár ýchaske boıynsha tizimge 2300-den astam saılaýshy engizilip, 10 kabınadan qoıylǵan. 90 adam úıden daýys bergen. Birqatar saılaý oryndaryn aralaǵannan keıin jolaı oblystyq saılaý komıssııasyna soǵyp, mańyzdy naýqannyń ótý barysymen jete tanysýdy uıǵardyq. Komıssııa tóraǵasy Asqar Saqypkereev saılaý ýchaskesi aýmaǵyndaǵy turǵylyqty mekenjaılar boıynsha 380 myńnan astam adam tizimge alynyp, 709 saılaý ýchaskesinde óz tańdaýlaryn jasap jatqandaryn jetkizdi. Demalys úılerinde, emhanalarda, qarǵyn sý shaıǵan, qatynaýy qıyn eldi mekenderde uıymdastyrý sharalary tyńǵylyqty qarastyrylǵan. Júrip-turýy qıyn adamdar úshin 141 kóshpeli jáshik qyzmet kórsetti. Saǵat 18-de Aıyrtaý aýdanynda issaparmen júrgen halyqaralyq baıqaýshy Matveı Bergmanmen uıaly telefon arqyly habarlasqanymyzda saılaýdyń ashyq, ádil ótip jatqanyn saılaýshylardyń 97,5 paıyzy óz tańdaýlaryn jasaǵandaryn jetkizdi. Al oblys boıynsha bul kórsetkish 93,86 paıyzdy qurap, 98 ýchaskede támamdalǵany belgili boldy. Sýretti túsirgen Talǵat TÁNIBAEV. TALDYQORǴAN Jetisýlyqtar keshe ertelete saılaý ýchaskelerine asyqty. Búgingideı beımaral zamanda konstıtýsııalyq qu­qy­ǵyna saı tól mindetin oryndaýshylar parasattylyq pen mádenıettilik ta­nytty. Saılaý ýchaskelerine kelip-ke­tý­shiler myńdap sanalǵanymen, adam­dar­ ara­syndaǵy syılasymdylyq, úlken­ge kórsetilgen meıirimdilik pen kishi­ge­­ jasalǵan iltıpat kórgen jandy súısintti. Osyǵan deıingi saılaýlarmen sa­lystyrǵanda, búgingi Qazaqstan Respýb­lıkasynyń Prezıdentin saılaýǵa halyqtyń qatysý belsendiligi joǵa­ry­lap, mádenıettiliktiń tamasha ári úı­lesimdi qyryn kórsetti. Bul – qýana quptarlyq jaıt. 26 sáýir kúni tańǵy saǵat 7.00-de Almaty oblysy boıynsha 883 saılaý ýchaskesi saılaýshylarǵa esikterin aıqara ashty. Mine, saǵat 20.00-de oblys boıynsha saılaýǵa qatysatyndyǵy anyqtalyp, tirkelgen 945 708 saılaýshynyń basym bóligi, ıaǵnı naqty aıtqanda, 98,48 paıyzy daýys berdi. Eldiń bul saılaýǵa degen belsendiliginiń artýy respýblıkamyzdaǵy áleýmettik-ekonomıkalyq jaǵdaıdyń jaqsarǵanyn jáne halyqtyń saıası belsendiliginiń kóterilgendigin kórsetedi. TARAZ Jambyl – ejelden Máńgilik El ­ıdeıasynan týyndap otyrǵan ulttyq birlikti sanada saqtaǵan, tatýlyqtyń ordasy bolǵan óńir. Qazaqstan Prezıdentin saılaý Jambyl oblysynda óte uıymshyldyqpen ótti. Áýlıeatalyqtar bul naýqanda asqan belsendilik tanytty. Oblystaǵy 461 saılaý ýchaskesine el kúni boıy aǵylyp jatty. Osynaý jandardyń qýanyshty júzderinen bul saıası naýqannyń jaýapkershiligin sezinip, oǵan tyń daıyndyqpen kelgenin baıqaısyz. Sonyń biri retinde Taraz qalasyndaǵy №50 saılaý okrýgin aıtsaq bolady. Ýchaskede saılaýshylarǵa barlyq jaǵdaı jasalǵan. Aýlada ásem án shyrqalyp jatsa, ishte daýys berýshilerdiń keıbiri shahmat, doıby oıyndaryna qyzý kirisip ketipti. Sondaı-aq, saılaý ýchaskesi janynda saý­da dúńgirshekteri qoıylyp, el qajetti azyq-túlikterin satyp alýda. Al Taraz qalasyndaǵy №39 saılaý okrýgine alǵashqylardyń biri bolyp kelgen 78 jastaǵy Botabaı Maldybaev aqsaqal el taǵdyry sheshiletin jaýapty sátke beıjaı qaraı almaıtynyn aıtady. Búginde beınetiniń zeınetin kórip otyrǵan qarııa daýys berýge ájeı ekeýi kelipti. Al Jambyl polıtehnıkalyq kolledjiniń stýdenti Zahar Sharıpov óz tańdaýyn №35 saılaý okrýginde jasady. Bolashaq jylyjaı mamany Zahar osy naýqanǵa atsalysyp, daýys bergenine óte qýanyshty. «Tańerteń erte turyp, saılaý ýchaskesine jetkenshe asyq boldym, bul – men úshin úlken jaýapkershilik», –  deıdi ol. Jambyldyq saılaýshylardyń óz tańdaýlaryn jasaýda belsendilik tanytýy, árıne, olardyń bul jaýapty sátke asqan jaýapkershilikpen qaraıtynyn bildirse kerek. Birligi, yntymaǵy jarasqan eldiń halqy osyndaı uıymshyl bolady. Oblystyq saılaý komıssııasynyń má­limetine qaraǵanda, jambyldyq saı­­laý­­shylardyń 97,31 paıyzy daýys berdi. ShYMKENT Shymkent qalalyq saılaý komıs­sııasynyń tóraǵasy Erlan Bekturǵanov qaladaǵy №222 saılaý ýchaskesiniń 20-sy jabyq degen. Sebebi, mynadaı: jabyq saılaý ýchaskelerine aýrýhanalar, eki áskerı bólim, qarttar úıi jáne tergeý ızolıatorynda isi sotqa jetpegen azamattar kiredi. Al múgedek jandarǵa saǵat on ekige deıin arnaıy bólingen azamattar saılaý jáshigin aparady. Oblystyq klınıkalyq aýrýhanada naýqastar osynda uıymdastyrylǵan №125 saılaý ýchaskesinde daýys berdi. Búgingi tańda munda 675 adam em alyp jatyr eken. – Aýrýhana bolǵannan keıin osy ýchas­kege qınalmaı jetetin jaǵdaı jasadyq, – dedi №125 saılaý ýchaskesiniń komıssııa tóraǵasy Mamýrjan Saıpov. – Ár naýqasty óz bóliminiń medbıkesi alyp keledi. Úsh saǵattyń ishinde daýys berip boldyq desek te bolady. Oblystyq klınıkalyq aýrýhana ujymy tósek tartyp jatyp qalǵan 11 naýqasqa da saılaý komıssııasynyń músheleri men baıqaýshylardyń qaty­sýymen saılaý jáshigin alyp bardy. Shymkenttegi №49 saılaý ýchaske­siniń komıssııasy men baıqaý­­shylar da densaýlyqtaryna baılanysty úıinen shyǵa almaǵan azamattarǵa saılaý jáshigin alyp bardy. Solardyń biri qart maıdanger Qorǵanbaı Eleýov aqsaqal edi. El basyna kún týǵanda etigimen sý keshken, qandy qasaptan aman kelgen maıdanger ózi baryp daýys bere almaǵanyna ishteı qapa bolǵanymen, komıssııa kelgende qýanyp qaldy. – Biz eldiń tynyshtyǵynyń qadirin biletin janbyz. Kúndeı kúrkirep ótken so­ǵystyń mıllıondaǵan júrekterge sal­ǵan jarasy ál-ázir jazylmaıdy. Aspa­­nymyz ashyq bolyp, elimiz tynysh bol­ǵanǵa ne jetsin. Men tańdaǵan adam Ota­­nymyzdyń baǵyna týǵan jan dep túsi­­nemin jáne qatelespek emespin. Mundaı saılaýǵa nemquraıdylyqpen qaraýǵa bolmaıdy, sondyqtan úıdegi­ler­di erterek oıatyp, saılaýǵa jiberdim, – dedi ol. Tynyshtyq kúzetshisi, beıbit ómirdiń qadirin jaqsy biletin, prezıdenttik saılaýda qatelespeıtindigin aıtqan qarııanyń baılamy osy. Aıqarma betti daıyndaǵandar «Egemen Qazaqstannyń» menshikti tilshileri.