Shetelderde oqyp jatqan 400-den asa áskerı qyzmetshi óz daýystaryn berdi

Shet memleketterdiń joǵary oqý oryndarynda bilim alyp jatqan qazaqstandyq áskerı qyzmetshiler Qazaqstan Res­pýb­lıkasy Prezıdenti saılaýynda daýys berýge qatysty. Bul úshin on eldiń iri qala­larynda biryńǵaı saılaý ýchas­­keleri uıymdastyrylǵan bolatyn. Mysaly, Tver, Rıa­zan, Smolensk, Iаroslavl, Kras­nodar, Voronej, Kostroma qala­laryndaǵy áskerı joǵary oqý oryndarynyń kýrsanttary men tyńdaýshylary úshin biryńǵaı saılaý pýnkti Máskeýde ashyldy. Munda tań atysymen 159 áskerı qyzmetshi daýys berip úlgirdi. «Qazaqstan Prezıdentiniń saı­laýyna qatysý – bizdiń kons­tıtýsııalyq quqyǵymyz jáne azamattyq boryshymyz. Bul shara – el taǵdyry. Memleket basshysyn tańdaý arqyly biz óz bola­shaǵymyzǵa, tutastaı elimiz qadam basar jolǵa tańdaý jasaımyz. Men árbir qazaqstandyqtyń daýysy mańyzdy dep sanaımyn. Bizdiń árqaısymyz saı­laýǵa osy jaýapkershilikti túsine otyryp keldik. Týǵan eli­mizden jyraqta  júrsek te, onyń taǵdyry bizdi beı-jaı qal­dyrmaýy tıis dep oılaımyn»,  deıdi Reseı Federasııasy Qor­ǵanys mınıstrligi Áskerı ýnı­versıteti 5-kýrsynyń kýrsanty Danııar Janjúmenov. Osylaısha daýys berý bizdiń áskerı qyzmetshilerimiz júrgen basqa elderde de ótti. Olardyń ár­biri saılaý ýchaskesine jete alýy úshin kúni buryn barý jáne qaıtý ba­ǵyttaryna áýe jáne temirjol kó­likterine bıletter alynǵan bolatyn. Qazaqstan Respýblıkasy Pre­zıdenti saılaýyna Reseıde (248 adam), Belarýste (35 adam), Ýkraı­nada (19 adam), Túrkııada (73 adam), Ońtústik Koreıada (4 adam), AQSh-ta (8 adam), Qytaıda (30 adam), Uly­brıtanııada (1 adam), Ger­ma­nııa­da (1 adam) jáne Úndis­tanda (12 adam) áskerı joǵary oqý oryndarynda oqýda júrgen bar­lyǵy 437 qazaqstandyq kýrsant pen ofıser qatysyp úlgerdi. Or­na­lasqan jerlerine qaramastan, olar­dyń árqaısysy óz azamattyq boryshyn atqaryp, óz tańdaýyn jasady.