Qunanbaı О́skenbaıuly 1874-1875 jyldary el basqarý jumysyn balalaryna qaldyryp, rýhanı kemeldený jolynda qajylyq saparyna shyǵady. Jetpis bir jasqa jetkeninde jaqyn-jýyǵyn jıyp, «Qaǵybatolla, Mekke baryp, táýap etip qaıtamyn» dep jarııa etedi.
Bul týraly Qunanbaı shóberesi Árham Kákitaıuly tómendegideı derek keltiredi: «Abaı ózi basqaryp Mekke jaqtyń jolyn, jónin jazyp-syzyp berip, aýyzsha uqtyryp, jolǵa salyp jiberedi. Ol kúnde jol qatynasy óte qıyn, Semeıden at-arbamen shyǵyp, Qarqaralyǵa soǵyp, odan Omby qalasyna baryp poıyzǵa otyryp, Qara teńizden parahodqa otyryp kóp mıhnat kórip, bir aıdan asqanda Mekke qalasyna jetedi».
Shákárim Qudaıberdiuly Qunanbaı atasy Mekkede tákıe úıin turǵyzǵanyn derek qylady. Al M.Áýezov jazbalarynda qajylyqtan qaıtyp kelgen soń, «dúnıe sózin sóılemeımin» dep, eshbir janmen til qatyspaı, ońasha úıde shymyldyqtyń ishinde jalǵyz otyrǵany kezdesedi.
Sol qajylyq saparynan qaıtqanda Qunanbaı О́skenbaıuly ózine arnaıy taqııa tikkizipti. Taqııada qyzyl mataǵa gúl men japyraq beınesindegi kesteli órnekter salynǵan. Taqııa – Abaı mýzeıiniń eleýli eksponattar qoryndaǵy jádigerlerdiń biri. Mýzeı qoryna Abaıdyń shóberesi Baǵfýr Aqylbaev tapsyrǵan. Búginde taqııanyń kóshirmesi Abaıdyń Jıdebaıdaǵy mýzeı-úıinde kórermen nazaryna usynylǵan. Túpnusqasy Abaıdyń «Jıdebaı-Bórili» memlekettik mýzeı-qorynda saqtalǵan.
Abaı oblysy