Aqmola oblysynyń Aqmol aýylynda ornalasqan «Capital projects ltd» JShS jylyna 20 myń tonna qýattylyqpen taýyq etin óndirip kele jatyr. Kásiporynnyń «Kýrochka rıaba» brendimen shyǵaratyn ónimderi tutynýshylardyń aýqymdy suranysyna ıe. Memlekettik qoldaýdyń kómegimen jaqyn arada óndiris qýatyn 30 myń tonnaǵa deıin arttyrý josparlanyp otyr.
Kásiporyn taýyq eti men jumyrtqa óndirisiniń tolyq sıklin (analyq mal – ınkýbasııalyq jumyrtqa – ınkýbator – reprodýktor – taýyq eti jáne jumyrtqa – taratý) qurǵan «Shańyraq» kompanııalar tobyna kiredi. Sonymen qatar jem óndirý jáne eksporttaý úshin aýyl sharýashylyǵy daqyldaryn ósiredi. Kásiporyn eń az qaldyqpen jumys isteıdi, tipti taýyq syńǵyryǵy da daqyl ósirýde paıdalaný úshin organıkalyq tyńaıtqysh retinde óńdeledi.
Qazirgi ýaqytta salynyp jatqan maıly daqyldardy qaıta óńdeý jelisi jemshóp óndirisin 25 paıyzǵa arzandatýǵa múmkindik beredi. Bul taýyq jumyrtqasy men qus etiniń baǵasyna oń áser etedi, óıtkeni jem osy ónimderdiń ózindik qunynyń negizgi jáne eń qymbat quramdas bóligi bolyp sanalady.
Kásiporyn táýligine 1 mln jumyrtqa óndiretin pasterlengen suıyq jáne qurǵaq jumyrtqa ónimderin shyǵarýmen aınalysady. Bul taýyq jumyrtqasyn óńdeıtin elimizdegi alǵashqy zaýyt bolmaq. Kásiporyn qazirdiń ózinde tehnologııasy elimizde belgilenetin, jumyrtqa ónimderin óndirý boıynsha álemdik kóshbasshy «Thornico» (Sanovo) kompanııasymen eksklıýzıvti kelisimge qol qoıdy. Jobany kelesi jyly jeńildetilgen nesıeleý túrinde memlekettiń qoldaýymen júzege asyrý josparlanyp otyr.
Taıaýda kásiporynǵa vıse-premer Serik Jumanǵarın de baryp, óndiris úderisimen tanysyp qaıtqan edi. Vıse-premer atalǵan jobany qoldap, onyń elimizdegi agroónerkásip kesheni salasynda tereń qaıta óńdeýdi damytýda mańyzdy rólge ıe bolatynyn aıtty.
Kásiporynda ylǵal astyqty saqtaýdyń jańa ári qoljetimdi ádisteri qoldanylady. Munda 8 jyldan beri ylǵaldyǵy 18-20 paıyz bolatyn astyqty saqtaýǵa arnalǵan plastık qapshyqtar paıdalanylady. Bul pishinde ony 6 aı boıy qaýipsiz saqtaýǵa, kóktemde ashyp, keptirip, ári qaraı saqtaýǵa bolady. Kásiporyn basshysy Maksım Bojkonyń aıtýynsha, otteginiń bolmaýyna baılanysty astyq jyl boıyna óte jaqsy saqtalady.