Mańǵystaý oblysyndaǵy mektep oqýshylaryn tasymaldaıtyn kompanııa eki túrli daýdyń ortasynda qalyp tur. Biri – birneshe aılardan beri jalaqy ala almaǵan, oqýshylardy tasý úshin jaldanǵan avtobýs júrgizýshileriniń shýy bolsa, ekinshisi – osy ýaqytqa deıin aqsha bólmeı, sonyń saldarynan júrgizýshilerdi birneshe aılar boıy jalaqysyz qaldyrýǵa ákelip soqtyrǵan ákimdikterdiń áreketi.
Memlekettik tapsyrys boıynsha jumys isteıtin kompanııa basshysy jergilikti atqarýshy organdar aqshany aýdarmaǵandyǵyn aıtady. Aıtýynsha, óńirdegi balalary tasymaldanatyn 5 aýyl ákimdigi bularǵa 70 mıllıon teńge qaryz eken. Júrgizýshiler kompanııa basshysynan aılyǵyn talap etse, kompanııa basshysy óz kezeginde qomaqty qarjyny óteýi úshin endi jergilikti shendilerdi sotqa bermek.
6 myń oqýshyny tasymaldaıtyn mekemede 57 avtobýs júrgizýshisi bar bolsa, olardyń keıbiri 7 aıdan beri jalaqy almaǵan. Júrgizýshilerdi kóligimen birge jaldap otyrǵan mekeme jalaqy tóleýden jaltarmaǵanmen, qarjy taba almaı daǵdarýda.
– О́mirzaq eldi mekeni – 5 mıllıon, Munaılydaǵy Atameken – 22-23 mıllıon, Basqudyq – 11 mıllıon 900 myń, Aqshuqyr – 33 mıllıon, Saıyn aýyly 7 mıllıondaı qaryz, deıdi kólik kompanııasynyń dırektory Muhtar Qatarbaev. Onyń aıtýynsha, aýyldardyń arasynda oqý jyly bastalǵaly bir tıyn tólemegender de bar. Ákimderi onyń sebebin túsindirýdi surap jazǵan hatqa jaýap ta bermegen.
Kompanııa basshylyǵy ákimder ústinen sotqa aryzdanýda. Al júrgizýshiler joǵaryǵa joldaǵan aryzdarynan nátıje bolmasa, ákimdik aldyna baryp, narazylyq sherýin ótkizýge bel baılap otyr.
Gúlaıym ShYNTEMIRQYZY,
«Egemen Qazaqstan».
Mańǵystaý oblysy.