Joldaý júktegen mindetter aıasynda «Baıtaq» jasyldar partııasynyń bastamasymen elimizde «Green Kazakhstan» qoǵamdyq qory qurylady. Bul týraly keshe partııa ǵımaratynda ótken baspasóz máslıhatynda partııa tóraǵasy Azamathan Ámirtaev pen «Parasat» kásipkerler alıansynyń basqarma tóraǵasy Oleg Pak málimdedi. Aıta keterligi, partııa Qordyń quryltaıshysy emes, ishki jumystaryna aralasa almaıdy. Tek qoǵamdyq baqylaý arqyly ǵana atalǵan jobanyń tıimdi júzege asýyna úles qospaq.
BAQ ókilderi aldynda «Green Kazakhstan» qoǵamdyq qorynyń qurylatynyn resmı jarııalaǵan Azamathan Ámirtaev bul sheshim ózekti ekologııalyq syn-qaterlerge beriler jaýap jáne Memleket basshysynyń jaqynda halyqqa arnaǵan Joldaýynda aıtylǵan tapsyrmalarymen tyǵyz baılanysty ekenin atap ótti.
«Green Kazakhstan» qory elimizdiń ekologııalyq saıasatyn iske asyrýda, ornyqty damý qaǵıdattaryn ilgeriletýde negizgi qural bolýǵa arnalǵan. Qordyń negizgi maqsattary men mindetterine mynalar jatady. Birinshiden, ekologııalyq bastamalardy qarjylandyrady. Ol úshin Qor eldegi ekologııalyq jaǵdaıdy jaqsartýǵa baǵyttalǵan jobalardy qoldaý úshin ártúrli kózden qarajat jınaıdy. Ekinshiden, ekologııalyq quzyretter ortalyǵyn qurý arqyly «Green Kazakhstan» ekologııa salasyndaǵy jetistikter, bilim jáne álemdik úzdik tájirıbelermen almasý alańyna aınalady. Úshinshiden, ekologııalyq aqparattyq kún tártibin basqarý jolymen Qor ekologııa máseleleri boıynsha qoǵamdyq pikirdi belsendi qalyptastyrady jáne halyq arasynda ekologııalyq mádenıetti ilgeriletedi. Tórtinshi, «Green Kazakhstan» ulttyq ESG-platformasyn damytý elimizdiń ınvestısııalyq tartymdylyǵyn arttyrýǵa yqpal ete otyryp, ulttyq ESG-standarttaryn ázirleıdi jáne engizedi. Besinshisi, ekonomıkany dekarbonızasııalaýǵa járdemdesý. Iаǵnı Qor Qazaqstannyń 2060 jylǵa deıingi kómirtegi beıtaraptyǵyna qol jetkizý strategııasyn iske asyrýǵa belsendi qatysqaly otyr.
Partııa tóraǵasynyń aıtýynsha, «Green Kazakhstan» qoryn qurý – jahandyq ekologııalyq syn-qaterler men damýdyń ulttyq basymdyqtary kontekstinde ýaqtyly jáne qajetti qadam bolyp otyr.
Sondaı-aq Qor ekologııalyq problemalardy sheshýde memlekettiń, bıznestiń jáne qoǵamnyń kúsh-jigerin shoǵyrlandyrýǵa, ekologııalyq jobalardy qarjylandyrý men iske asyrýdyń ashyq tetigin qamtamasyz etýge, elimizdiń «jasyl» ekonomıkaǵa jáne turaqty damýǵa kóshýin jedeldetýge ári ekologııalyq ahýaldy, azamattardyń ómir súrý sapasyn jaqsartýǵa, sonymen qatar ekologııa jáne ornyqty damý máselelerine jaýapkershilikpen qaraıtyn el retinde Qazaqstannyń halyqaralyq bedelin arttyrýǵa múmkindik bermek.
Joldaý júktegen mindetti arqalaǵan Qor óz jumysyn jaqyn arada bastaǵaly otyr. Partııa atalǵan Qordyń alǵa qoıylǵan maqsattarǵa jetýi úshin memlekettik organdarmen, bıznes-qurylymdarmen, halyqaralyq uıymdarmen jáne jurtshylyqpen tyǵyz yntymaqtasa jumys isteýdi josparlaǵan.