V Dúnıejúzilik kóshpeliler oıyndarynda sportshylar arqan tartýdan da saıysqa túsedi. Elimizdiń erler jáne áıelder quramasy qorytyndy oqý-jattyǵý jıynyn ótkizip jatyr.
Ulttyq quramanyń aǵa jattyqtyrýshysy Raýan Qaıyrbaev sportshylar Aqmola oblysy Shýchınsk qalasynda ázirlikti pysyqtap jatqanyn aıtty.
«Arqan tartý dodasynda kúshpen qatar eptilik, komandanyń uıymshyldyǵy mańyzdy sanalady. Áıelder quramasynyń sapynda tájirıbeli sportshylarmen birge jas talanttar da baǵyn synaıdy. Qurama músheleriniń arasynda kópbalaly ana mártebesine ıe sańlaqtarymyz da bar. Erler men qyzdardan da júlde kútemiz», dedi R.Qaıyrbaev.
Arqan tartystan ulttyq qurama músheleri tyńǵylyqty daıyndalý úshin Týrızm jáne sport mınıstrligi qajetti jaǵdaı jasaǵanyna alǵysyn bildirdi.
Elordada ótetin kóshpeliler oıyndarynda el úmitin arqalap shyǵatyn quramadaǵy tájirıbeli sportshylar aıanyp qalmaımyz deıdi. Áıelder arasynda synǵa túsetin Aqjan Qaıyrbaeva, Razııa Musabaeva, Nursáýle Rahmatýllına syndy úzdikter dúbirli dodanyń altyn medalin oljalaýdy kózdeıdi.
Erler quramasy da Dúnıejúzilik kóshpeliler oıyndarynyń altyn júldesi úshin baryn salýǵa ázir. Halyqaralyq týrnırlerden oljaly oralyp júrgen Dinıslam Shákirtov, Dáýren Sháripov, Damır Baıǵonov, Stanıslav Penıaev bastaǵan sańlaqtar tegeýrindi qarsylastardyń qarymyna tótep berý úshin ázirlikti kúsheıtip jatyr.
Álemniń 80-ge tarta memleketinde resmı sport bolyp bekitilgen arqan tartý saıysy elimizde de keń qanat jaıyp keledi. Osy sportty óristetý maqsatynda jeke federasııa da quryldy. Sportshylarymyz halyqaralyq saıystarǵa qatysyp shyńdalyp jatyr. Tek kásibı shuǵyldanýshylar ǵana emes, áýesqoılar arasynda da arqan tartystan túrli týrnır uıymdastyrylady. Mekeme qyzmetkerleri arasynda da respýblıkalyq týrnır, spartakıada jıi ótkendikten, talanttardyń tanylýyna múmkindik mol.